Me ren Mark 1:1-45
-
Jon ewe Chón Papatais a afalafal (1-8)
-
Papataisin Jises (9-11)
-
Jises a kúna sóssót seni Setan (12, 13)
-
Jises a poputá afalafal lón Kalili (14, 15)
-
Kékkéén áeúin chón káé (16-20)
-
Katowuun ngún mi limengaw (21-28)
-
Jises a echikara chómmóng me lón Kaperniom (29-34)
-
Iótek lón eú leeni ese wor aramas (35-39)
-
Emén mi keinepan a chikar (40-45)
1 Lepoputáán ewe kapas allim ussun Jises Kraist, ewe Néún Kot:
2 Ussun chék met a makketiw lón ewe puken Aisea, ewe soufós: “(Nengeni! Úa tiinaaló me mwom* nei we chón uwei pwóróus, ewe epwe ammólnatá alom.)*
3 Méngúngúún emén a kékkéwu me lón ewe fénúpéén: ‘Oupwe ammólnatá alen Jiowa!* Áwenecharaaló alan kewe.’ ”
4 Jon ewe Chón Papatais a nóm lón ewe fénúpéén, a afalafal ngeni ekkewe aramas ar repwe papatais pwe esissillen ar áier fán iten omusomusen tipis.
5 Me meinisin lón Jutia me meinisin chón lón Jerusalem ra feiló ren, me a papataisiir* lón ewe Chénúpupu Jortan, me ra pwáraaló ar kewe tipis.
6 Jon a úféúf úf seni únen kamel me a peniti ngeni lukanapan efóch penit seni silin man, me a mwéngé nifichifichimas me ún chénún pulech seni lein petewel.
7 Iwe a afalafal: “Emén mi watte an nemenem lap seniei epwe feito mwiri, ese fich ngeniei ái úpwe pwóretiw me epichi féféén ipwan kewe.
8 Úa papataisikemi ren konik, nge i epwe papataisikemi ren ngún mi fel.”
9 Lón ekkena rán, Jises a feito seni Nasaret lón Kalili me a papatais ren Jon lón ewe Jortan.
10 Iwe, mwirin chék an tuutá seni lón ewe konik, a kúna láng pwe a suukuló me ewe ngún mi fel* a feitiw wóón ussun emén lisom.
11 Iwe, eú méngúngú a feitiw seni láng: “En nei Át, ewe mi áchengicheng, úa pwapwa reom.”
12 Me mwittir chék ewe ngún mi fel* a amwékútú i an epwe ló ngeni ewe fénúpéén.
13 Iwe, a sópweeló le nóm lón ewe fénúpéén ren 40 rán, me a kúna sóssót seni Setan. A nóm ren ekkewe manmwacho, nge ekkewe chónláng ra álisi i.
14 Mwirin án Jon a ares, Jises a feiló ngeni Kalili me afalafala ewe kapas allim seni Kot,
15 me apasa: “Ewe fansoun mi kefililó a pwénúetá, me ewe Mwúún Kot a arapoto. Oupwe áier me eáni lúkúlúk lón ewe kapas allim.”
16 Atun an fetál órun ewe Setin Kalili,* a kúna Simon me pwiin Simon we Andru ra oturu néúr kewe epino lón ewe nóóm, pún iir chón attaw.
17 Iwe, Jises a ereniir: “Oupwe tapwoto mwiri pwe úpwe áiti ngenikemi ifa ussun oupwe chón attawa aramas.”
18 Iwe, ra mwittir likitaaló néúr kewe epino me tapweló mwirin.
19 Mwirin an a ekis towawoló, a kúna néún Sepeti kewe rúúemén, Jemes me Jon, ar nóm wóón waar we me onefi néúr kewe epino,
20 me a mwittir kériir. Iwe, ra likitaaló semer we Sepeti me néún kewe chón angang wóón ewe waa me tapweló mwirin.
21 Iwe, ra feiló ngeni Kaperniom.
Atun chék a poputá ewe Sapat, a tolong lón ewe sinakok me poputá le asukul.
22 Me ra mwaar ren napanapen an asukul, pún i a asukuler ussun emén mi wor an nemenem me ren Kot, nge esap ussun ekkewe soumak.*
23 Iwe, lón ena chék pwal atun a wor emén mwán lón ar we sinakok mi nóm fán nemenien emén ngún mi limengaw, iwe a kékké fán léúwommóng:
24 “Jises re Nasaret, met ka mochen senikem? Ka feito pwe kopwe nikemiló? Úa fókkun silei iká en ié, ewe Emén mi Pin me tiitiito me ren Kot!”
25 Nge Jises a apwúngú, a apasa: “Kopwe fanafaneló, me towu seni i!”
26 Me mwirin án ewe ngún mi limengaw efisi án ewe mwán watteen chchech* me fókkun léúwommóng le púchér, iwe a towu seni i.
27 Iwe, ekkewe aramas meinisin ra fókkun máirú me ra poputá le pwóróusfengen lefiler, ra apasa: “Met ei? Eú mineféén asukul! A wor an manaman le allúkú ngeni pwal mwo nge ekkewe ngún mi limengaw, me ra álleasochisi.”
28 Iwe, ewe pwóróus ussun i a mwittir chéúfetál ekis meinisin lón unusen kinikinin Kalili.
29 Iwe, ra ló seni ewe sinakok me feiló ngeni imwen Simon me Andru we. Jemes me Jon ra pwal fitiir.
30 Inen pwúlúwen Simon we a kokkoon pún a semmwen, a úri pwichikkar, me ra mwittir ereni i ussun neminna.
31 A feiló ren neminna, a angei péún me ápwáátái. Ewe pwichikkar a wes seni, iwe a poputá le ammólnatá mwéngé fán iter.
32 Atun an a pwiniló, lupwen ewe akkar a tuputiw, ekkewe aramas ra poputá le uweato ren meinisin mi semmwen me mi wáániir timon,
33 me meinisin aramasen ewe telinimw ra chufengen ppen asamen ewe imw.
34 Iwe, a echikaraatá chómmóng, iir kewe mi úriir sókkopaten semmwen, me a atowu chómmóng timon, nge ese mut ngeni ekkewe timon ar repwe fós, pún iir ra silei pwe i ewe Kraist.*
35 Lesossorusich, atun mi chúen kiroch, a pwáátá me towu lúkún me feiló ngeni eú leeni ese wor aramas ie, iwe me ikena ie a poputá le iótek.
36 Iwe nge, Simon me chókkewe mi fiti ra kútta i,
37 iwe, ra kúna i me ra ereni: “Meinisin ra kúttók.”
38 Nge a ereniir: “Sipwe feiló ekis, lón ekkewe sóópw mi kkanoto, pwe úpwe pwal afalafal ie, pún iei popun úa feito.”
39 Iwe a feiló, a afalafal lón ar kewe sinakok lón unusen Kalili me atowu ekkewe timon.
40 Me ikena ie, emén mi keinepan a pwal feito ren, a tingormaw ngeni pwal mwo nge fotopwásuk me apasa: “Iká chék ka mochen, ka tongeni eliméchúei.”
41 Ren ena, a chúng letipan, a eitieló péún me attapa, me ereni: “Ngang úa mochen! Kopwe liméch.”
42 Mwittir chék ewe keinepan a mwó seni, me a liméchúló.
43 Mwirin, a allúkúchou ngeni me mwittir tiinaaló,
44 a ereni: “Ppii pwe kosap ereni emén och mettóch, nge kopwe ló pwáári pwisin en ngeni ewe souasor me isettá ewe asor Moses a allúkú pwe eú minen pwáraatá pwe ka fen liméch.”
45 Nge mwirin án ewe mwán a feiló, a poputá le akkapwóróusafetálei ewe pwóróus, ina minne, Jises ese chúen tongeni tolong lón eú telinimw lepwápwáló. Nge a chék nóm lúkún lón ekkewe leeni ese wor aramas ie. Nge ra chék sópweeló le feito ren seni ekis meinisin.
Footnote
^ Krik, “mwen mesom.”
^ Ppii Malakai 3:1, ikewe ei kinikinin wokisin a feito seni.
^ Are “otuuretiw; akokeretiw.”
^ Are “manaman mi fel.”
^ Are “manaman mi fel.”
^ Krik, “oturaaló ewe mwán nge a chék wei.”
^ Are ese mwáál, “ra silei iká i ié.”
