Me ren Jon 1:1-51
1 Lepoputáán a nóm ewe Kapas, me ewe Kapas a nóm ren Kot, me ewe Kapas i emén kot.
2 Ei emén a nóm ren Kot me lepoputáán.
3 Mettóch meinisin ra fis ren i, me ese mwo nge wor och mettóch a fis me lúkún i.
Met a fisitá
4 ren i, ina manaw, me ewe manaw ina ewe saram fán iten aramas.
5 Me ewe saram a tittin lón ewe rochopwak, nge ewe rochopwak ese kunuoló.
6 A wor emén mwán mi tupuni Kot a tiitiito, itan Jon.
7 Ei mwán a feito ussun emén chón pwáraatá, pwe epwe pwáraatá ussun ewe saram, iwe ren i meinisin sókkopaten aramas repwe lúkú.
8 Esap i ena saram, nge i a feito pwe epwe pwáraatá ussun ena saram.
9 Ewe saram mi enlet mi asarama sókkopaten aramas epwele feito fénúfan.
10 Iwe, a nóm lón fénúfan, me fénúfan a fisitá ren i, nge fénúfan ese silei i.
11 A feito ngeni pwúkútáán leenian, nge aramasen lón rese etiwa i.
12 Iwe nge, meinisin chókkewe mi etiwa i, a fang ngeniir pwúúng ar repwe wiliiti néún Kot, pokiten ra anganga ar lúkú lón itan we.
13 Me ra uputiw, esap seni chcha are seni tipen futuk are tipen aramas, nge seni Kot.
14 Iwe, ewe Kapas a wiliiti futuk me a nónnóm leich, me sia kúna an we ling, ewe sókkun ling seni emén sam ngeni néún áláemén, me a uren chen* me ren Kot me enlet.
15 (Jon a pwáraatá ussun i, me a léúwommóng le kékké: “Iei i ewe emén úa kapas ussun, ‘Ewe emén mi feito me mwiri a akkomwoló mwei, pún i a akkomw fisitá mwei.’ ”)
16 Pokiten a uren kirekiréch mi sómwóló me enlet, sia akkangei kirekiréch mi sómwóló.
17 Ewe Allúk a kawor me ren Moses, nge ewe kirekiréch mi somwoló me ewe enlet ra feito me ren Jises Kraist.
18 Ese wor emén aramas a kúna Kot fán eú, nge ewe chék áláemén* mi nóm únúkkún* Seman we, ewe emén a pwáraaló ussun I.
19 Iei ewe kapasen pwáraatá Jon a apasa atun ekkewe chón Jus ra tiinaaló ekkewe souasor me chón Lifai seni Jerusalem ar repwe eisini i: “En ié?”
20 I ese túkúmi, a wenechar le apasa: “Esap ngang ewe Kraist.”
21 Me ra eisini i: “Iwe met? En Elias?” A pélúweni: “Esap ngang.” “En ewe Soufós?” Me a pélúweni: “Aapw!”
22 Iwe ra ereni: “En ié? Kopwe erenikem pwe áúpwe tongeni pélúweni chókkewe mi tiinikemito. Met ka erá ussun pwisin en?”
23 A apasa: “Ngang ewe emén méngúngúún mi kékkéwu me lón ewe fénúpéén: ‘Oupwe áwenecharaaló alen Jiowa,’* ussun chék ewe soufós Aisea a apasa.”
24 Iwe, chókkewe mi tiitiito iir seni ekkewe Farisi.
25 Iwe ra kapas eis ngeni, ra erá: “Nge pwata chék ka féri angangen papatais iká pwe esap en ewe Kraist are Elias are ewe Soufós?”
26 Jon a pélúweniir: “Úa féri angangen papatais lón konik. A wor emén mi nónnóm leimi ewe ouse silei,
27 ewe mi tattapwoto mwiri, ewe ese fich ngeniei ái úpwe epichi féféén ipwan kewe.”
28 Ekkeei mettóch ra fis me lón Petani epek ewe Jortan, ikewe Jon a féri angangen papatais ie.
29 Sorotáán, a kúna Jises pwe a feito ren, me a apasa: “Katol, ewe Lamen Kot, ewe a uwealó tipisin fénúfan!
30 Iei i ewe emén úa fósun, úa erá: ‘A wor emén mi nóm mwiri epwe akkomwoló mwei pún a akkomw fisitá mwei.’
31 Pwal mwo nge ngang úse silei i, nge ewe popun úa feito féri ewe angangen papatais lón konik pwe átei epwe pwááló lón Israel.”
32 Jon a pwal pwáraatá, a apasa: “Úa kúna ewe ngún mi fel a feitiw seni láng ussun emén lisom, me a nónnóm wóón i.
33 Pwal mwo nge ngang úse silei i, nge ewe Emén a tiinieito pwe úpwe féri ewe angangen papatais lón konik, ina i ewe a ereniei: ‘Ié we ka kúna pwe ewe ngún mi fel a feitiw me nónnóm wóón, iei i ewe emén epwe féri ewe angangen papatais ren ngún mi fel.’
34 Me ngang úa fen kúna, me úa pwáraatá pwe ei emén i ewe Néún Kot.”
35 Pwal sorotáán, Jon a úkkúútá ren rúúemén néún kewe chón káé,
36 me atun a nennengeni Jises an feffetál, a apasa: “Katol, ewe Lamen Kot!”
37 Lupwen ekkewe rúúemén chón káé ra rong an apasa ei, ra tapweló mwirin Jises.
38 Iwe Jises a sapesefál, me a kúner pwe ra tapweló mwirin, a ereniir: “Met oua mochen?” Ra apasa ngeni: “Rappai (a wewe ngeni “Sense”), ia ka nónnóm ie?”
39 A ereniir: “Ou feito me oupwe kúna.” Iwe ra feiló me kúna ia a nónnóm ie, me ra nóm ren lón ena ránin, ina epwe lón áengolun kulók.*
40 Andru, pwiin Simon Piter, i emén me lein ekkewe rúúemén mi rong met Jon a apasa me tapweló mwirin Jises.
41 A akkomw kúna pwisin pwiin we Simon me ereni i: “Áúa kúna ewe Messaia” (a wewe ngeni, “Kraist”),
42 me a panaló i ren Jises. Atun Jises a nengeni i, a erá: “En Simon, néún Jon, kopwe iteni Kefas” (weween “Piter”).
43 Sorotáán, Jises a filaatá le ló Kalili. Iwe a kúna Filip me ereni: “Kopwe tapwoto mwiri.”
44 Filip i seni Petsaita, telinimwen Andru me Piter we.
45 Filip a kúna Nataniel me ereni: “Áúa kúna ewe emén mi makketiw ussun lón ewe Allúkún Moses me makkeien ekkewe Soufós: Jises néún Josef seni Nasaret.”
46 Nge Nataniel a ereni i: “Mi tongeni wor met mi múrinné epwe towu seni Nasaret?” Filip a ereni: “Feito kopwe katol.”
47 Jises a kúna Nataniel an a feffeito ren me erá ussun i: “Nengeni, wesewesen i re Israel ese wor otuputup ren.”
48 Nataniel a ereni: “Pwata ka sileei?” Jises a ereni: “Me mwen án Filip kékkéruk, ngang úa kúnók óm nóm fán ewe irá fiik.”
49 Nataniel a ereni: “Rappai, en ewe Néún Kot, en ewe Kingen Israel.”
50 Jises a pélúweni: “Ka lúkú pokiten úa erenuk pwe úa kúnók me fán ewe irá fiik? Kopwe kúna ekkewe mettóch mi lap seni ekkeei.”
51 Mwirin a ereni: “Enlet úa erenikemi oupwe kúna láng an a suukuló me néún Kot kewe chónláng repwe feitá me feitiw ngeni ewe Néún aramas.”
Footnote
^ Are “kirekiréch mi somwoló.”
^ Are “emén kot.”
^ Are “mi nóm leupwen ewe Sam.” Ei napanap a wewe ngeni pwe a wor eú riri mi kkóló aúchean.
^ Ina epwe 4:00 p.m.
