Taropwe Ngeni Ekkewe Chón Kolose 4:1-18
4 Ámi kana masta, oupwe eáni féffér mi pwúng me féfféréch ngeni néúmi kewe slave, pún oua silei pwe mi pwal wor emén néúmi Masta lón láng.
2 Oupwe likiitú le ikkiótek, ousap tunaaló ámi oupwe iótek fiti kilisou.
3 Oupwe pwal iótek fán item, pwe Kot epwe tongeni suuki ngenikem eú asam fán iten ewe kapas pwe áúpwe tongeni esilefeili ewe monomonun Kot ussun ewe Kraist, ewe úa kalapus fán itan,
4 me úpwe tongeni esilefeili fán fataffatéch pún ina met mi fich ái úpwe féri.
5 A lamot oupwe eáni tipáchem lón ámi manaweni manawemi atun oua nóm ren chókkewe esap iir chón ewe mwichefel. Oupwe alamotaéchú ámi fansoun.
6 Fansoun meinisin ámi kapas epwe pwetete, ussun och mwéngé mi anné ren an nofit ngeni salt, pwe oupwe tongeni silei met oupwe pélúwen ngeni emén me emén.
7 Tikikos, pwii we mi áchengicheng me chón afalafal mi túppwél me chienei chón angang lón ewe Samol, epwe erenikemi meinisin pwóróusei.
8 Úa tiinaaló i ngenikemi pwe oupwe silei pwóróusem me epwe tongeni oururu letipemi.
9 Iir me Onesimus, pwii we mi túppwél me áchengicheng, ewe a feito me leimi, repwe apwóróusa ngenikemi meinisin met a kan fiffis ikeei.
10 Aristarkus, chiechiei chón kalapus, a tiinaaló an kapwong ngenikemi, pwal Mark, tettelin pwiin Parnapas we (ewe áúa fósun ámi oupwe etiwa iká a etto remi),
11 pwal Jises ewe mi iteni Justus, emén me lein chókkewe mi sirikomsais. Ikkeei iir chék chiechiei kewe chón angang fán iten ewe Mwúún Kot, me iir ra fókkun oururuei.*
12 Epafras, emén néún Kraist Jises slave mi feito me leimi, a tiinaaló an kapwong ngenikemi. Fansoun meinisin a achocho le iótek fán ásengesimi pwe oupwe tongeni sópwósópwoló le úppós me núkúchar lón ámi lúkú mettóch meinisin ussun letipen Kot.
13 Pún ngang úa pwáraatá pwe i a fókkun achocho fán itemi me fán iten chókkewe mi nóm lón Leotisia me Ierapolis.
14 Luk, ewe tokter mi áchengicheng, me Timas ra tiinaaló ar kapwong ngenikemi.
15 Oupwe uwei ái kapwong ngeni pwiich kewe lón Leotisia me ngeni Nimfa me ngeni chón ewe mwichefel mi mwichfengen lón imwan we.
16 Iwe, lupwen a álleawu ei taropwe leimi, oupwe pwal akkóta an epwe álleawu lón ewe mwichefelin Leotisia me ámi oupwe pwal álleani ewe taropwe mi tiitiiló ngeni chón Leotisia.
17 Oupwe pwal ereni Arkipus: “Kopwe sópweeló óm achocho le apwénúetá ewe angang ka angei seni ewe Samol.”
18 Ngang Paul, úa makkeei ei kapwong wóón pwisin pei. Oupwe chechchemeni ái fétek lón kalapus. Amwo ewe kirekiréch mi somwoló epwe nónnóm remi.
Footnote
^ Are “minen apéchékkúl ngeniei.”
