Me ren Jon 17:1-26
17 Mwirin án Jises apasa ekkena mettóch, a sachchetá láng me apasa: “Semei, a tori ewe fansoun. Kopwe elingaaló noum we pwe noum we epwe elingakoló,
2 ussun chék óm ngeni nemenem wóón aramas meinisin, pwe epwe fang manaw esemuch ngeni meinisin chókkewe ka fang ngeni i.
3 Iei ewe manaw esemuch, ar repwe sissileeló en,* ewe emén chék Kot mi enlet, pwal Jises Kraist ewe ka tiinaato.
4 Ngang úa fen elingakoló wóón fénúfan, úa áwesaaló ewe angang ka ngeniei ái úpwe féri.
5 Iwe, iei Semei, kopwe mut ngeniei úpwe nóm únúkkum me eáni ewe ling úa fen eáni me únúkkum me mwen fisitáán fénúfan.
6 “Ngang úa pwárfichieló* itom ngeni ekkewe aramas ka ngeniei me lón fénúfan. Iir noum, me en ka fang iir ngeniei, me ra álleasochisi óm kapas.
7 Iei ra silei pwe ekkewe mettóch meinisin ka ngeniei ra feito sonuk.
8 Pún úa ngeniir ekkewe kapas ka ngeniei me iir ra etiwer me ra wesewesen silei pwe úa feito ussun chón tupunuk, me ra lúkú pwe en ka tiinieito.
9 Ngang úa tingor fán iter. Úa tingor, esap fán iten fénúfan, nge fán iten chókkewe ka ngeniei, pokiten iir noum,
10 me mettóch meinisin mi nóm rei, óm, nge mettóch meinisin mi nóm reom, ái, me ngang úa fen kúna ling me leir.
11 “Úsapw chúen nóm wóón fénúfan, nge iir ra nónnóm wóón fénúfan, me ngang úpwele feiló reom. Semei mi Pin, kopwe mammaser fán ásengesin itom we, ewe ka ngeniei, pwe iir repwe eú* ussun chék kich sia eú.*
12 Lupwen úa nónnóm rer, úa kan mammaser fán ásengesin itom we, ewe ka ngeniei. Úa túmúnúúr me ese wor emén me leir a péútmwááliló, chilóón chék ewe néún kitetter pwe epwe pwénúetá ewe taropwe mi pin.
13 Nge iei úpwele feiló reom, me úa apasa ekkeei mettóch me lón fénúfan pwe repwe unusen meefi ewe pwapwa úa eáni.
14 Úa ngeniir óm kapas nge fénúfan a oput iir, pokiten iir rese peni ei fénúfan, ussun chék ngang úse peni ei fénúfan.
15 “Úse tingor óm kopwe angei iir seni lón fénúfan, nge óm kopwe mammaser pokiten ewe mi fókkun ngaw.
16 Iir rese peni fénúfan, ussun chék ngang úse peni fénúfan.
17 Kopwe epiniireló* ren ewe enlet, óm kapas mi enlet.
18 Ussun chék óm tiinieito ngeni fénúfan, ngang úa pwal tiiniireto ngeni fénúfan.
19 Me ngang úa pwisin epinieiló fán iter, pwe iir repwe pwal piniló ren ewe enlet.
20 “Úse chék tingor fán iter, nge fán iten meinisin chókkewe mi eáni lúkú lón ngang mwirin ar aúseling ngeni ar asukul,
21 pwe iir meinisin repwe eú, ussun chék en, Semei, ka tipeeú ngeniei me ngang úa tipeeú ngonuk, pwe repwe pwal tipeeú lón kich, pwe fénúfan epwe lúkú pwe en ka tiinieito.
22 Ngang úa ngeniir ewe ling ka ngeniei, pwe iir repwe eú ussun chék kich sia eú.
23 Ngang úa tipeeú ngeniir me en ka tipeeú ngeniei pwe repwe unuséchúló lón eú,* pwe fénúfan epwe silei pwe ka tiinieito me en ka tongeer ussun chék ka tongeei.
24 Semei, úa mochen pwe chókkewe ka ngeniei repwe nónnóm rei ia úa nóm ie pwe repwe kúna ái we ling ka ngeniei pokiten ka tongeei seni me mwen ewe atun aramas ra uputiw wóón fénúfan.
25 Semei mi Pwúng, ren enletin, fénúfan esaamwo silei en, nge ngang úa sileek, me ekkeei ra silei pwe en ka tiinieito.
26 Úa fen esilei ngeniir itom we me úpwe sópweeló le esilei, pwe ewe tong ka tongeei ren, epwe pwal nóm rer me ngang úpwe tipeeú ngeniir.”
Footnote
^ Are “akkangei ewe sile ussun en.”
^ Are “esilei.”
^ Are “tipeeú.”
^ Are “tipeeú.”
^ Are “áimuroló; féri ar repwe pin.”
^ Are “unusen tipeeú.”
