Taropwe Ngeni Ekkewe Chón Kolose 1:1-29
1 Paul, emén néún Kraist Jises aposel fán letipen Kot, me pwiich Timoty,
2 ngeni ekkewe chón pin me pwiich kewe mi túppwél iir néún Kraist chón káé lón Kolose:
Amwo ewe kirekiréch mi somwoló me kinamwe seni Semach Kot, epwe nónnóm remi.
3 Atun áúa iótekikemi, fansoun meinisin áúa kilisou ngeni Kot, Semen ach Samol Jises Kraist,
4 pún áúa rong ussun ámi lúkú lón Kraist Jises me ámi tongei meinisin ekkewe chón pin
5 pokiten ewe ápilúkúlúk mi fen káimuuló fán itemi lón láng. Oua fen rong ussun ei ápilúkúlúk seni ewe pwóróus mi enlet ussun ewe kapas allim
6 a fen torikemi. Ussun chék án ewe kapas allim ukkuwa me chéúló wóón unusen fénúfan, ina pwal ussun met a fis leimi seni ewe rán oua rong me silefichi enletin án Kot kirekiréch mi somwoló.
7 Ina met oua káé seni chienach we chón angang mi áchengicheng, Epafras, néún Kraist we chón angang mi túppwél fán ásengesich.
8 A pwal erenikem pwe ewe ngún mi fel a álisikemi le pwáári tong.
9 Ina pwal ewe popun seni ewe rán áúa rong ussun, áúse fókkun úkútiw le iótek fán itemi me tingor pwe amwo oupwe ur ren ewe sile mi enlet ussun letipan fitifengen me meinisin tipáchem me tufichin weweiti, ewe án Kot ngún mi fel a fang,
10 pwe oupwe tongeni manaweni ewe manaw mi fich ngeni iten Jiowa* me unusen apwapwaai i lón ámi ukkuwa lón iteiten angang múrinné meinisin me akkalapaaló ámi sile mi enlet ussun Kot.
11 Iwe, amwo oupwe fókkun péchékkúletá pwe oupwe tongeni unusen likiitú fiti mosonottam me pwapwa pokiten an we manaman mi lapalap.
12 Oupwe pwal kilisou ngeni Kot ewe Sam. Pún i a ammólnakemiitá ámi oupwe angei ewe álemwir. Ena álemwir ina álemwirien ekkewe chón pin mi nóm lón saram.
13 I a selánikich seni fán nemenien rochopwak me atolongakich lón mwúún Néún we mi áchengicheng.
14 Pokiten Néún we, sia ngaseló ren ewe méén kepich, me sia kúna omusomusen ach kewe tipis.
15 I a mwirifichi ewe Kot sise tongeni kúna, i mwánichien férian kewe meinisin,
16 pún ren i, meinisin ekkewe ekkóch mettóch ra fférútá lón láng me wóón fénúfan, ekkewe mettóch aramas ra tongeni kúna me ekkewe mettóch rese tongeni kúna, ese lifilifil iká ekkewe leenien móótun king are samol are mwú are nemenem. Meinisin ekkewe ekkóch mettóch ra ffér ren i me fán itan.
17 Pwal och, i a akkomw mwen mettóch meinisin, me ren i, meinisin ekkewe pwal ekkóch mettóch ra fférútá,
18 me i mékúren ewe inis, ewe mwichefel. I ewe poputáán, ewe áeménún mi manawetá seni máló, pwe epwe wiliiti ewe emén mi akkomw mwen mettóch meinisin,
19 pokiten Kot a pwapwa le féri mettóch meinisin pwe repwe unusoló lón ena emén,
20 pwal ren i a áchásefálli ngeni pwisin I meinisin ekkewe ekkóch mettóch ren an awora kinamwe ren ewe chcha a ninaaló wóón ewe iráán ninni,* ese lifilifil iká ekkewe mettóch wóón fénúfan are ekkewe mettóch lón láng.
21 Iwe, me lóóm oua chón koputen Kot me towawoló seni i pokiten ekiekimi a fót wóón ekkewe féffér mi ngaw,
22 nge iei a fen áchásefálikemi ngeni pwisin i ren inisin ewe emén mi fangoló pwisin i ngeni máló, pwe ren ei mettóch oupwe pin mwen mesan, esap wor terimi, me esap wor met emén epwe tipi ngenikemi wóón—
23 iwe nge, a lamot ámi oupwe sópweeló lón ewe lúkú, oupwe núkúcharetiw wóón ewe lóngólóng me úppós, ousap tokkoló seni ewe ápilúkúlúk ussun ewe kapas allim oua rong me afalafala wóón unusen fénúfan. Ngang Paul, úa wiliiti chón angangen ei kapas allim.
24 Iei úa pwapwa lón ái kewe riáfféú fán itemi, me úa kúna riáfféú ussun chék Kraist, nge a chúen lamot ái úpwe ounusaaló ena riáfféú fán ásengesin inisin Kraist we, ina ewe mwichefel.
25 Ngang úa angang ngeni néún Kot kewe aramas pokiten i a ewisa ngeniei, me fán iten feiéchúmi. Iei popun úa afalafala ewe kapasen Kot ren úkúúkún ái tongeni,
26 ewe monomonun Kot mi opoló seni ewe ótóten fénúfan lóóm me seni ewe táppin aramas lóóm. Nge iei a fen pwápwááló ngeni néún kewe chón pin,
27 ewe Kot a mochen epwe esilei ngeni ekkewe chón pin seni ekkewe ekkóch mwú lingen wéún, ewe monomonun Kot—pwe Kraist a fitikemi, weween pwe a wor ámi ápilúkúlúk le fiti lón an we ling.
28 I ewe sia arongafeili ussun, me sia fénéú me asukula aramas ren tipáchem meinisin pún repwe silei Kraist, pwe meinisin chókkewe sipwe emmweniireto ngeni Kot, repwe chón tapweló mwirin Kraist me ásimawóló.
29 Iei minne, úa unusen angang weires, úa fókkun achocho ren an we péchékkúl mi fókkun akkangang lón ngang.
