Me ren Luk 8:1-56
-
Ekkewe fefin mi fiti Jises (1-3)
-
Kapas áwewe ussun ewe chón amwora pwikil (4-8)
-
Popun án Jises áeá kapas áwewe (9, 10)
-
Weween ewe kapas áwewe ussun ewe chón amwora pwikil (11-15)
-
Lamp esap éppwélúló (16-18)
-
Inen Jises we me pwiin kewe (19-21)
-
Jises a amasésélóói mélúmél (22-25)
-
Jises a atolonga timon lón ekkewe pik (26-39)
-
Néún Jairus we nengngin; emén fefin a attapa úfen Jises (40-56)
8 Ekiseló mwirin a sái seni telinimw ngeni telinimw, me seni sóópw ngeni sóópw pwe epwe afalafal me esilefeili ewe kapas allimen Mwúún Kot. Nge ekkewe Engol me Rúúemén ra fiti,
2 pwal ekkóch fefin mi fen ngaseló seni ekkewe ngún mi ngaw me chikar seni ar semmwen: Meri ewe mi iteni Maktalin, ewe fúmén timon ra towu seni,
3 Joanna pwúlúwen Kusa, ewe mwán mi wisen nemeni imwen Erot, Susana, me pwal chómmóng fefin, iir kewe mi áeá minne mi wor rer le álisiir.
4 Iwe, lupwen eú mwichemmóngun aramas ra kochufengen me chókkewe mi eti seni telinimw ngeni telinimw, i a chék kapas lón kapas áwewe:
5 “Emén chón amwora a feiló pwe epwe amwora féún pwikil. Atun a amworeer, ekkóch me leir ra mworetiw ppen al, aramas ra puriir, me ekkewe machchang fán láng ra ániir.
6 Ekkóch ra mworetiw wóón achaw, me mwirin ar pwúkútá, ra pwáseló pokiten ese wor konik ie.
7 Ekkóch ra mworetiw lein ekkewe irá félúfél, me ekkewe irá félúfél mi máárfengen me iir, ra pwélúroló.
8 Nge ekkóch ra mworetiw lón pwúl mi múrinné, me mwirin ar pwúkútá, ra uwa tori 100 seni eféú pwikil.” Atun an apasa ekkeei mettóch, a kékkéwu: “Emén mi wor selingan an epwe aúseling, epwe aúseling.”
9 Nge néún kewe chón káé ra eisini iká met weween ei kapas áwewe.
10 A apasa: “A mumutá ngenikemi pwe oupwe weweiti ewe monomonun Mwúún Kot, nge fán iten ekkewe ekkóch, úa kapas lón kapas áwewe pwe ikáámwo ra nengeni, ese wor lamoten ar nengeni, me ikáámwo ra rong, resap weweiti met weween.
11 Iwe, iei weween ewe kapas áwewe: Ewe féún pwikil ina ewe kapasen Kot.
12 Ekkewe ppen ewe al iir ekkewe mi rong, mwirin ewe Tefil a feito me angealó ewe kapas seni lón letiper pwe resap tongeni lúkú me manaw.
13 Ekkewe wóón achaw iir ekkewe ra etiwa ewe kapas fán pwapwa lupwen ra rong, nge ese wor wareer. Ra lúkú ren och fansoun, nge lón fansoun sóssót, ra likitaaló ar lúkú.
14 Nge ren ekkewe mi mworetiw lein irá félúfél, ikkeei iir ekkewe mi rong, nge pokiten ra tánecheló ren aúrek, wéú, me pwapwaan ei manaw, iwe, ra unusen pwélúló me rese uwaani uwa mi múrinné.
15 Nge ren ekkewe mi nóm lón pwúl mi múrinné, ikkeei iir ekkewe ra rongorong ewe kapas fán letip mi fókkun múrinné, mwirin ra émwéchúnúkú me uwa fán likiitú.
16 “Ese wor emén epwe keni eú lamp mwirin epwe éppwélú fán eú sepi are watiw fán eú peet, nge a onómu wóón eú leenien lamp pwe chókkewe mi tolong repwe kúna ewe saram.
17 Pún ese wor och mettóch mi opoló esap pwápwááló, me ese wor och mettóch mi pwélúéchúló esap fókkun sárifiló, resap kopoló tori feilfeiló.
18 Iwe, oupwe aúselingéch, pún ié a wor an, Kot epwe pwal ngeni chómmóng. Nge ié ese wor an, pwal mwo nge met a ekieki pwe mi nóm ren, Kot epwe angei seni.”
19 Iwe, inan we me pwiin kewe ra feito ren, nge rese tongeni tikelong pokiten ewe pwiin aramas.
20 Iwe, ekkewe aramas ra ereni: “Inom we me pwiium kewe ra úkkúútá lúkún, ra mochen chuuruk.”
21 Lón an pélúweni, a ereniir: “Inei me pwii kewe, ikkeei iir mi rong ewe kapasen Kot me apwénúetá.”
22 Eú rán i me néún kewe chón káé ra tétá wóón efóch waa, me a ereniir: “Sipwele feiló ewe epek.” Iwe, ra sáiló lemataw.
23 Nge atun ar sái, a méúr. Me eú mélúmél mi efeiengaw a fis wóón ewe mataw, me waar we a poputá le lélé ren sáát me a nóm lón efeiengaw.
24 Iwe, ra feiló me féngúnatá, ra apasa: “Sense, Sense, sipwele máló!” Iwe ren ena, a pwáátá me apwúngú ewe ásepwál me ewe lóó mi efeiengaw, me ra masésétiw, me a lúaló.
25 Iwe a ereniir: “Ifa ámi lúkú?” Nge ra fókkun niwokkus me ingeiti, ra eráfengen lefiler: “Wesewesen ié ei? Pún a allúk ngeni pwal mwo nge ewe ásepwál me ewe mataw, me ra álleasochisi i.”
26 Iwe, ra tori órossetin ewe kinikin Kerasa, ewe mi nóm ewe epek áwenewenen Kalili.
27 Atun Jises a tétiw wóón fénú, emén mwán mi wááni timon seni lón ewe telinimw a chuuri. Fansoun langattam ese pippisek, me ese nónnóm lón imw nge lein ekkewe peiás.
28 Atun a kúna Jises, a púppúchér, me chapetiw mwen i, me fán léúwommóng a apasa: “Met ka mochen seniei, Jises, Néún ewe Kot mi Unusen Tekia Seni Meinisin? Úa tingormaw ngonuk, kosap eriáfféúei.”
29 (Pún Jises a fen allúkú ngeni ewe ngún mi limengaw an epwe towu seni ewe mwán. A wááni fán chómmóng,* me aramas ra kan fééti péún me pechen ngeni sein, me a wor chón mammasa i, nge a kan mwuuti féféén kewe me ewe timon a uwealó ngeni ekkewe leeni ese wor aramas ie.)
30 Jises a eisini: “Ifa itom?” I a apasa: “Legion,”* pún chómmóng timon ra tolong lón i.
31 Nge ra chék tingormaw ngeni an esap allúkú ngeniir ar repwe feiló lón ewe pwaang mi alóllóól.
32 Iwe, mi wor eú mwichemmóngun pik mi mwéngé wóón ewe chuuk ikena ie, ra tingormaw ngeni i an epwe mut ngeniir pwe repwe tolong lón ekkewe pik, me i a mut ngeniir.
33 Iwe, ekkewe timon ra towu seni ewe mwán me tolong lón ekkewe pik, me ewe pwiin pik ra ssáwu lepékún ewe ppan ngeni ewe nóóm me ra kokotiw.
34 Nge lupwen ekkewe chón fóól pik ra kúna met a fis, ra sú me mwittir apwóróusa ngeni chón ewe telinimw me chón ekkewe leeni únúkkún.
35 Mwirin, ekkewe aramas ra ló pwe repwe katol minne a fis. Ra feito ren Jises me kúna ewe mwán ekkewe timon ra towu seni pwe a pippisek me a miritiló, a mómmóót únúkkún pechen Jises, iwe ra niwokkus.
36 Chókkewe mi kúna ena ra apwóróusa ngeniir ifa ussun ewe mwán mi wááni timon a chikar.
37 Mwirin, eú mwichemmóngun aramas seni ekkewe leeni mi pwelli Kerasa ra tingorei Jises an epwe ló seniir pún ra fókkun niwokkus. Iwe, a tétá wóón ewe waa me ló.
38 Iwe nge, ewe mwán ekkewe timon mi towu seni a chék tingormaw ngeni pwe epwe fiti, nge a tiinaaló ewe mwán, a ereni:
39 “Kopwe liwiniti imwom, me sópweeló le apwóróusa minne Kot a féri fán itom.” Iwe a feiló, a arongafeili lón unusen ewe telinimw met Jises a féri fán itan.
40 Lupwen Jises a liwin, ekkewe aramas ra etiwa fán kirekiréch pokiten iir meinisin ra kan ésúkúsúkú i.
41 Nge nengeni! emén mwán itan Jairus a feito. Ei mwán emén néúwisin sinakok. A chapetiw ren pechen Jises me poputá le tingormaw ngeni an epwe feiló ren imwan we,
42 pokiten néún we áláeménún nengngin, ewe ina epwe 12 ierin, epwele máló.
Lupwen Jises a feiló, ekkewe aramas ra etieppach ngeni i.
43 Iwe, a wor emén fefin mi pwu seni chcha lón úkúúkún 12 ier, me ese tongeni chikar ren emén.
44 A feito me lúkúsékúrún me attapa lepwúlún úfan we úféúfen lúkún, me mwittir chék ewe chcha mi pwu seni a kaúló.
45 Iwe, Jises a apasa: “Ié a attapaei?” Lupwen iir meinisin ra erá pwe esap iir, Piter a apasa: “Sense, ekkeei aramas ra rongekoló me etieppach ngonuk.”
46 Nge Jises a apasa: “Emén a attapaei, pún úa silei pwe manaman a towu seniei.”
47 Lupwen ewe fefin a kúna pwe ese tongeni túkúmaaló, i a feito fán chechchech me chapetiw mwen i me pwáraaló mwen meinisin ekkewe aramas popun an attapa i me ifa ussun a mwittir chikaretá.
48 Nge a ereni neminna: “Nei, óm lúkú a echikaróketá. Kene feiló lón kinamwe.”
49 Lupwen a chúen fóffós, emén seni lón imwen Jairus we a feito, a apasa: “Noum we nengngin a fen máló. Kosap chúen aosukosuka ewe Sense.”
50 Lupwen Jises a rong ei, a ereni Jairus: “Kosap niwokkus, kopwe chék lúkú, me i epwe manaw.”
51 Lupwen a tikeri ewe imw, ese mut ngeni emén epwe eti le tolong me lúkún chék Piter, Jon, Jemes, me semen me inen ewe nengngin.
52 Nge ekkewe aramas meinisin ra kechiw me éfénú pwisin iir ren ar letipeta fán itan. Iwe, a apasa: “Oupwe chipeló le kechiw pún i ese máló nge a méúr.”
53 Iwe, ra fókkun takiri, pún ra silei pwe a fen máló.
54 Nge a amwéchú péún me kékkéri: “Nei, kopwe pwáátá!”
55 Iwe, an manamanen manaw a liwin, me a mwittir pwáátá, me a allúk pwe repwe ngeni ewe nengngin och mettóch epwe áni.
56 Iwe, seman kewe me inan ra fókkun pwapwa, nge i a allúkú ngeniir ar resap ereni emén met a fis.
Footnote
^ Are ese mwáál, “Ren langattam fansoun a kamwéchúnnúkúló i.”
^ Legion lón Paipel, ese mwáál a wewe ngeni eú watteen nampa, ese ffat fite. Eú legion a weneiti eú mwichen soufiun Rom lóóm lóóm, chóchóón soufiu lón, ina epwe 4,000 ngeni 6,000.
