Me ren Mark 12:1-44
12 Mwirin, a poputá le kapas ngeniir lón kapas áwewe: “Emén mwán a fótuki eú tánipiin kreip me a féri eú ttitin mi pwellieló me a ttuetiw eú leenien kata féún kreip lón fán iten fférún wain me aúetá eú imwen mmas. Mwirin a ngeni ekkewe chón atake ar repwe túmúnú* me a sáiló towaw.
2 Lupwen a tori fansoun rásin kreip, a tiinaaló emén slave ren ekkewe chón atake pwe epwe angei seniir ekkóch uwaan ewe tánipiin kreip.
3 Nge ra angei i, awata, me tiinaaló fán an aséúnapé.
4 A pwal tiinsefálieló rer emén slave, me ena emén ra opuni mékúran me súfélúngaweiti.
5 A pwal tiinsefálieló emén, me ena emén ra nieló, me pwal chómmóng, ekkóch ra awater me ekkóch ra nireló.
6 A wor emén mi chúen nóm ren, néún we áchengicheng. A tiinaaló rer sáingolóón me apasa, ‘Repwe súféliti nei ei mwán.’
7 Nge ekkena chón atake ra eráfengen lefiler, ‘Iei i ewe chón álemwir. Ou etto sipwe nieló, me sipwe eáni ewe álemwir.’
8 Iwe, ra turufi me nieló i me oturawu lúkún ewe tánipiin kreip.
9 Met ewe minne an ewe tánipiin kreip epwe féri? Epwe feiló me nieló ekkewe chón atake me epwe ngeni pwal ekkóch ewe tánipiin kreip.
10 Ouse mwo álleani ei wokisin: ‘Ewe faw ekkewe chón kaú ra péútaaló, iei a wiliiti eféú féún lepwokuku mi fókkun aúchea.
11 Ei a feito seni Jiowa,* me a fókkun amwarar me mwen mesach’?”
12 Ren ena, ra mochen turufi* i, nge ra niwokkusiti ekkewe aramas, pún ra silei pwe a apasa ewe kapas áwewe nge a ekiekiir. Iwe, ra likitaaló i me feiló.
13 Mwirin ra tiinaaló ren i ekkóch Farisi me chienen Erot kewe ren ar repwe elliapa i lón an kapas.
14 Atun chókkana ra war, ra ereni: “Sense, áúa silei pwe en mi wenechar me kese ekieki minne ekkewe ekkóch ra eáni ekiek, pún kese nengeni napanapen aramas me lúkún. Nge ka asukula ewe enlet ussun Kot. Mi mumutá me ren allúk* le méénatiw takisesin pépéén mékúr ngeni Sisar are ese?
15 Áúpwe méénatiw, are áúsapw méénatiw?” A esilla ar likótuputup, iwe, a ereniir: “Pwata oua sótuniei? Oupwe wato eféú denarius* úpwe katol.”
16 Ra wato eféú, me a ereniir: “Liosun ié me iten ié ei?” Ra ereni: “Liosun Sisar me itan.”
17 Ina minne, Jises a apasa: “Oupwe ngeni Sisar minne án Sisar, nge oupwe ngeni Kot minne án Kot.” Me ra fókkun mwaar ren.
18 Iwe, ekkewe Satusi, iir kewe mi apasa pwe ese wor manawsefál, ra feito me eisini:
19 “Sense, Moses a mak ngenikich pwe iká pwiin emén a máló nge ese wor néún, pwiin we epwe angei pwúlúwan we me epwe oupwatiw seni neminna mwirimwirin pwiin we.
20 A wor fúmén pwipwi. Ewe áeménún a angei emén pwúlúwan, nge atun a máló ese wor mwirimwirin.
21 Iwe, ewe arúúeménún a pwúlúweni neminna nge a máló me ese wor mwirimwirin, pwal ina chék ussun ren ewe aúlúménún.
22 Me meinisin ekkewe fúmén ese wor mwirimwiriir. Iwe mwiriir meinisin, ewe fefin a pwal máló.
23 Lón ewe manawsefál, ié epwe pwúlúwen neminnewe, pún ekkewe fúmén ra piin pwúlúweni?”
24 Jises a ereniir: “Esap iei popun oua mwáálliló, pún ouse silei ekkewe Taropwe mi Pin me ewe manamanen Kot?
25 Pún atun repwe manawetá seni máló, ekkewe mwán resap pwúpwúlú me ekkewe fefin resap apwúpwúlú, nge iir repwe chék ussun ekkewe chónláng lón láng.
26 Nge ren án ekkewe mi máló repwe manawetá, ouse mwo álleani lón ewe puken Moses, lón ewe pwóróus ussun ewe irá félúfél pwe Kot a ereni: ‘Ngang ewe Koten Eperiam me Koten Aisek me Koten Jekop’?
27 I emén Kot án ekkewe mi manaw, nge esap án ekkewe mi máló. Oua fókkun mwáálliló.”
28 Emén me lein ekkewe soumak mi feito me rong ar pwóróusfengen, a kúna pwe a pélúwenéchú iir, iwe a eisini: “Menni allúk a akkomw* seni meinisin?”
29 Jises a pélúweni: “Ewe mi akkomw, ‘Kopwe aúseling Israel, Jiowa* ach Kot, ewe emén Kot Jiowa,*
30 me kopwe tongei Jiowa* óm Kot ren unusen letipom me ren unusen manawom me ren unusen ekiekum me ren unusen péchékkúlom.’
31 Ewe oruuan iei, ‘Kopwe tongei chón órum ussun óm tongei pwisin en.’ Ese pwal wor allúk mi lap seni ekkeei.”
32 Ewe soumak a ereni: “Sense, a múrinné óm kapas, mi tipeeú ngeni ewe enlet, ‘A wor emén Kot, me ese pwal wor emén me lúkún i’;
33 me án emén tongei i ren unusen letipan, ren unusen an ekiek,* me ren unusen an péchékkúl me tongei chón órun ussun an tongei pwisin i, a fókkun lamot lap seni meinisin ekkewe asoren kek mi unus me pwal ekkóch asor.”
34 Pokiten Jises a mirititi pwe a pélúweni fán tipáchem, iwe a ereni: “En kese towaw seni ewe Mwúún Kot.” Iwe, ese chúen wor emén a pwora le kapas eis ngeni i.
35 Iwe nge, atun Jises a sópweeló le asukul lón ewe imwenfel, a apasa: “Pwata ekkewe soumak ra erá pwe ewe Kraist i néún Tafit?
36 Fán emmwenien ewe ngún mi fel, pwisin Tafit a erá, ‘Jiowa* a ereni ái Samol: “Kopwe móttiw peliefichi tori ái úpwe isettiw chón oputom fán pecheom.” ’
37 Tafit pwisin a kér ngeni Samol, iwe, ifa ussun a tufich pwe i néún we?”
Nge ewe mwichemmóngun aramas ra aúseling ngeni i fán pwapwa.
38 Iwe, lón an asukul a sópweeló le apasa: “Oupwe túmúnúkemi seni ekkewe soumak iir kewe mi mochen fetálfeil fán úfer úféúfen lúkún mi langattam me sani án ekkewe ekkóch repwe kapwong ngeniir fán súfél me lón ekkewe leenien amémé,
39 me ekkewe leenien móót mi nóm mwan* me lón ekkewe sinakok me ekkewe leeni fán iten ekkewe waséla mi iteféúló atun mwéngéén lekuniol.
40 Ra angei* mettóchun ekkewe fefin mi má seniir pwúlúwer, me ra einga aramas ren ar iótekittam. Ekkeei repwe angei kapwúng mi fókkun chou.”
41 Iwe, a móttiw arapakkan ngeni ekkewe leenien asor me poputá le katol ifa ussun ekkewe aramas ra púngúlong moni lón ekkewe leenien asor, nge chómmóng aramas mi pisekisek ra púngúlong chómmóng féún senis.
42 Iei emén fefin mi wéúngaw mi má seni pwúlúwan a feito me púngúlong rúúeféú féúkúkkúnún senis mi fókkun kisikis aúchean.*
43 Iwe, a kérato néún kewe chón káé ren me ereniir: “Enlet úa erenikemi pwe minne ei fefin mi wéúngaw mi má seni pwúlúwan a waalong, a watte seni meinisin met ekkewe ekkóch mi uwoulóng moni lón ekkewe leenien asor ra waalong.
44 Pún iir meinisin ra waalong somwen wéúúr, nge i inaamwo iká a osupwang* a waalong meinisin minne mi wor ren, meinisin minne a manaw seni.”
Footnote
^ Krik, “lease ngeni ekkewe chón atake.”
^ Are “aresini.”
^ Are “mi pwúng.”
^ Are “fókkun aúchea.”
^ Krik, “wewe.”
^ Are “fókkun múrinné.”
^ Krik, “mwéngé imwen ekkewe fefin mi má seniir pwúlúwer.”
^ Are “wéúngaw.”
