Me ren Mark 15:1-47
15 Atun a kerán chék tétá akkar, ekkewe souasor mi lap fitifengen me ekkewe néúwisin Jus me ekkewe soumak, weween unusen án chón Jus we mwichen soukapwúng mi tekia, ra pwúngúpwúngfengen, me ra fééti Jises me átekinaló me atolonga lepéún Pailat.
2 Iwe, Pailat a eisini: “En ewe Kingen chón Jus?” I a pélúweni: “Ussun chék met ka apasa.”
3 Nge ekkewe souasor mi lap ra tipimwáál ngeni wóón chómmóng mettóch.
4 Iwe, Pailat a pwal poputá le kapas eis sefál ngeni, a apasa: “Ese wor met kopwe pélúwen ngeni? Nengeni a chómmóng met ra etipisuk wóón.”
5 Nge Jises ese chúen pélúweni. Ina minne Pailat a mwaar.
6 Lón iteiten ránin chulap, i a soun omusawu ngeniir emén chón kalapus ra tingor.
7 Lón ei atun a wor emén mwán itan Parapas. I me ekkewe ekkóch mi nóm lón kalapus ra ú ngeni mwú me tipisin nimanaw.
8 Iwe, ekkewe aramas ra feito me poputá le waalong ar tingor me ren minne Pailat a kan soun féri fán iter.
9 A pélúweniir, a erá: “Oua mochen ái úpwe omusa ngenikemi ewe Kingen chón Jus?”
10 Pún Pailat a silei pwe ekkewe souasor mi lap ra atolonga i lepéún pokiten lólówó.
11 Nge ekkewe souasor mi lap ra sópweeló le ereni ekkewe aramas ar repwe ereni Pailat an epwe fen omusawu ngeniir Parapas.
12 Pailat a pwal pélúweniir, a ereniir: “Nge met úpwele fér ngeni ewe emén oua kér ngeni Kingen chón Jus?”
13 Ra pwal kétá fán léúwommóng: “Epwe ninniiló wóón ewe irá!”
14 Nge Pailat a pwal ereniir: “Pwata? Met sókkun mettóch mi ngaw a féri?” Nge ra chék alapaaló ar kékké fán léúwommóng: “Epwe ninniiló wóón ewe irá!”
15 Iwe, ren án Pailat mochen apwapwaai ekkewe aramas, a omusa ngeniir Parapas. Iwe mwirin án Jises kawet, i a atolonga lepéún ekkewe soufiu pwe epwe ninniiló wóón ewe irá.
16 Iei ekkewe soufiu ra uwealó ren ewe imw, ina imwen ewe governor, me ra kérfengeni unusen ewe mwichen soufiu.
17 Iwe, ra éúféúfa ngeni úf mi forket me piti epa mwárámwár seni irá félúfél me watá wóón mékúran,
18 iwe, ra poputá le kapwong ngeni: “Rán allim, Kingen ekkewe chón Jus!”
19 Ra pwal opuni ngeni mékúran efóch wok me attufa i. Me ra fótopwúkútiw me chapetiw ngeni.
20 Sáingolóón, mwirin ar turunufasa i, ra pwiliti seni ewe úf mi forket me éúféúfa ngeni úfan we úféúfen lúkún. Iwe, ra uwealó pwe epwe chúfélútá wóón ewe irá.
21 Ra pwal eriáni emén mi fetáleló itan Simon seni Sairine, mi feito seni lemal, semen Aleksanter me Rufus, an epwe mwárei án Jises we iráán ninni.*
22 Iwe, ra uwealó ngeni ewe leeni itan Kolkota, weween, “Péénsékún Mékúr.”
23 Me ikeei ie ra sótun éúnú ngeni wain mi nofit ngeni och minen aúlúún,* nge ese mochen únúmi.
24 Me ra chúfélúetá wóón ewe irá me ra eineti úfan we úféúfen lúkún ren ar úttút wóón pwe repwe silei met emén me emén soufiu epwe angei.
25 Iei ewe aúlúngátin kulók,* me ra chúfélúetá wóón ewe irá.
26 Iwe, ewe kapasen tipimwáál ngeni a apasa: “Ewe Kingen chón Jus.”
27 Pwal och, ra eitiwaatá rúúemén chón solá wóón ekkewe irá únúkkún i, emén peliefichin me emén pelieméngún.
28 * ——
29 Me chókkewe mi pwereto ikena ra eáni kapas turunufas ngeni, ra wichikichiki mékúrer me apasa: “En ewe ka erá pwe kopwe ataietiw ewe imwenfel me aúetá lón úlúngát rán,
30 pwisin selánuk ren óm tétiw me wóón ei iráán ninni!”*
31 Pwal ina chék ussun ren ekkewe souasor mi lap me ekkewe soumak, ra eáni i minen atakirikir lefiler me apasa: “A seláni ekkewe ekkóch, nge ese tongeni seláni pwisin i!
32 Ewe Kraist, ewe Kingen Israel, epwele tétiw iei me wóón ewe iráán ninni* pwe sipwe kúna me lúkú.” Pwal mwo chókkewe mi eitiwetá wóón ekkewe irá únúkkún ra esiita i.
33 Lupwen a poputá ewe awonuen kulók,* eú kiroch a arochaaló unusen ewe fénú tori ewe etiuen kulók.*
34 Iwe, lón ewe etiuen kulók, Jises a kékké fán léúwommóng: “Eli, Eli, lama sapaktani?” weween, “Ái Kot, ái Kot, pwata ka likitieiló?”
35 Nge atun ekkóch chókkewe mi úkkúútá kkan ngeni ikena ra rong ena, ra poputá le apasa: “Nengeni! A kékkéri Elias.”
36 Mwirin emén a ssáló, ottukaalong eú ammat lón wain mi mwóón, pacheetá wóón efóch wok me ngeni pwe epwe únúmi, a apasa: “Likiti! Sipwe katol iká Elias epwe feito pwe epwe ettatiw.”
37 Nge Jises a púchérútá me máló.
38 Me kaatenin ewe imwenfel a kamwefesen seni asan feitiw fan.
39 Atun ewe meilapen soufiu mi úkkúútá mwen i a kúna minne a fis me an a máló, a apasa: “Mi pwúng, ei mwán Néún Kot.”
40 A pwal wor ekkewe fefin mi kakkatol me towaw, ekkóch me leir Meri Maktalin pwal Meri inen Jemes ewe Kisikis me Joses, me Salome,
41 iir kewe ra kan fiti i me álisi atun a nóm Kalili, me pwal chómmóng fefin mi fiti le ló Jerusalem.
42 Iwe iei a fen lekuniol, nge pokiten iei ewe ránin Ammólnatá, weween, ewe rán mwen ewe Sapat,
43 Josef seni Arimatia a apworai letipan an epwe tolong mwen Pailat me tingor inisin Jises we. Josef, i emén mi iteféúló mi chóni án chón Jus we mwichen soukapwúng mi tekia, ewe mi pwal witiwiti ewe Mwúún Kot.
44 Nge Pailat a ekieki iká a fen máló iká, me a kérato ewe meilapen soufiu, a eisini iká Jises a fen máló.
45 Iwe, mwirin an silei pwe a máló, a ngeni Josef ewe inis.
46 Mwirin an mééni mangaak mi fókkun múrinné me ettatiw i, a túkúmi lón ewe mangaak mi fókkun múrinné me waalong lón eú peiás mi ttu lón achaw. Mwirin a asokopenaaló eféú faw ppen asamen ewe peiás.
47 Nge Meri Maktalin me Meri inen Joses we ra chék nennengeni peiásan we.
