Ngeni Ekkewe Chón Kalesia 6:1-18
6 Ámi pwii kana, iká emén epwele ttur lón tipis me mwen an epwe tepereni, ámi ekkewe mi nóm fán emmwenien ewe ngún mi fel oupwe achocho le áwena ena sókkun aramas fán tipepwetete. Nge oupwe pwisin túmúnúkemi pwe oute pwal tolong lón sóssót.
2 Oupwe sópweeló le uweifengenni osemi wosochou, iká oua ina ussun oupwe apwénúetá ewe allúkún Kraist.
3 Pún iká emén a ekieki pwe i emén mi aúchea nge ese, iwe a otupu pwisin i.
4 Nge emén me emén epwe pwisin etittina féfférún kewe, iwe mwirin epwe wor popun an epwe pwapwa ren minne a féri, nge esap ren an aléllééi pwisin i ngeni pwal emén.
5 Pún emén me emén epwe pwisin mwárei osan.
6 Pwal och, emén mi káé ewe kapas epwe fang ekkewe mettóch meinisin mi múrinné ngeni ewe emén mi wisen áiti.
7 Ousap pwisin otupukemi: Kot ese tongeni tupuló. Pún met emén a fótuki, ina met epwe pwal kini.
8 Pún emén mi fóffót ren futuk epwe kini máló ewe mi pop seni futukan, nge emén mi fóffót ren ewe ngún mi fel epwe kini manaw esemuch ewe mi pop seni ngún mi fel.
9 Ina minne, sisap fangetá le féri minne mi múrinné, pún sipwe kinikin lón ewe fansoun mi kefilitá iká sise achanú.*
10 Iwe, atun mi suuk ngenikich,* sipwe féri minne mi múrinné ngeni aramas meinisin, nge ákkáeúin ngeni chókkewe mi riri ngenikich lón ewe lúkú.
11 Oupwe katol úkúúkún mese watteen ekkeei mesen mak úa makkeei ngenikemi ren pwisin pei.
12 Chókkewe meinisin mi mochen eingeing lón futuk,* iir ekkewe ra mochen sótun eriánikemi ámi oupwe sirikomsais. Ra chék féri ena pwe resap tolong lón riáfféúmwáál fán ásengesin ewe iráán ninni* án Kraist.
13 Pún pwal mwo nge chókkewe mi sirikomsais rese pwisin álleasochisi ewe Allúk, nge ra mochen oupwe sirikomsais pwe repwe tongeni eingeing wóón minne a fis ngeni inisimi.
14 Nge amwo itá úsapw fókkun eingeing, chilóón chék wóón ewe iráán ninni* án ach Samol Jises Kraist, ren an máló, ewe fénúfan a máló me rei, nge ngang úa máló me ren ewe fénúfan.
15 Pún ese lamot sirikomsais are ese sirikomsais. Nge ewe mi wesewesen lamot, ina án Kot aséfésefálikemi.
16 Kinamwe me úméúméch epwe nónnóm wóón meinisin chókkewe mi manaweni manawer fán emmwenien ena kapasen emmwen, ewer, wóón ewe Israelin Kot.
17 Seni ikenái feiló esap chúen wor emén epwe aosukosukaei, pún a nóm wóón inisi lemóón kinás mi esissillatá pwe ngang emén néún Jises slave.
18 Ámi pwii kana, amwo án ach Samol Jises Kraist kirekiréch mi somwoló epwe nónnóm remi atun oua pwáári ekkewe napanap mi múrinné. Amen.
