Me ren Jon 11:1-57
11 Iwe, emén mwán itan Lasarus a semmwen. I seni Petani, ewe sóópw fefinan kewe Meri me Marta ra pwal nóm ie.
2 Iei i Meri ewe a ninatiw ewe lémmis wóón ewe Samol me télúpwásei pechen kewe ngeni meten mékúran, Lasarus ewe mi semmwen, i mwongean.
3 Ina minne, fefinan kewe ra tiinaaló pwóróus ngeni, ra apasa: “Samol, nengeni! ewe emén ka tongei a semmwen.”
4 Nge lupwen Jises a rong ena, a apasa: “Ei semmwen esap sópwólóón máló, nge fán iten lingelóón Kot, pwe ewe Néún Kot epwe kúna ling ren.”
5 Jises a tongei Marta me pwiin we me Lasarus.
6 Iwe nge, lupwen a rong pwe Lasarus a semmwen, a pwal chék nómotiw ruu rán lón ewe leeni ikewe a nóm ie.
7 Mwirin ei, a ereni ekkewe chón káé: “Ousipwe feilósefál ngeni Jutia.”
8 Ekkewe chón káé ra ereni: “Rappai, pónnóón kewe chék ekkewe chón Jutia ra kúkkúttók pwe repwe maneek, nge kopwele pwal feilósefál ikena?”
9 Jises a pélúweni: “Esap pwe a wor 12 awaan lerán? Iká emén epwe fetál lerán, i esap chepeti och mettóch pokiten a kúna saramen ei fénúfan.
10 Nge iká emén epwe fetál lepwin, i epwe chepetek, pún ewe saram ese nóm lón i.”
11 Mwirin an apasa ekkeei mettóch, a pwal apasa: “Chiechiach we Lasarus a méúr, nge úpwe sáiló ikena pwe úpwe féngúnatá i.”
12 Iwe, ekkewe chón káé ra ereni: “Samol, iká pwe a méúr, i epwe chikar.”
13 Iwe nge, Jises a fósun an a máló. Nge ra ekieki pwe a fósun an asésé lón méúr.
14 Iwe, Jises a affata ngeniir: “Lasarus a máló,
15 me úa pwapwa fán itemi ái úse nóm ikenan, pwe oupwe lúkú. Nge sipwe feiló ren.”
16 Iwe, Tomas ewe mi iteni ewe Nippwe, a ereni chienan kewe chón káé: “Ousipwe pwal feiló pwe sipwe eti i le máló.”
17 Lupwen Jises a war, a silei pwe Lasarus a fen nóm lón peiás úkúúkún rúáánú rán.
18 Iwe, Petani a arap ngeni Jerusalem, ina epwe ruu mwail* towauan.
19 Me chómmóng chón Jus ra feito ren Marta me Meri pwe repwe oururuur fán iten mwongeer we.
20 Lupwen Marta a rong pwe Jises a feffetáleto, a feiló pwe epwe chuuri. Nge Meri a chék mómmóót lón ewe imw.
21 Iwe, Marta a ereni Jises: “Samol iká ke nóm ikeei, mwongeei we esap máló.
22 Nge pwal mwo iei, úa silei pwe met kopwe tingorei Kot, Kot epwe ngonuk.”
23 Jises a ereni neminna: “Mwongeom we epwe manawetá.”
24 Marta a ereni: “Úa silei pwe epwe manawetá lón ewe manawsefál lón ewe sáingoon rán.”
25 Jises a ereni: “Ngang ewe manawsefál me ewe manaw. Ewe emén mi anganga an lúkú lón ngang, ikáámwo epwe máló, i epwe manaw.
26 Me meinisin ekkewe mi manaw me mi anganga ar lúkú lón ngang resap fókkun máló. Ka lúkú ei?”
27 A ereni: “Ewer Samol, ngang úa lúkú pwe en ewe Kraist, ewe Néún Kot, ewe emén mi feito lón fénúfan.”
28 Mwirin an apasa ei, a feiló me kékkéri pwiin we Meri, a mwéngúnúngún ngeni: “Ewe Sense a nóm me a eis en.”
29 Atun a rong ei, a mwittir útá me feiló ren.
30 Jises esaamwo tolong lón ewe sóópw, nge a chúen nóm lón ewe leeni ikewe Marta a chuuri me ie.
31 Lupwen ekkewe chón Jus mi nóm ren Meri lón ewe imw pwe re oururu ra kúna an mwittir útá me towu lúkún, ra tapweló mwirin, tittiper pwe epwe feiló ren ewe peiás pwe epwe kechiw ikena.
32 Lupwen Meri a wareiti ikewe Jises a nóm ie me kúna i, a chapetiw ren pechen me ereni: “Samol, iká ke nóm ikeei, mwongeei we esap máló.”
33 Lupwen Jises a kúna án neminnewe kechiw pwal án ekkewe chón Jus mi etaato kechiw, a fókkun chúng letipan me weires.
34 A apasa: “Ia oua onómu ie?” Ra ereni: “Samol, feito me katol.”
35 Jises a kechiw.
36 Iwe, ekkewe chón Jus ra poputá le apasa: “Nengeni úkúúkún watteen án Jises tongei i!”
37 Nge ekkóch me leir ra apasa: “Esap ei mwán mi ánennelóói mesen ewe mwán mi chuun a tongeni eppeti ei emén seni máló?”
38 Iwe, mwirin an a pwal fókkun chúng letipen Jises, i a feiló ren ewe peiás. Ren enletin, ina eú pokuwo, me eféú faw a éppwél ngeni.
39 Jises a apasa: “Oupwe ekaaló ewe faw.” Marta, fefinen ewe mi máló we, a ereni: “Samol, ina epwele pwopwoon, pún a fen rúáánú ránin.”
40 Jises a ereni: “Esap úa erenuk pwe iká kopwe lúkú kopwe kúna ewe lingen Kot?”
41 Iwe, ra ekaaló ewe faw. Mwirin Jises a sachchetá láng me apasa: “Semei, úa kilisou ngonuk pwe ka aúseling ngeniei.
42 Ngang mi silei pwe ka aúseling ngeniei fansoun meinisin. Nge úa fós fán iten ei mwichen aramas mi útá ikeei pwe repwe lúkú pwe en ka tiinieito.”
43 Lupwen a apasa ekkeei mettóch, a léúwommóng le apasa: “Lasarus, kopwe towu!”
44 Ewe mwán mi fen máló a towu, nge pechen me péún mi finifiniló, me wóón mesan a finifin ngeni och mangaak. Jises a ereniir: “Oupwe epichaaló pwe epwe tongeni fetál.”
45 Ina minne, chómmóng me lein ekkewe chón Jus mi feito ren Meri me kúna met Jises a féri ra lúkú lón i,
46 nge ekkóch me leir ra feiló ren ekkewe Farisi me ereniir met Jises a féri.
47 Iwe, ekkewe souasor mi lap me ekkewe Farisi ra emwichafengeni án chón Jus we mwichen soukapwúng mi tekia me apasa: “Met sipwele féri, pún ei mwán a féri chómmóng manaman?*
48 Iká sipwe mut ngeni an epwe iei ussun, meinisin repwe lúkú lón i, me ekkewe chón Rom repwe feito me angealó leeniach* me aramasen mwúúch.”
49 Nge emén me leir, Kaifas, ewe souasor mi lapalap lón ena ier, a ereniir: “Ouse fókkun silei och mettóch,
50 me ámi ouse weweiti pwe ina feiéchúmi, án emén mwán epwe máló fán ásengesin ekkena aramas lap seni án chón unusen eú mwú repwe péútmwááliló.”
51 Iwe nge, i ese apasa ei seni pwisin an ekiek, nge pokiten i ewe souasor mi lapalap lón ena ier, i a osuni pwe Jises epwe máló fán iten ekkewe chón Jus,
52 me esap chék fán iten ekkewe chón Jus nge pwal ren kochufengenin lón eú mwiich néún Kot kewe mi toropasfeil.
53 Iwe, seni lón ena rán ra pwúngúpwúng pwe repwe nieló i.
54 Iei minne, Jises ese chúen fetálfeil le pwápwááló lein ekkewe chón Jus, nge a ló seni ikena me feiló ngeni ewe leeni arap ngeni ewe fénúpéén, ngeni eú telinimw itan Efraim, me a nónnóm ikena ie iir me ekkewe chón káé.
55 Iei a arapoto án chón Jus we Pasofer, me chómmóng aramas seni meinisin ekkewe fénú ra feitá ngeni Jerusalem me mwen ewe Pasofer pwe repwe féri ewe angangen elimelima pwisin iir me ren ewe Allúk.
56 Ra kúkkútta Jises me ra eráfengen lefiler atun ar útá lón ewe imwenfel: “Met meefiemi? Esap fókkun etto ngeni ewe ránin chulap?”
57 Nge ekkewe souasor mi lap me ekkewe Farisi ra allúkú ngeni ekkewe aramas pwe iká emén a silei ia Jises a nóm ie, epwe esile ngeniir pwe repwe aresini i.
