Me ren Jon 13:1-38
13 Jises a silei me mwen ewe chulapen Pasofer pwe a tori an we fansoun an epwe ló seni ei fénúfan me feiló ren ewe Sam. Nge pokiten a tongei néún kewe chón káé mi nóm wóón fénúfan, a sópweeló an tongeer tori ewe sópwólóón.
2 A fis ewe mwéngéén lekuniol, me ewe Tefil a fen atolonga lón letipen Jutas Iskariot, néún Simon we, an epwe afangemá i.
3 Iwe, ren án Jises silei pwe ewe Sam a fen waalong lepéún mettóch meinisin me i a feito seni Kot me epwe feiló ren Kot,
4 a útá seni ewe mwéngéén lekuniol me watiw úfan kewe úféúfen lúkún. Me a angei eché taul, finiti ngeni lukanapan.*
5 Mwirin ena, a alélééi konik eú waspesen me poputá le télú pechen ekkewe chón káé me télúpwásei ngeni ewe taul mi finifin ngeni lukanapan.*
6 Iwe, a tikeri Simon Piter. I a ereni: “Samol, kopwe télú pechei?”
7 Jises a pélúweni i: “Met úa féri, kosap mwo weweiti iei, nge mwirin ekkeei mettóch, kopwap weweiti.”
8 Piter a ereni: “Kosap fókkun télú pechei.” Jises a ereni: “Iká úsapw télú pecheom, esap en emén me lein nei kewe.”
9 Simon Piter a ereni: “Samol, kosap chék télú pechei nge pwal pei me mékúrei.”
10 Jises a ereni: “Ié a fen tútú a chék lamot an epwe téttél pechen, pún unusen inisin a liméch. Me ámi oua liméch, nge esap ámi meinisin.”
11 Pún i a silei ewe emén epwe afangemá i. Iei popun a apasa: “Esap ámi meinisin oua liméch.”
12 Lupwen a wes le télú pecher me a úféúfolong úfan kewe úféúfen lúkún, a móttiwsefál* ren ewe cheepel me a ereniir: “Oua weweiti met úa féri ngenikemi?
13 Oua kér ngeniei ‘Sense’ me ‘Samol,’ iwe ámi mi pwúng, pún ngang Sense me Samol.
14 Iwe nge, iká ngang, ewe Samol me ewe Sense, úa télú pechemi, ámi oupwe pwal* télú pechen emén me emén leimi.
15 Pún úa isettiw ewe leenien áppirú fán itemi, pwe minne úa féri ngenikemi, ámi oupwe pwal féri.
16 Enlet úpwe erenikemi, emén slave esap lap seni néún we masta, are, emén mi tiitiiló esap lap seni ewe emén mi tiinaaló i.
17 Iká oua silei ekkeei mettóch, oupwe pwapwa iká oupwe fériir.
18 Ngang úse kapas ussumi meinisin. Úa silei ekkewe úa filiretá. Nge a iei ussun pwe ewe taropwe mi pin epwe pwénúetá: ‘Ewe emén mi mwéngé enei we pilawa a ú ngeniei.’
19 Seni lón ei fansoun, ngang úa erenikemi me mwen an epwe fis, pwe iká a fis, oupwe lúkú pwe ngang i.
20 Enlet úpwe erenikemi, ié a etiwa ewe emén úa tiinaaló a pwal etiwaei, nge ié a etiwaei a pwal etiwa ewe Emén mi tiinieito.”
21 Mwirin án Jises apasa ekkeei mettóch, a fókkun weires, iwe, a apasa: “Enlet úa erenikemi pwe emén me leimi epwe afangemáei.”
22 Ekkewe chón káé ra poputá le nennefengen lefiler, pún ra osukosuk iká pwe ié we a fósun.
23 Emén me lein ekkewe chón káé, ewe emén Jises a kon tongei, a móót únúkkún* Jises.
24 Iwe, Simon Piter a chimwe ngeni ena emén me ereni: “Kopwe erenikem ié na a fósun.”
25 Iwe, ei chón káé a únnesefál ngeni fán mwárin Jises me ereni: “Samol, ié na?”
26 Jises a pélúweni: “I ewe emén úpwe ngeni ewe och pilawa úpwe ottukaalong lón ewe sepi.” Ina minne, mwirin an ottukaalong ewe pilawa, a angei me ngeni Jutas néún Simon Iskariot we.
27 Mwirin án Jutas angei ewe pilawa, Setan a tolong lón letipan. Iwe Jises a ereni: “Kopwe mwittir féri minne ka poputááni.”
28 Iwe nge, ese wor emén me lein chókkewe mi nóm* órun ewe cheepel ra silei pwata a apasa ei ngeni.
29 Ren enletin, pokiten a nóm ren Jutas ewe pwórun moni, ekkóch leir ra ekieki pwe Jises a ereni, “Kopwe mééni met sia osupwangan lón ei ránin chulap,” are epwe ngeni och ekkewe mi wéúngaw.
30 Iwe, mwirin an angei ewe pilawa, a mwittir towu. Nge a pwin.
31 Iwe, atun a towu, Jises a apasa: “Iei ewe Néún aramas a kúna ling, me Kot a pwal kúna ling ren i.
32 Kot pwisin epwe elingaaló i, me epwe mwittir elingaaló i.
33 Kúkkún semirit, ngang úpwe nónnóm remi pwal ekis fansoun. Ámi oupwe kúttaei. Me iei úpwele pwal erenikemi ussun met úa ereni ekkewe chón Jus, ‘Ikewe úpwe feiló ie ámi ouse tongeni ló ie.’
34 Ngang úpwe ngenikemi eú allúk mi fé, ámi oupwe tongfengen lefilemi. Ussun chék ngang úa tongekemi, ámi oupwe pwal tongfengen lefilemi.
35 Ren ei, meinisin repwe silei pwe ámi nei chón káé—iká mi wor tong lefilemi.”
36 Simon Piter a ereni: “Samol, ia kopwele ló ie?” Jises a pélúweni: “Ikewe úpwe feiló ie, iei kese tongeni tapwoto mwiri, nge ekiseló kopwap tapwoto.”
37 Piter a ereni: “Samol, pwata úse tongeni tapweló mwirum iei? Ngang úpwe pennúkúóló manawei fán itom.”
38 Jises a apasa: “Kopwe pennúkúóló manawom fán itei? Enlet úpwe erenuk, emén chukó esap fókkun kékké tori óm kopwe amam ngang fán úlúngát.”
Footnote
^ Are “fétinúkú i.”
^ Are “ren minne mi féfénnúk ngeni.”
^ Are “móót tiwiniin.”
^ Are “pwal wisemi le.”
^ Krik, “kkan ngeni fán mwárin.” Ei napanap a wewe ngeni pwe a wor eú riri mi kkóló aúchean.
^ Are “móót tiwiniin.”
