Me ren Jon 8:12-59
8 12 Mwirin, Jises a fóssefál ngeniir, a apasa: “Ngang ewe saramen fénúfan. Ié a tapwoto mwiri esap fókkun fetál lón kiroch, nge epwe eáni ewe saramen manaw.”
13 Iwe, ekkewe Farisi ra ereni: “Ka pwáraatá ussun pwisin en, óm pwáraatá ese enlet.”
14 Lón án Jises pélúweni a ereniir: “Ikáámwo úa pwáraatá ussun pwisin ngang, ái pwáraatá mi enlet pokiten úa silei ia úa feito me ie me ia ngang úpwe feiló ie. Nge ámi ouse silei ia úa feito me ie me ia úpwe feiló ie.
15 Ámi oua eáni apwúng me ren ekiekin aramas. Ngang úse apwúngú emén.
16 Nge ikáámwo úpwe féri apwúng, ái apwúng mi enlet, pokiten úse áláemén, nge ewe Sam mi tiinieito a etiei.
17 Pwal och, a mak lón pwisin ámi we Allúk: ‘Án rúúemén aramas pwáraatá mi enlet.’
18 Ngang ewe emén mi pwáraatá ussun pwisin ngang, me ewe Sam ewe mi tiinieito, a pwal pwáraatá ussun ngang.”
19 Mwirin, ra ereni: “Ifa i Semom na?” Jises a pélúweni: “Ámi ouse sileei are pwal silei Semei we. Iká oua sileei oupwe pwal silei Semei we.”
20 A apasa ekkeei kapas me lón ewe leeni ia ekkewe leenien asor ra nóm ie atun an asukul lón ewe imwenfel. Nge ese wor emén a turufi i pún esaamwo tori an fansoun.
21 Iwe, a pwal apasa ngeniir: “Ngang úpwe feiló, me oupwe kúttaei, nge ámi oupwe máló lón ámi tipis. Ikewe úpwe feiló ia, ousap tongeni feiló ie.”
22 Ekkewe chón Jus ra poputá le apasa: “Met, epwele pwisin nieló? Pún a apasa, ‘Ikewe úpwe feiló ia, ousap tongeni feiló ie.’ ”
23 A pwal ereniir: “Ámi seni fan, ngang seni asan. Ámi seni ei fénúfan, ngang esap seni ei fénúfan.
24 Ina popun úa apasa ngenikemi: Oupwe máló lón ámi tipis. Pún iká ouse lúkú pwe ngang ewe emén, oupwe máló lón ámi tipis.”
25 Iwe ra poputá le ereni: “En ié?” Jises a pélúweniir: “A lusmwáál ái fansoun ren ái fós ngenikemi.
26 A chómmóng met úpwe apasa fán itemi me féri kapwúng wóón. Ren enletin, ewe Emén mi tiinieito, mi enlet. Me ekkewe mettóch úa rongorong seni i, ikkena met úa apasa wóón fénúfan.”
27 Rese weweiti pwe a fós ngeniir ussun ewe Sam.
28 Iwe, Jises a apasa: “Mwirin ámi eitiwaatá ewe Néún aramas, oupwe silei pwe ngang i me úse féri och mettóch wóón pwisin ái, nge met chék ewe Sam a asukula ngeniei, úa apasa.
29 Me ewe Emén mi tiinieito a etiei. I ese péútieiló ái úpwe áláemén, pún fansoun meinisin úa féri ekkewe mettóch mi apwapwaai i.”
30 Atun a apasa ekkeei mettóch, chómmóng ra lúkú lón i.
31 Mwirin, Jises a apasa ngeni ekkewe chón Jus mi lúkú i: “Iká oupwe nónnóm lón ái kapas, ámi wesewesen nei chón káé,
32 me oupwe silei ewe enlet, me ewe enlet epwe angasakemiiló.”
33 Ra pélúweni i: “Ám mwirimwirin Eperiam me áúse fókkun slave ngeni emén. Iwe, pwata ka apasa, ‘Oupwe ngaseló’?”
34 Jises a pélúweniir: “Enlet úpwe erenikemi, ié mi féfféri tipis, i a slave ngeni tipis.
35 Pwal och, ewe slave esap nónnóm lón imwen ewe masta tori feilfeiló, nge néún ewe masta we epwe nónnóm tori feilfeiló chék.
36 Iwe, iká ewe Naw a angasakemiiló, ámi oupwe wesewesen ngaseló.
37 Ngang mi silei pwe ámi mwirimwirin Eperiam. Nge ámi oua kúkkúttaei pwe oupwe nieiló pokiten ouse etiwa minne úa asukula.
38 Úa kapas ussun ekkewe mettóch úa kúna atun úa nóm ren Semei, nge ámi oua féri ekkewe mettóch oua rong seni sememi we.”
39 Lón ar pélúweni ra ereni: “Semem Eperiam.” Jises a ereniir: “Iká ámi néún Eperiam, oupwe áppirú án Eperiam leenien áppirú.
40 Nge iei oua kúttaei pwe oupwe nieiló, ngang ewe mi erenikemi ewe enlet úa rong seni Kot. Eperiam ese féri ei.
41 Ámi oua féfféri angangen sememi we.” Ra ereni: “Áúse uputiw seni lisowumwáál,* a wor emén Semem, Kot.”
42 Jises a ereniir: “Iká pwe Kot Sememi, iwe oupwe tongeei, pún úa feito seni Kot, me iei úa nóm ikeei. Ngang úse feito wóón pwisin ái, nge ena Emén a tiinieito.
43 Pwata ouse weweiti met úa apasa? Pokiten ámi ouse tongeni aúseling ngeni ái kapas.
44 Ámi seni sememi ewe Tefil, me oua tipeni le féri mochenin sememi na. Ena emén, i chón nimanaw seni me lepoputáán, me i ese núkúchar lón ewe enlet pokiten enlet ese nónnóm lón i. Lupwen a kapas chofona, a kapas seni pwisin éérenian, pún i emén chón chofona me semen chofona.
45 Nge ngang, pokiten úa erenikemi ewe enlet, ámi ouse lúkúei.
46 Ié me leimi a tongeni ánnetatá pwe ngang úa tipis? Iká úa kapas mi enlet, pwata ouse lúkúei?
47 Ewe emén mi feito seni Kot a aúseling ngeni án Kot kapas. Iei popun ouse aúseling, pún ámi ouse feito seni Kot.”
48 Lón án ekkewe chón Jus pélúweni ra ereni: “Ese pwúng ám apasa, ‘En emén chón Sameria me a wor emén timon wóóm’?”
49 Jises a pélúweni: “Ese wor emén timon wóói, nge úa asamolu Semei we, me ámi ouse asamoluei.
50 Nge ngang úse kútta pwisin lingei. Mi wor Emén mi kútta me i ewe soukapwúng.
51 Enlet úpwe erenikemi, iká emén a álleasochisi ái kapas, i esap fókkun máló.”
52 Ekkewe chón Jus ra ereni: “Iei áúa silei pwe mi wor emén timon wóóm. Eperiam a máló, pwal ekkewe soufós, nge en ka apasa, ‘Iká emén a álleasochisi ái kapas, i esap fókkun máló.’
53 Ka ekieki pwe ka lap seni semem we Eperiam, ewe a máló? Ekkewe soufós ra pwal máló. Ié ka erá pwe en?”
54 Jises a pélúweni: “Iká úpwe elingaaló pwisin ngang, ese wor lamoten ái ling. Semei we, i ewe a elingaeiló, ewe emén oua erá pwe ámi Kot.
55 Nge ámi ouse silei i, nge ngang úa silei i. Me iká úpwe erá pwe úse silei i, ngang úpwe chék ussumi, emén chón chofona. Nge ngang úa silei i me úa álleasochisi an kapas.
56 Sememi we Eperiam a fókkun pwapwa le ésúkúsúkú an epwe kúna ái we rán, iwe a kúna me pwapwa.”
57 Mwirin, ekkewe chón Jus ra ereni: “Esaamwo 50 ierum, nge ka fen kúna Eperiam?”
58 Jises a ereniir: “Enlet úpwe erenikemi, me mwen án Eperiam epwe fis, ngang úa fen nóm.”
59 Iwe, ra angetiwei ekkewe faw pwe repwe mane ngeni Jises, nge a op me a towu seni ewe imwenfel.
