Me ren Luk 14:1-35
14 Lón pwal eú atun, a ló mwéngé lón imwen emén me lein ekkewe meilapen Farisi lón ewe Sapat, me ra akkattolafichi i.
2 Nge nengeni! emén mwán a nóm mwen mesan mi úri eú semmwen mi efisi án péún me pechen repwe pwootá.
3 Iwe, Jises a eisini chókkewe mi silefichi ewe Allúk me ekkewe Farisi: “Mi mumutá me lón ewe allúk án emén epwe echikaraatá mi semmwen lón Sapat are ese?”
4 Nge ra chék fanafaneló. Ren ena, a attapa ewe mwán, echikara i, me tiinaaló.
5 Iwe a ereniir: “Ié me leimi, iká néún át are kou a turulong lón eú ito lón ránin Sapat, nge esap mwittir efietá?”
6 Me rese tongeni pélúweni ei.
7 Mwirin, a ereni ekkewe aramas mi ketiw eú kapas áwewe atun a kúna ar filaatá fán iter ekkewe leeni fán iten waséla mi iteféúló. A ereniir:
8 “Lupwen emén a etiwok ngeni eú kametipen apwúpwúlú, kosap móttiw* wóón ewe leeni fán iten waséla mi iteféúló. Neman emén mi iteféúló sonuk a pwal ketiw.
9 Mwirin, ewe emén mi etiwakemi me rúúemén epwe feito me erenuk, ‘Kopwe ngeni ei mwán leeniom na.’ Mwirin, kopwele sáw le ló ngeni ewe leeni mi tekisosson.
10 Nge lupwen kopwe ketiw, feiló me móttiw lón ewe leeni mi tekisosson, pwe atun ewe emén mi etiwok a feito, epwe erenuk, ‘Pwipwi, feito lón ei leeni mi múrinné.’ Iwe, kopwe kúna ésúúfél mwen mesen chienom kewe waséla meinisin.
11 Pún ié a átekiatáái pwisin i epwe tekisonetiw, me ié a átekisonatiw pwisin i epwe tekiatá.”
12 Mwirin, a pwal ereni ewe mwán mi etiwa i: “Atun kopwe féri eú mwéngéén leolowas are lekuniol, kosap kékkéri chiechiom kewe are pwiium kewe are aramasom kewe are chón órum mi pisekisek. Pún iká ina, neman repwe pwal liiwini ren ar etiwok, me epwe ussun eú minen liiwin ngonuk.
13 Nge atun kopwe féri eú kametip, kopwe etiwa mi wéúngaw, mi ter, mi pechemá, mi chuun,
14 me kopwe pwapwa pokiten esap wor met repwe liiwini ngonuk. Pún kopwe angei liiwinum lón manawsefálin ekkewe mi pwúng.”
15 Atun emén me lein chienan kewe waséla a rong ekkeei mettóch, a ereni: “A pwapwa ewe emén mi mwéngé* lón ewe Mwúún Kot.”
16 Jises a ereni: “Emén aramas a féri eú watteen mwéngéén lekuniol, me a etiwa chómmóng.
17 A tiinaaló néún we slave lón kulókun ewe mwéngéén lekuniol an epwe ereni ekkewe mi ketiw, ‘Oupwe feito, pún mettóch meinisin iei a mmólnetá.’
18 Nge iir meinisin ra chék taitap le poputá kúnetipingen fetál. Ewe áeménún a ereni, ‘Úa mééni eú tánipi me a lamot úpwe feiló me katol, úa tingoreek kopwe omusaeiló.’
19 Me pwal emén a erá, ‘Úa mééni engol kou* me úpwe ló chekiir, úa tingoreek kopwe omusaeiló.’
20 Pwal emén a apasa, ‘Úa chék kerán apwúpwúlú, iwe ren ei popun úsapw tongeni feiló.’
21 Iwe, ewe slave a feiló me apwóróusa ekkeei mettóch ngeni néún we masta. Iwe, ewe mastaan imw a song me ereni néún we slave, ‘Mwittir feiló ngeni ekkewe alelap me ekkewe al chékis lón ewe telinimw, me uweato ikeei iir mi wéúngaw me ter me chuun me pechemá.’
22 Lupwen ewe slave a liwinsefál a apasa, ‘Masta, minne ka allúkú a fen wes, me a chúen wor leeni.’
23 Iwe, ewe masta a ereni ewe slave, ‘Kopwe feiló ngeni ekkewe pwal ekkóch al lúkún ewe telinimw me pesei ekkewe aramas ar repwe feito pwe imwei epwe ur.
24 Pún úa erenikemi, ese wor emén me lein chókkewe mi ketiw me akkomwan epwe neni ái ei mwéngéén lekuniol.’ ”
25 Iwe, eú mwichemmóngun aramas ra fitaaló, me a kul me apasa ngeniir:
26 “Iká emén epwe feito rei nge a lap an tongei seman me inan me pwúlúwan me néún me pwiin me fefinan, ewer, pwal mwo pwisin manawan lap seniei, esap tongeni epwe nei chón káé.
27 Ié esap uwei an iráán ninni* me tapwoto mwiri esap tongeni epwe nei chón káé.
28 Áwewe chék, ié me leimi mi mochen aúetá eú imw tekia esap akkomw móttiw me apacha úkúúkún méméén pwe epwe ppii iká epwe naf an epwe áwesaaló?
29 Pún iká esap ina ussun, neman epwe féri lóngólóngun nge esap tongeni áwesaaló, me meinisin mi nennengeni repwe poputá le esiita i,
30 me apasa: ‘Ei aramas a poputá le kaú nge ese tongeni áwesaaló.’
31 Are menni king epwe feiló ngeni pwal emén king lón maun nge esap akkomw móttiw me kútta éúréúr iká epwe tongeni win fán 10,000 soufiu lón an maun ngeni ewe emén epwe feito fán 20,000?
32 Ren enletin, iká esap tongeni féri ena, iwe atun ena emén a chúen towaw seni, epwe tiinaaló kúmiin chón tupuni me tingor kinamwe.
33 Pwal ina chék ussun, oupwe chechchemeni pwe iká emén me leimi esap likitaaló pisekin meinisin, i esap tongeni nei chón káé.
34 “Ren enletin, salt a múrinné. Nge iká ewe salt a nepateló, ifa ussun an epwe nekensefál?
35 Esap éch ngeni ewe pwúl are ewe koiasi. Aramas ra maneló. Emén mi wor selingan an epwe aúseling, epwe aúseling.”
