Me ren Jon 16:1-33
16 “Úa apasa ngenikemi ekkeei mettóch pwe ousap chepetek.
2 Aramas repwe atokemiiwu seni me lón ewe sinakok. Ren enletin, epwe war ewe fansoun lupwen meinisin mi nikemiiló repwe ekieki pwe ra eáni eú angang* ngeni Kot.
3 Nge repwe féri ekkeei mettóch pokiten rese sissilei ewe Sam are ngang.
4 Nge úa erenikemi ekkeei mettóch pwe lupwen epwe war ewe fansoun ar repwe fis, oupwe chemeni pwe úa fen erenikemi ussur.
“Ngang úse erenikemi ekkeei mettóch me mwan, pokiten úa nóm remi.
5 Nge iei úpwele ló ren ewe Emén mi tiinieito, iwe nge, ese wor emén me leimi a eisiniei, ‘Ia kopwele ló ie?’
6 Nge pokiten úa erenikemi ekkeei mettóch, letipemi a uren letipeta.
7 Nge úpwe erenikemi ewe enlet, ái feiló ina eú feiéch ngenikemi. Pún iká úsapw feiló, ewe ngún mi fel, ewe epwe álisikemi esap fókkun feito ngenikemi. Nge iká úpwe feiló, ngang úpwe tiinaato remi.
8 Me lupwen oupwe angei, oupwe wewefichiti ekkewe mettóch. Iwe, oua tongeni áwewe ngeni aramas ussun tipis me ussun minne mi pwúng me ussun kapwúng.
9 Akkomw ussun tipis, pún rese anganga ar lúkú lón ngang,
10 mwirin, ussun minne mi pwúng, pún ngang úpwele feiló ren ewe Sam me ousap chúen kúnaei,
11 me ussun kapwúng, pún ewe sounemenemen ei fénúfan a fen kúna apwúng.
12 “A chúen wor chómmóng mettóch úpwe erenikemi, nge esap tongeni ki ngenikemi iei.
13 Iwe nge, lupwen oupwe angei án Kot we manaman mi fel mi pwáraatá ewe enlet, epwe emmwenikemi pwe oupwe unusen weweiti ewe enlet. Nge ei manaman ese tongeni pwisin angang wóón an, a pwáraatá met chék Kot a filaatá an epwe pwáraatá. Ina minne, oupwe silei ekkewe mettóch repwele fis.
14 Ena manaman mi fel epwe elingaeiló, pún epwe pwáraatá ngenikemi minne a angei seniei.
15 Mettóch meinisin mi wor ren ewe Sam ái. Ina popun, úa apasa pwe epwe pwáraatá ngenikemi minne a angei seniei.
16 Ekiseló chék ousap chúen kúnaei, nge pwal ekiseló chék oupwe kúnaei.”
17 Ren ena, ekkóch me lein néún kewe chón káé ra eráfengen lefiler: “Met weween an ei erenikich, ‘Ekiseló chék ousap chúen kúnaei, nge pwal ekiseló chék oupwe kúnaei,’ me, ‘pokiten úpwele feiló ren ewe Sam’?”
18 Iwe ra apasa: “Met weween an ei apasa, ‘ekiseló chék’? Sise silei met a fós ussun.”
19 Jises a silei pwe ra mochen kapas eis ngeni, iwe a ereniir: “Oua kapas eisfengen lefilemi pokiten úa erá: ‘Ekiseló chék ousap chúen kúnaei, nge pwal ekiseló chék oupwe kúnaei’?
20 Enlet úpwe erenikemi, oupwe kechiw me ngúngúres, nge fénúfan epwe pwapwa. Oupwe letipeta, nge ámi letipeta epwe wiliiti pwapwa.
21 Lupwen emén fefin epwele néúnéú, i a riáfféú* pokiten a tori an we fansoun, nge mwirin an a néúnéú, an riáfféú a ekkesiwil ngeni pwapwa pún a kúna néún we.
22 Iwe pwal ámi, iei oua letipeta, nge ngang úpwe kúnasefálikemi me letipemi epwe pwapwa me esap wor emén epwe angei senikemi ámi pwapwa.
23 Lón ena rán ousap fókkun chúen kapas eis ngeniei. Enlet úpwe erenikemi, iká oupwe tingorei ewe Sam och mettóch, i epwe fang ngenikemi fán ásengesin itei.
24 Tori iei ese mwo nge wor och mettóch oua tingor fán ásengesin itei. Oupwe tingor me oupwe angei pwe ámi pwapwa epwe unusoló.
25 “Úa erenikemi ekkeei mettóch lón kapas áwewe. Ewe fansoun epwele feito atun úsapw chúen kapas ngenikemi lón kapas áwewe, nge úpwele affataaló ái kapas ngenikemi ussun ewe Sam.
26 Lón ena rán oupwe tingor ngeni ewe Sam fán ásengesin itei. Ái apasa ei, esap weween nge úpwe wisen tingor fán itemi.
27 Pún pwisin ewe Sam a tongekemi, pokiten oua tongeei me oua lúkú pwe ngang úa feito ussun emén mi tupuni Kot.
28 Úa feito ussun emén mi tupuni ewe Sam me feito lón fénúfan. Iei úpwele feiló seni fénúfan me feiló ren ewe Sam.”
29 Néún kewe chón káé ra apasa: “Nengeni! Iei ka affataaló óm kapas me kese áeá kapas áwewe.
30 Iei áúa silei pwe ka silei mettóch meinisin me ese lamot án emén epwe kapas eis ngonuk. Ren ei áúa lúkú pwe ka feito seni Kot.”
31 Jises a pélúweniir: “Oua lúkú iei?
32 Úpwe erenikemi, ewe fansoun epwele waroto, lupwen emén me emén leimi epwe toropasfeil ngeni en me imwan me likitieiló lón ái ákkáláemén. Nge úse ákkáláemén, pún ewe Sam a nónnóm rei.
33 Úa apasa ngenikemi ekkeei mettóch, pwe pokiten ngang, epwe wor ámi kinamwe. Lón fénúfan epwe wor ámi riáfféú, nge oupwe tipepwora! Ngang úa fen okkufu fénúfan.”
