Me ren Luk 18:1-43
-
Kapas áwewe ussun emén fefin mi má seni pwúlúwan mi kan tittingorei ewe soukapwúng (1-8)
-
Ewe Farisi me ewe chón angei takises (9-14)
-
Jises me ekkewe semirit (15-17)
-
Án ewe sounemenem mi pisekisek kapas eis (18-30)
-
Jises a oesinisefál ussun an máló (31-34)
-
Emén soutingor mi chuun a kúnasefáli (35-43)
18 Mwirin, a apwóróusa ngeniir eú kapas áwewe ussun lamoten ar repwe iótek iteitan me resap fangetá,
2 a apasa: “Lón eú telinimw, a wor emén soukapwúng ese niwokkusiti Kot me ese súféliti aramas.
3 A pwal wor emén fefin mi má seni pwúlúwan lón ena telinimw a soun feiló ren me apasa, ‘Kopwe eáni kapwúng fán pwúng lefilem me ewe chón ú ngeniei.’
4 Ren och fansoun, ese mochen, nge mwirin a apasa ngeni pwisin i, ‘Inaamwo iká úse niwokkusiti Kot are súféliti aramas,
5 nge pokiten án ei fefin mi má seni pwúlúwan soun aosukosukaei, úpwe túmúnú pwe epwe kapwúng fán pwúng pwe esap chúen ekketto me echipwangaei ren an tingor.’ ”*
6 Mwirin ewe Samol a apasa: “Ikáámwo ewe soukapwúng ese pwúng, oua rong met a erá?
7 Nge met, esap pwe Kot epwe efisi kapwúng mi pwúng fán iten néún kewe mi filitá, ekkewe mi kékkéri i lerán me lepwin, lón ewe atun a mosonottam ngeniir?
8 Úa erenikemi, i epwe mwittir efisi kapwúng mi pwúng fán iter. Iwe nge, atun ewe Néún aramas epwe war, i epwe wesewesen kúna ei lúkú* wóón fénúfan?”
9 I a pwal apwóróusa ei kapas áwewe ngeni chókkewe mi lúkúlúkú pwe iir ra pwúng me ekieki pwe ese wor aúchean ekkewe ekkóch:
10 “Rúúemén mwán ra feitá ngeni ewe imwenfel pwe repwe iótek, ewe emén i Farisi me ewe pwal emén i chón angei takises.
11 Ewe Farisi a útá me poputá le ióteki lón letipan ekkeei mettóch, ‘Kot, úa kilisou ngonuk ren ái úse ussun ekkewe ekkóch, ekkewe chón kafang, ekkewe rese wenechar, chón lisowumwáál, are pwal mwo nge ussun ei chón angei takises.
12 Úa echikefel fán ruu lón eú wiik. Úa fangoló leengolun mettóch meinisin úa eáni.’
13 Nge ewe chón angei takises a útá me towaw, ese mwo nge mochen ánnetáái mesan láng, nge a chék pisiri fán mwárin, me apasa, ‘Kot, kopwe úméúméch ngeniei, emén chón tipis.’
14 Úa erenikemi, ei mwán a feitiw ngeni imwan we me a leteló pwe a pwúng lap seni ena Farisi. Pún ié a átekiatáái pwisin i epwe tekisonetiw, me ié a átekisonatiw pwisin i epwe tekiatá.”
15 Iwe, ekkewe aramas ra pwal uweato ren néúr kewe ménúkol pwe epwe attapeer, nge atun ekkewe chón káé ra kúna ei, ra poputá le song ngeniir.
16 Iwe nge, Jises a kérato ren i ekkewe ménúkol, a apasa: “Oupwe mut ngeni ekkena semirit ar repwe etto rei, me ousap sótun eppetiir, pún ewe Mwúún Kot fán iten chókkewe mi ussun chék iir.
17 Enlet úa erenikemi, ié ese etiwa ewe Mwúún Kot ussun án emén semirit etiwa och mettóch, i esap fókkun tolong lón.”
18 Iwe, emén me lein ekkewe sounemenem a kapas eis ngeni, a apasa: “Sense mi múrinné, met a lamot úpwe féri pwe úpwe álemwiri manaw esemuch?”
19 Jises a ereni: “Pwata ka kér ngeniei múrinné? Ese wor emén mi múrinné me lúkún ewe emén, Kot.
20 Ka silei ekkewe allúk: ‘Kosap lisowumwáál, kosap nimanaw, kosap solá, kosap eáni kapasen pwáraatá mi mwáál, kopwe asamolu semom me inom.’ ”
21 Mwirin a apasa: “Ekkeei mettóch meinisin úa fen apwénúetá seni lekúkkúni.”
22 Mwirin án Jises rong ena, a ereni, “A wor eú mettóch a chúen lamot kopwe féri: Kopwe améméló meinisin minne mi wor reom me eineti monian ngeni chón osupwang, me epwe wor woum lón láng, me kopwe feito o chón tapwoto mwiri.”
23 Lupwen a rong ei, a fókkun letipechou, pún a fókkun pisekisek.
24 Jises a nengeni i me apasa: “Epwele ifa me weiresin ngeni chókkewe mi wor néúr watteen moni ar repwe tolong lón ewe Mwúún Kot!
25 Ren enletin, a mecheres ngeni emén kamel an epwe tikilong lón pwangen efóch tikekin tete lap seni án emén mwán mi pisekisek epwe tolong lón ewe Mwúún Kot.”
26 Chókkewe mi rong ei ra apasa: “Ié a tongeni kúna manaw?”
27 A apasa: “Ekkewe mettóch esap tufich ngeni aramas, a tufich ngeni Kot.”
28 Nge Piter a apasa: “Nengeni! Áúa fen likitaaló minne ám me tapweló mwirum.”
29 A ereniir: “Enlet úa erenikemi, ese wor emén a likitaaló imwan are pwúlúwan are pwiin are seman me inan are néún kewe fán ásengesin ewe Mwúún Kot
30 esap angei met mi lap seni lón ei fansoun, me pwal lón ewe ótóten fénúfan* epwele feito, manaw esemuch.”
31 Mwirin, a áimuoló ekkewe Engol me Rúúemén me ereniir: “Nengeni! Sipwe feitá ngeni Jerusalem, me meinisin ekkewe mettóch mi fen makketiw me ren ekkewe soufós ussun ewe Néún aramas repwe pwénúetá.*
32 Emén epwe waalong lepéún aramasen ekkewe ekkóch mwú me repwe turunufasa me kirikiringaw ngeni me attufa.
33 Mwirin ar awata i, repwe nieló, nge lón ewe aúlúngátin rán epwe manawetá.”
34 Iwe nge, rese liapeni weween eú me lein ekkeei mettóch, pún ekkeei kapas ra monomonoló seniir, me rese weweiti ekkewe mettóch a apasa.
35 Iwe, atun Jises a arap ngeni Jeriko, emén mwán mi chuun a mómmóót ppen ewe al me tittingor.
36 Pokiten a rong án ewe mwichen aramas fetáleló, a poputá le eis iká met a fis.
37 Ra ereni: “Jises ewe re Nasaret a fetáleló!”
38 Ren ena a púchérútá: “Jises, Néún Tafit, kopwe úméúméch ngeniei!”
39 Nge chókkewe mi nóm mwen ewe mwichen aramas ra poputá le apwúngú, ra ereni an epwe fanafaneló, nge a fen ina lapólóón an púppúchér: “Néún Tafit, kopwe úméúméch ngeniei!”
40 Iwe, Jises a kaúló me allúkú pwe repwe emmwenaato ewe mwán ren. Mwirin an a kkanoto, Jises a eisini:
41 “Met ka mochen ái úpwe féri fán itom?” A apasa: “Samol, mut ngeniei ái úpwe kúnasefáli mwei.”
42 Iwe, Jises a ereni: “Kopwe kúna mwom, óm lúkú a echikaróketá.”
43 Iwe, mwittir chék a kúnasefáli mwan, me a poputá le tapweló mwirin, me elingaaló Kot. Pwal och, atun ekkewe aramas ra kúna ei, iir meinisin ra mwareiti Kot.
Footnote
^ Are “me éfélúei tori ái pekkusuló.”
^ Are “ei sókkun lúkú.” Krik, “ewe lúkú.”
^ Are “wesiló.”
