Me ren Luk 3:1-38
3 Lón engol me nimuen ierin án Tiperius Sisar nemenem, atun Pontius Pailat a governor lón Jutia, Erot* sounemenemen Kalili, pwiin we Filip sounemenemen ewe fénú Ituria me Trakonaitos, me Lisanias sounemenemen Apilene,
2 lón fansoun ewe souasor mi lap Anas me fansoun Kaifas, ewe pwóróus seni Kot a feitiw wóón Jon néún Sekaraia we me lón ewe fénúpéén.
3 Iwe, a fetálfeil lón unusen ewe leeni órun ewe Jortan, a afalafal ngeni ekkewe aramas ar repwe papatais pwe esissillen ar áier fán iten omusomusen tipis,
4 ussun chék met a makketiw lón puken án ewe soufós Aisea kapas: “Méngúngúún emén a kékkéwu me lón ewe fénúpéén: ‘Oupwe ammólnatá alen Jiowa!* Áwenecharaaló alan kewe.
5 Iteiten lemoolun chuuk repwe ammasou, me iteiten chuuk me ppan repwe asónósónéchúló, ekkewe al mi pwor repwe káweneló, me ekkewe al mi sónósónóngaw repwe amwotoutouló,
6 me meinisin futuk* repwe kúna án Kot angangen amanaw.’ ”
7 Iwe, a poputá le ereni ekkewe aramas mi feito pwe repwe papatais ren: “Ámi néún serepenit, ié a éúréúrakemi pwe oupwe sú seni án Kot we song epwele waroto?
8 Iwe, oupwe féri ekkewe angang mi pwáári pwe oua áier. Ousap poputá le pwisin erenikemi, ‘Eperiam i semem.’ Pún úa erenikemi pwe Kot a tongeni féraatá néún Eperiam seni ekkeei faw.
9 Ren enletin, ewe kouk a fen nóm lepopun ewe irá. Iwe, iteiten irá ese uwaéch epwe pékúpék me kóturulong lón ekkei.”
10 Iwe, ekkewe aramas ra eisini: “Iwe met áúpwele féri?”
11 Lón an pélúweni, a apasa ngeniir: “Ewe aramas mi wor rúúaché úfan* epwe ngeni ewe emén ese wor úfan, me ewe emén mi wor met epwe áni epwe pwal féri ussun chék.”
12 Pwal mwo ekkewe chón ioni takises ra feito pwe repwe papatais, me ra ereni: “Sense, met áúpwe féri?”
13 A ereniir: “Ousap angei* met mi lap seni pwúngún úkúúkún takises.”
14 Pwal och, chókkewe mi fiti angangen soufiu ra eisini: “Met áúpwe féri?” Nge a ereniir: “Ousap oumwesi emén are tipimwáál ngeni emén, nge oupwe menemenéch ren met mi kawor* ngenikemi.”
15 Iei ekkewe aramas ra wikkitiwiti ewe Kraist me iir meinisin ra ekieki lón letiper ussun Jon, “Epwe fen i ewe Kraist iká?”
16 Jon a pélúweni, a ereniir meinisin: “Ren ngang, úa papataisikemi ren konik, nge ewe emén mi watte an nemenem lap seniei epwe feito, ewe ese fich ngeniei ái úpwe epichi féféén ipwan kewe. I epwe papataisikemi ren ewe ngún mi fel me ren ekkei.
17 A fen nóm lepéún an we séfélún áimuni ekkewe wiich seni péér, pwe epwe limetiéchú ewe leeni ia ewe wiich a áimu seni wasan we ie, me ionaalong ekkewe féún wiich lón an leenien iseis, nge péér kewe epwe kenaaló lón ekkei ese kun.”
18 A pwal ngeniir chómmóng kapasen fén me sópweeló le afalafala ngeni aramas ewe kapas allim.
19 Nge pokiten án Jon apwúngú Erot ewe sounemenem ren an pwúlúweni Erotias pwúlúwen pwiin we me ren meinisin ekkewe féffér mi fókkun ngaw Erot a féri,
20 iwe, Erot a pwal féri eú mettóch mi fókkun ngaw: A fétekini Jon lón leenien kalapus.
21 Iwe, lupwen meinisin ekkewe aramas ra papatais, Jises a pwal papatais. Iwe atun a iótek, láng a suukuló,
22 me ewe ngún mi fel a feitiw wóón ussun emén lisom, me eú méngúngú a feitiw seni láng: “En nei Át, ewe mi áchengicheng, úa pwapwa reom.”
23 Lupwen Jises a poputááni an angang, ina epwele 30 ierin, iwe me ren ekiekin aramas, i néún Josef.Josef néún Eli,
24 néún Matat,néún Lifai,néún Melki,néún Jannai,néún Josef,
25 néún Matataias,néún Amos,néún Nahum,néún Esli,néún Nakkai,
26 néún Maat,néún Matataias,néún Semein,néún Josek,néún Jota,
27 néún Joanan,néún Resa,néún Serupapel,néún Sealtiel,néún Neri,
28 néún Melki,néún Atti,néún Kosam,néún Elmatam,néún Er,
29 néún Jises,néún Elieser,néún Jorim,néún Matat,néún Lifai,
30 néún Simion,néún Jutas,néún Josef,néún Jonam,néún Eliakim,
31 néún Melea,néún Menna,néún Matata,néún Natan,néún Tafit,
32 néún Jesi,néún Opet,néún Poas,néún Salmon,néún Nason,
33 néún Aminatap,néún Arni,néún Esron,néún Peres,néún Juta,
34 néún Jekop,néún Aisek,néún Eperiam,néún Tara,néún Naor,
35 néún Seruk,néún Reu,néún Pelek,néún Eper,néún Sela,
36 néún Kainan,néún Arpaksat,néún Sem,néún Noa,néún Lamek,
37 néún Metusala,néún Inok,néún Jaret,néún Maalalel,néún Kainan,
38 néún Enos,néún Set,néún Atam,néún Kot.
