Me ren Luk 13:1-35
13 Lón ena atun ekkóch mi nóm ikena ra apwóróusa ngeni pwe Pailat a nieló ekkewe chón Kalili, ekkewe ra asoratá ar asor.
2 Lón an pélúweni, a ereniir: “Oua ekieki pwe ekkena chón Kalili ra máló pokiten ra kon tipis seni meinisin chón Kalili?
3 Úa erenikemi, aapw, nge iká ousap áier, ámi meinisin oupwe máló ussun chék iir.
4 Are, ekkewe engol me wanimén ewe imw tekia lón Siloam a turuitiir me nireló, oua ekieki pwe a kon watte ar tipis lap seni meinisin ekkewe pwal ekkóch aramas mi nónnóm lón Jerusalem?
5 Úa erenikemi, aapw, nge iká ousap áier, ámi meinisin oupwe máló ussun chék iir.”
6 Mwirin, a eáni ei kapas áwewe: “Emén mwán mi wor efóch fótan irá fiik mi ffót lón an we tánipiin kreip, me a ló katol iká mi wor uwaan, nge ese kúna och.
7 Iwe, a ereni ewe chón túmúnú ewe tánipiin kreip, ‘A fen úlúngát ier iei úa feito pwe úpwe ppii iká a wor uwaan ei irá fiik, nge úse kúna och. Kopwe pékúetiw! Pwata a alamotongawa ei pwúl?’
8 Lón an pélúweni a ereni, ‘Masta, sipwe witiwitiló pwal eú ier. Úpwe ttuu únúkkún me koiasini.
9 Iká epwe uwa lón mwach, iwe a múrinné, nge iká esap, iwe epwe pékúpékútiw.’ ”
10 Iwe, a asukul lón eú me lein ekkewe sinakok lón Sapat.
11 Nge nengeni! emén fefin a nóm ikena mi wor ngún mi ngaw wóón mi esemweni ren 18 ier, me i a pwórfengen me ese fókkun tongeni wenetá.
12 Lupwen Jises a kúna, a fós ngeni me erá: “Fefin, ka ngaseló seni óm apwangapwang.”
13 Iwe, a isettá péún wóón neminna, me mwittir chék a wenetá me poputá le elingaaló Kot.
14 Nge ewe néúwisin sinakok a song pokiten Jises a féri angangen echikara lón Sapat, iwe a ereni ewe mwichen aramas: “A wor wonu rán a tongeni fis angang lón, iwe lón ekkena chék rán oua tongeni tingor ámi oupwe chikar, nge esap lón ewe ránin Sapat.”
15 Iwe nge, ewe Samol a pélúwen ngeni i: “Ámi mi likótuputup, esap pwe lón Sapat emén me emén leimi a epichi néún kou are néún aas seni me lón leenian we me emmwenaaló pwe epwe ngeni met epwe únúmi?
16 Esap pwe mi fich án ei fefin, néún Eperiam me ewe Setan a fééti ren úkúúkún 18 ier, epwe ngaseló seni féféén ei lón ewe ránin Sapat?”
17 Iwe, atun an apasa ekkeei mettóch, meinisin ekkewe mi ú ngeni ra poputá le meefi sáw, nge unusen ewe mwichen aramas ra poputá le pwapwaiti meinisin ekkewe mettóch mi amwarar a féri.
18 Iwe, a sópweeló le apasa: “Met ewe Mwúún Kot a ussun, me met úa tongeni apépé ngeni?
19 A ussun chék eféú féúkúkkúnún pwikil* emén mwán a angei me fótuki lón an we tánipi, iwe a mááritá me wiliiti efóch irá, me ekkewe machchang fán láng ra fás wóón palan kewe.”
20 Me a pwal apasa: “Met úa tongeni apépééi ewe Mwúún Kot ngeni?
21 A ussun iis emén fefin a angei me nofiti ngeni 22 paun pilawa mi ámás tori án unusen ewe pilawa a pwootá.”
22 Lón án Jises sái ngeni Jerusalem, a asukula aramas seni telinimw ngeni telinimw me seni sóópw ngeni sóópw.
23 Iwe, emén mwán a ereni: “Samol, chókkewe mi kúna manaw, ra chókúkkún?” A ereniir:
24 “Oupwe éttúres ren unusen ámi péchékkúl pwe oupwe tolong lón ewe asam mi pwangekúkkún, pún úa erenikemi, chómmóng repwe achocho le tolong lón, nge resap tongeni.
25 Lupwen ewe chón imw a pwáátá me lokeeló ewe asam, oupwe útá lúkún me fichifich wóón ewe asam me apasa, ‘Samol, kopwe suuk ngenikem.’ Nge lón an pélúweni, epwe erenikemi: ‘Úse silei iká ámi seni ia.’
26 Mwirin, oupwe poputá le apasa, ‘Áúa mwéngé me ún mwen mesom, me ka asukul wóón alelapem kewe.’
27 Nge epwe erenikemi, ‘Ngang úse silei iká ámi seni ia. Oupwe sú seniei, ámi meinisin chón féfféringaw!’
28 Me ikena ie, oupwe kechiw me akkarúngi ie, atun oupwe kúna Eperiam, Aisek, Jekop, me meinisin ekkewe soufós lón ewe Mwúún Kot, nge pwisin ámi oupwe kóturuwu lúkún.
29 Pwal och, aramas repwe feito seni éétiw me notou me seni ennefen me éér, me repwe móót* ren ewe cheepel lón ewe Mwúún Kot.
30 Me nengeni! epwe wor chókkewe mi kukumwir repwe akkomw, me epwe wor chókkewe mi akkomw repwe kukumwir.”
31 Lón chék ena kulók, ekkóch me lein ekkewe Farisi ra feito me ereni: “Kopwe towu me ló seni ikeei ie pún Erot a mochen nikoló.”
32 Me a ereniir: “Oupwe feiló me ereni ena foks, ‘Nengeni! Úa atowu ekkewe timon me echikaraatá ekkewe aramas ikenái me lesor, me lón ewe aúlúngátin rán úpwe wes.’
33 Iwe nge, úpwe sópweeló ái angang ikenái, lesor, me ewe rán mwirin, pún ese tongeni* pwe emén soufós epwe ninniiló lúkún Jerusalem.
34 Jerusalem, Jerusalem, ewe chón nieló ekkewe soufós me chón manei faw ngeni chókkewe mi tiitiiló reom. A fán fite úa mochen ochufengenni noum kewe ussun án emén inelapen chukó ionifengeni etelin fán péúkásin kewe! Nge ámi ouse mochen.
35 Nengeni! Kot epwe likitaaló* ámi imwenfel.* Úa erenikemi, ousap fókkun chúen kúnaei tori ámi oupwe apasa, ‘Mi feiéch ewe emén mi feito lón iten Jiowa!’ ”*
Footnote
^ Are “eféú pwikil itan mustard,” eféú pwikil mi pwá me lón Israel mi tongeni mááritá ina epwe 15 ft ttaman me a chómmóng palan.
^ Are “móót tiwiniin.”
^ Are “ese tufich.”
^ Are ese mwáál, “likit ngenikemi nge a péén.”
^ Krik, “imwemi.”
