Me ren Jon 14:1-31
14 “Ousap mut ngeni letipemi an epwe osukosuk. Oupwe anganga ámi lúkú lón Kot. Oupwe pwal anganga ámi lúkú lón ngang.
2 A wor chómmóng leeni* lón imwen Semei we. Iwe, úpwe erenikemi, pún úpwe feiló pwe úpwe ammólnatá eú leeni fán itemi.
3 Pwal och, iká úa feiló me ammólnatá eú leeni fán itemi, úpwe liwinsefálito me úpwe uweikemi pwe ikewe úa nóm ie pwal ámi oupwe pwal nóm ie.
4 Me ikewe úpwe feiló ie, oua silei ewe al.”
5 Tomas a ereni: “Samol, áúse silei ikewe ia kopwe feiló ie. Ifa ussun áúpwe tongeni silei ewe al?”
6 Jises a ereni: “Ngang ewe al me ewe enlet me ewe manaw. Ese wor emén epwe feiló ren ewe Sam are esap pokiten ngang.
7 Iká oua sileei, oua pwal silei Semei. Seni lón ei fansoun oua silei i me oua kúna i.”
8 Filip a ereni: “Samol, pwáári ngenikem ewe Sam, iwe ena a naf fán item.”
9 Jises a ereni: “Pwal mwo mwirin ái úa fen nóm remi ren langattamen fansoun, Filip, kesaamwo sileei? Ié a kúnaei a pwal kúna ewe Sam. Pwata ka erá, ‘Pwáári ngenikem ewe Sam’?
10 Kese lúkú pwe ngang me ewe Sam áúa tipeeúfengen? Ekkewe mettóch úa apasa ngenikemi úse kapas seni pwisin ngang, nge ekkena mettóch, ikkena án ewe Sam kewe angang, ewe mi chék tittipeeú ngeniei.
11 Oupwe lúkúei pwe ngang me ewe Sam áúa tipeeúfengen. Nge are esap ina, oupwe lúkú pokiten ekkewe angang.
12 Enlet úpwe erenikemi, ié mi anganga an lúkú lón ngang epwe pwal féri ekkewe angang úa féri, me i epwe féri ekkewe angang mi lap seni ekkeei, pún ngang úpwele feiló ren ewe Sam.
13 Pwal och, ese lifilifil met oua tingor lón itei, ngang úpwe féri, pwe ewe Sam epwe lingeló ren ewe Naw.
14 Iká oupwe tingor och mettóch lón itei, ngang úpwe féri.
15 “Iká oua tongeei, oupwe álleasochisi ái kewe allúk.
16 Me ngang úpwe tingorei ewe Sam me i epwe ngenikemi pwal och álillis epwe nónnóm remi feilfeiló,
17 ewe ngún mi fel mi pwáraaló ewe enlet, ina met fénúfan ese tongeni angei pokiten ese kúna are silei. Ámi oua silei pokiten a nónnóm remi me a nóm lón ámi.
18 Ngang úsapw likitikemiiló lón ámi letipeta.* Úpwe liwinto remi.
19 Ekiseló chék, fénúfan esap chúen kúnaei, nge ámi oupwe kúnaei, pokiten ngang úa manaw me ámi oupwe manaw.
20 Lón ena rán oupwe silei pwe ngang me Semei we áúa tipeeúfengen, me ámi me ngang ousia tipeeúfengen.
21 Ié mi wor ren ái kewe allúk me a álleasochisiir, i ewe emén mi tongeei. Iwe, ié mi tongeei, Semei we epwe tongei i, me ngang úpwe tongei i me úpwe pwárfichieiló ngeni i.”
22 Jutas, esap ewe Iskariot, a ereni: “Samol, met a fis pwe ina ka ekieki óm kopwe pwárfichukoló ngenikem nge esap ngeni fénúfan?”
23 Lón án Jises pélúweni a ereni: “Are emén a tongeei, i epwe álleasochisi ái kapas, me Semei we epwe tongei i me áúpwe feiló ren me nónnóm ren i.
24 Ié ese tongeei ese álleasochisi ái kewe kapas. Ekkewe kapas oua rongorong, esap ái nge án ewe Sam mi tiinieito.
25 “Úa erenikemi ekkeei mettóch atun úa chúen nónnóm remi.
26 Nge ewe ngún mi fel, ewe Semei we epwe tiinaato fán ásengesin itei, epwe álisikemi, pún epwe áiti ngenikemi mettóch meinisin me áchchema ngenikemi meinisin ekkeei mettóch úa erenikemi.
27 Úpwe likit ngenikemi kinamwe. Úpwe fang ngenikemi ái kinamwe. Úsapw fang ngenikemi lón napanapen án ei fénúfan fang. Ousap mut ngeni letipemi an epwe osukosuk are apwangapwangoló ren niwokkus.
28 Oua rong pwe ngang úa erenikemi, ‘Ngang úpwe feiló me úpwe pwal liwinsefálito remi.’ Iká ámi mi tongeei, oupwe pwapwa pwe úpwe feiló ren ewe Sam, pún ewe Sam a lap seniei.
29 Iwe, iei úa erenikemi me mwen ar repwe fis, pwe oupwe lúkú atun ra fis.
30 Úsapw chúen achómmóngaaló ái kapas ngenikemi pún ewe sounemenemen fénúfan epwele feito, me ese wor an nemenem wóói.*
31 Nge ren án fénúfan epwe silei pwe úa tongei ewe Sam, úa féri met chék ewe Sam a allúkú ngeniei ái úpwe féri. Oupwe útá, sipwele ló seni ikeei.
