Me ren Jon 12:1-50
12 Wonu rán me mwen ewe Pasofer, Jises a wareiti Petani, ikewe Lasarus a nónnóm ie, ewe Jises a amanawaatá seni máló.
2 Iwe, ra féri eú mwéngéén lekuniol fán itan ikena ie, me Marta a wisen angang ngeniir, nge Lasarus i emén me lein chókkewe mi eti le mwéngé.*
3 Mwirin, Meri a angei eú rumeen* lémmis mi fókkun mémmóng, mi ffér seni nard* ese nofit ngeni och mettóch, me a ninatiw wóón apachapachen Jises me télúpwásei apachapachan ngeni meten mékúran. Lón ewe imw a uren pwokkusun ewe lémmis.
4 Nge Jutas Iskariot, emén me lein néún kewe chón káé, ewe epwele afangemá i, a apasa:
5 “Pwata ei lémmis ese améméló wóón 300 denarii* me ngeni ekkewe mi wéúngaw?”
6 Iwe nge, an apasa ei esap pokiten an ekieki ekkewe mi wéúngaw, nge pokiten i chón solá me a nóm ren ewe pwórun moni me a kan soláái ewe moni mi iseiselong lón.
7 Mwirin, Jises a apasa: “Oupwe likitaaló neminna, pwe epwe féri ei iei, fán iten ránin ái peiás.
8 Pún ekkewe mi wéúngaw ra nónnóm remi fansoun meinisin, nge ngang úsapw nónnóm remi fansoun meinisin.”
9 Nge, eú mwichemmóngun aramasen Jus ra silei pwe Jises a nóm ikena, iwe ra feito esap chék pokiten i nge pwal pokiten repwe katol Lasarus, ewe i a amanawaatá seni máló.
10 Iei ekkewe souasor mi lap ra pwúngúpwúng wóón ar repwe pwal nieló Lasarus,
11 pún i ewe popun pwe chómmóng chón Jus ra feiló ikena me lúkú lón Jises.
12 Sorotáán ewe rán mwirin, ewe mwichemmóngun aramas mi feito ngeni ewe chulap ra rong pwe Jises epwele wareiti Jerusalem.
13 Iwe, ra angei palen ekkewe irá palm me feiló pwe repwe chuuri, me ra poputá le kékké fán léúwommóng: “Áúa iótek, amanawa! Mi feiéch ewe Kingen Israel, ewe emén mi feito lón iten Jiowa!”*
14 Lupwen Jises a kúna emén nieniféén aas, a móttiw wóón, ussun chék met a makketiw:
15 “Kosap niwokkus Sion.* Nengeni! Noum we king a feito, a mómmóót wóón emén appanen aas.”
16 Néún kewe chón káé rese weweiti ekkeei mettóch me akkomwan. Nge atun Jises a feitá láng, ra chemeni pwe ekkeei mettóch ekkewe aramas ra féri ra makketiw lón ekkewe Taropwe mi Pin, mi weneiti Jises.
17 Iwe, ekkewe aramas mi nóm ren ewe atun a kékkérawu Lasarus seni me lón ewe peiás me amanawaatá seni máló, ra akkapwóróusa ngeni aramas minne a fis.
18 Pwal iei popun án aramas feiló pwe repwe chuuri i, pún ra rong pwe a féri ei manaman.*
19 Iwe, ekkewe Farisi ra eráfengen lefiler: “Sia kúna, ese wor ia sipwe peló ie. Nengeni! Unusen chón fénúfan ra tapweló mwirin i.”
20 Iwe, a wor ekkóch chón Krik lein chókkewe mi feito pwe repwe fel atun ewe chulap.
21 Iwe ra feito ren Filip, i seni Petsaita lón Kalili, me ra poputá le tingorei, ra apasa: “Áúa mochen kúna Jises.”
22 Filip a feiló me ereni Andru. Andru me Filip ra feiló me ereni Jises.
23 Nge Jises a pélúwen ngeniir: “A tori ewe fansoun án ewe Néún aramas epwe angei lingan.
24 Enlet úpwe erenikemi, iká eféú féún wiich esap mworetiw lón ewe pwúl me máló, epwe eféú chék. Nge iká epwe máló, iwe epwe uwaani chómmóng.
25 Ié a echeni manawan epwe péút* seni, nge ié a oput manawan lón ei fénúfan epwe túmún manawan fán iten manaw esemuch.
26 Iká emén epwe angang ngeniei, epwe tapwoto mwiri, me ia úpwe nónnóm ie, ikena ie nei chón angang epwe pwal nónnóm ie. Iká emén epwe angang ngeniei, ewe Sam epwe efeiéchú i.
27 Iei úa fókkun weires, me met úpwele apasa? Semei, selániei seni met epwele fis.* Iwe nge, iei popun ái feito.
28 Semei, kopwe elingaaló itom.” Mwirin, eú méngúngú a feito seni láng: “Úa fen elingaaló me úpwe pwal elingasefáli.”
29 Iwe, ekkewe aramas mi úkkúútá ikena ra rong me ra poputá le apasa pwe a chopulap. Ekkóch ra apasa: “Emén chónláng a fós ngeni i.”
30 Jises a pélúweni: “Ei méngúngú a fis, esap fán ásengesi nge fán ásengesimi.
31 Iei a wor eú kapwúng ngeni ei fénúfan. Iei ewe sounemenemen ei fénúfan epwele kóturuwu.
32 Iwe nge, iká úpwe eitiwetá, úpwe óófaato rei meinisin sókkun aramas.”
33 A apasa ei pwe epwe pwáári met sókkun máló i epwele mááli.
34 Mwirin ekkewe aramas ra pélúweni i: “Áúa rong seni ewe Allúk pwe ewe Kraist epwe nónnóm tori feilfeiló chék. Nge pwata ka tongeni apasa pwe ewe Néún aramas epwe eitiwetá? Ié ei Néún aramas?”
35 Iwe, Jises a ereniir: “Ewe saram epwe nónnóm leimi pwal ekis fansoun. Oupwe fetál fansoun mi chúen nóm remi ewe saram pwe ewe kiroch esap torikemi. Ewe emén mi fetál lón kiroch esap silei ia epwe feiló ie.
36 Lupwen ewe saram a nóm remi, oupwe anganga ámi lúkú lón ewe saram pwe oupwe wiliiti néún saram.”
Jises a apasa ekkeei mettóch me a feiló me op seniir.
37 Ikáámwo a féri chómmóng manaman* mwen meser, nge iir rese lúkú lón i,
38 pwe alon ewe soufós Aisea epwe pwénúetá, ewe a apasa: “Jiowa,* ié epwe eáni lúkú lón ewe mettóch repwe rong senikem?* Me ié manamanen péún Jiowa* a fen pwááló ngeni?”
39 Ewe popun rese tongeni lúkú, pwe Aisea a pwal apasa:
40 “Ngang úa ochunaaló meser me aféreaai letiper, pwe resap kúna ren meser me weweiti ren letiper me kulsefál me úpwe echikarer.”
41 Aisea a apasa ekkeei mettóch pún a kúna lingen Kraist me a kapas ussun i.
42 Iwe nge, chómmóng sounemenem ra wesewesen lúkú lón i, nge pokiten ekkewe Farisi, rese tongeni pwáraaló pwe rete katowu seni ewe sinakok.
43 Pún iir ra efich án aramas repwe mwareitiir lap seni án Kot epwe mwareitiir.
44 Iwe nge, Jises a kékkéwu me apasa: “Ié a lúkú lón ngang ese chék lúkú lón ngang nge pwal lón i ewe mi tiinieito.
45 Me ié a kúnaei, a pwal kúna ewe Emén mi tiinieito.
46 Ngang úa feito pwe úpwe eú saram ngeni fénúfan, pwe meinisin mi lúkú lón ngang resap nónnóm lón kiroch.
47 Nge iká emén a rong ái kewe kapas me ese apwénúretá, ngang úsapw apwúngú i, pún ngang úa feito, esap ren ái úpwe apwúngú fénúfan nge ái úpwe amanawa fénúfan.
48 Ié ese etiwaei me ese etiwa ái kapas a wor met epwe apwúngú i. Ekkewe kapas úa apasa ina met epwe apwúngú i lón ewe sáingoon rán.
49 Pún ngang úse kapas wóón pwisin ái, nge ewe Sam mi tiinieito, i pwisin a ngeniei eú allúk ussun met úpwe apasa me met úpwe asukula.
50 Me ngang úa silei pwe an allúk a wewe ngeni manaw esemuch. Iwe, met úa apasa, úa chék apasa met ewe Sam a ereniei.”
Footnote
^ Are “móót tiwiniin órun ewe cheepel.”
^ Nard, eú sókkun irá mi pwokkus.
^ Krik, “Néún Sion fefin.”
^ Krik, “esissil.”
^ Krik, “ataieló.”
^ Krik, “seni me lón ei kulók.”
^ Krik, “esissil.”
^ Are “lón minne áúa apwóróusa.”
