Ngeni Ekkewe Chón Kalesia 5:1-26
5 Sia eáni ena esin ngas pún Kraist a angasakicheló. Ina minne, oupwe úppós, me ousap chúen atolongakemi lón angangen slave.
2 Nengeni! Ngang Paul, úpwe erenikemi pwe iká oupwe sirikomsais, iwe minne Kraist a féri epwe lamotongaw ngenikemi.
3 Úpwe áchchemasefálli ngeni meinisin ekkewe mwán repwe sirikomsais pwe repwe álleasochisi unusen ewe Allúk.
4 Ámi kana mi sótun le kúna pwúng me ren ewe allúk, oua áimu seni Kraist. Oua fen nóm lúkún an kirekiréch mi somwoló.
5 Nge ren kich, sia fókkun witiwiti ewe ápilúkúlúkún pwúng ren ewe ngún mi fel me ach lúkú.
6 Pún ese chúen wor lamoten sirikomsais are esap sirikomsais ngeni néún Kraist Jises chón káé, nge ewe a aúchea, ewe lúkú mi pwá lón tong.
7 Ámi sássá a múrinné. Ié a eppetikemi le sópwósópwoló lón ámi álleasochisi ewe enlet?
8 Ei sókkun etipetip ese feito seni ewe Emén mi kékkérikemi.
9 Ekis chék iis a apwotáái unusen ewe pilawa mi éúwéú.
10 Úa lúkúlúk pwe ámi néún ewe Samol chón káé, ousap eáni ena ekiek. Nge ewe emén mi aosukosukakemi, ese lifilifil iká i ié, epwe angei ewe kapwúng mi fich ngeni.
11 Nge ren ngang, pwii kana, iká úa chúen afalafal ussun sirikomsais, pwata úa chúen kúna riáfféúmwáál? Iká ina, iwe esap chúen wor epwe chepetek ren ewe iráán ninni.*
12 Úa áneán pwe ekkewe mwán mi sótun aosukosukakemi repwe pwal mwo nge pékú seniir minne mi atufichiir le néúnéú.
13 Ámi pwii kana, oua ké ngeni ngaseló. Amwo ousap áeá ei ngaseló pwe alen ámi féri mochenin futuk, nge fán tong oupwe slave ngeni emén me emén leimi.
14 Pún unusen ewe Allúk a nóm lón chék ei eú allúk: “Kopwe tongei chón órum ussun óm tongei pwisin en.”
15 Iwe nge, iká oupwe sópweeló le ámetekifengenikemi me eriáfféwúfengenikemi, oupwe túmúnú pwe oute pwisin arosafengenikemiiló.
16 Nge ngang úa apasa, Oupwe feffetál fán emmwenien ewe ngún mi fel, iwe ousap fókkun féri mochenian futuk.
17 Pún mochenin futuk a ú ngeni ewe ngún mi fel, me ewe ngún mi fel a ú ngeni mochenin futuk. Ekkeei ruu ra ú fengen, ina minne ouse féri ekkewe mettóch oua mochen féri.
18 Pwal och, iká ewe ngún mi fel a emmwenikemi, ámi ouse nóm fán allúk.
19 Iwe, a pwápwááló ekkewe angangen futuk. Ikkeei, lisowumwáál,* limengaw, angolossá,*
20 fel ngeni uluulun, angangen roong, koput, koum, ekiekingaw,* songongaw, aapangaw, tipefesen, kinikinfesen,
21 lólówó, únnúpuch, pari mi ngaw, me ekkewe mettóch ussun pwal ekkeei. Úpwe éúréúrasefálikemi ussun ekkeei mettóch, ussun úa fen éúréúrakemi me lóóm, pún chókkewe mi féfféri ekkena mettóch resap álemwiri ewe Mwúún Kot.
22 Nge uwaan ewe ngún mi fel, tong, pwapwa, kinamwe, mosonottam, kirekiréch, múrinné, lúkú,
23 tipepwetete, nemeni pwisin mochenich. Ese wor och allúk mi ú ngeni ekkeei mettóch.
24 Pwal och, chókkewe iir néún Kraist Jises ra fen chúfélúetá wóón ewe irá ewe futuk fengen me tipan me mochenin kewe.
25 Iká sia manaw fán emmwenien ewe ngún mi fel, ousipwe sópweeló le manaweni manawach fán emmwenien ena ngún mi fel.
26 Sisap lamalamtekia, okkuffengen lefilach, lólówófengen lefilach.
Footnote
^ Ei a wewe ngeni án emén song pokiten an lólówó ren och mettóch are ekiekingaw ussun emén.
