Me ren Mark 5:1-43
5 Iwe, ra tori epek ewe sáát lón ewe kinikin Kerasa.
2 Mwirin chék án Jises tétiw me wóón ewe waa, emén mwán mi nóm fán nemenien emén ngún mi limengaw a towu me lein ekkewe peiás me chuuri i.
3 I a kan nónnóm lein ekkewe peiás, nge tori ena atun, ese fókkun wor emén a tongeni fétinúkú, pwal mwo ngeni sein.
4 Inaamwo iká fán chómmóng aramas ra fééti péún me pechen ngeni sein nge a chék mutfeseniir, me ese wor emén a wor an péchékkúl an epwe amwéchú i.
5 Iwe, lerán me lepwin a kan púppúchér lein ekkewe peiás me wóón ekkewe chuuk, me a rei pwisin i ngeni ekkewe faw.
6 Nge atun a kúna Jises seni towaw, a ssáiti me chapetiw me mwan.
7 Iwe, a léúwommóng le púchér: “Met ka mochen seniei, Jises, Néún ewe Kot mi Unusen Tekia Seni Meinisin? Úa tingor ngonuk pwe kopwe ékképélú Kot pwe kosap eriáfféúei.”
8 Pún Jises a kan ekkereni: “Kopwe towu seni ewe mwán, en ngún mi limengaw.”
9 Nge Jises a eisini: “Ifa itom?” A pélúweni: “Itei Legion,* pún ám mi chómmóng.”
10 Me a kan tittingor ngeni Jises an esap tiinaaló ekkewe ngún lúkún ewe fénú.
11 Iwe, epwi pwiin pik mi chómmóng ra mwémmwéngé ikena ie wóón ewe chuuk.
12 Iwe, ekkewe ngún ra tingormaw ngeni i: “Kopwe tiinikemiló lón ekkewe pik pwe áúpwe tolong lón iir.”
13 Iwe, a mut ngeniir. Iwe, ekkewe ngún mi limengaw ra towu me ra tolong lón ekkewe pik, me ewe pwiin pik ra ssáwu lepékún ewe ppan ngeni ewe sáát, ina epwe iir 2,000, me ra kokotiw lón ewe sáát.
14 Nge ekkewe chón fóól pik ra sú me mwittir apwóróusa ngeni chón ewe telinimw me chón ekkewe leeni únúkkún. Me aramas ra feito pwe repwe katol met a fis.
15 Iwe, ra feito ren Jises me ra kúna ewe mwán mi wááni timon, ewe emén me akkomwan mi wor ngéréún* timon wóón, a mómmóót nge a pippisek, me a miritiló. Iwe, ra niwokkus.
16 Pwal och, chókkewe mi kúna ra apwóróusa ngeniir ifa ussun a fis ei ngeni ewe mwán mi wááni timon me ekkewe pik.
17 Iwe, ra poputá le tingormaw ngeni Jises an epwe ló seni leenier we.
18 Iwe, lupwen a tétá wóón ewe waa, ewe mwán mi piin wááni timon a tingormaw ngeni an epwe fiti i.
19 Iwe nge, i ese mut ngeni, nge a fen ereni: “Kopwe feiló lón imwom ren aramasom kewe, me apwóróusa ngeniir meinisin ekkeei mettóch Jiowa* a féri ngonuk me ewe úméúméch a pwáári ngonuk.”
20 Ei mwán a feiló me poputá le apwóróusafeili lón Tekapolis* meinisin ekkewe mettóch Jises a féri fán itan, iwe, meinisin ekkewe aramas ra mwaar ren.
21 Mwirin án Jises a sáisefál wóón ewe waa ngeni epek ewe sáát, eú mwichemmóngun aramas a mwicheto ren atun i a chúen nóm órosset.
22 Iwe, emén me lein ekkewe néúwisin sinakok, itan Jairus, a feito me atun a kúna i a chapetiw órun pechen.
23 I a tingormaw ngeni fán chómmóng, a apasa: “Nei we nengngin a fókkun semmwen.* Kese mochen feiló me isettá poum wóón pwe epwe péchékkúl me manaw.”
24 Iwe Jises a fitaaló, me eú mwichemmóngun aramas a tapweló mwirin me etieppach ngeni.
25 Iwe, a wor emén fefin mi pwu seni chcha úkúúkún 12 ier.
26 A fókkun riáfféú me lepéún chómmóng tokter, me a fen néúnaaló meinisin néún moni nge ese chikar, a fen watteeló an samaw.
27 Lupwen a rong ussun pwóróusen Jises, a feito me lúkúsékúrún me lein ewe mwichen aramas me attapa úfan we úféúfen lúkún,
28 pún a kan akkapasa: “Iká úpwe chék attapa úfan nan úféúfen lúkún, úpwe chikar.”
29 Iwe, mwittir chék ewe pwuun chcha a kaúló, me a meefi lón inisin pwe a fen chikar seni an we watteen semmwen.
30 Jises a mwittir meefi pwe a towu seni i och manaman, iwe a kulluiti ewe mwichen aramas me apasa: “Ié a attapa úfei úféúfen lúkún?”
31 Nge néún kewe chón káé ra ereni: “Ka kúna pwe ei mwichen aramas ra etieppach ngonuk, me ka eis, ‘Ié a attapaei?’ ”
32 Iwe nge, i a nennefetál pwe epwe ppii ié a féri ei.
33 Ewe fefin a niwokkus me chechchech, pún a silei met a fis ngeni, iwe a feito me chapetiw mwen i me pwáár ngeni mettóch meinisin.
34 A ereni neminna: “Nei, óm lúkú a echikaróketá. Kene feiló lón kinamwe, ka chikar seni óm watteen semmwen.”
35 Lupwen a chúen fóffós ekkóch mwán seni imwen ewe néúwisin sinakok ra feito me apasa: “Noum we nengngin a máló! Pwata ka chúen aosukosuka ewe Sense?”
36 Nge Jises a rong met ra apasa, iwe, a ereni ewe néúwisin sinakok: “Kosap niwokkus,* kopwe chék eáni lúkú.”
37 Iwe, ese mut ngeni emén an epwe tapweló mwirin me lúkún chék Piter, Jemes, me Jon pwiin Jemes we.
38 Iwe, ra tikeri imwen ewe néúwisin sinakok, me a kúna chókkewe mi ngúngúres me kechiw fán léúwommóng.
39 Mwirin an a tolong lón, a ereniir: “Pwata oua kechiw me efisi ei akúrang? Ewe semirit ese máló nge a méúr.”
40 Iwe, ra fókkun takiri. Nge mwirin an atorowu meinisin lúkún, a pani semen me inen ewe semirit me chókkewe mi eti, me a tolong ikewe ewe semirit a nóm ie.
41 Iwe, a angei péún ewe semirit, a ereni: “Talita kumi,” weween: “Kúkkún nengngin, úa erenuk, kopwe pwáátá!”
42 Me mwittir chék ewe nengngin a pwáátá me poputá le fetál. (I a 12 ierin.) Iwe, lupwen ra kúna ena, rese chúen tongeni amwéchú meefier ren lululóón ar pwapwa.
43 Nge a allúkúchou ngeniir pwe esap wor emén epwe silei ussun ei, me a apasa pwe repwe ngeni ewe nengngin och mettóch epwe áni.
Footnote
^ Legion lón Paipel, ese mwáál a wewe ngeni eú watteen nampa, ese ffat fite. Eú legion a weneiti eú mwichen soufiun Rom lóóm lóóm, chóchóón soufiu lón, ina epwe 4,000 ngeni 6,000.
^ Are “ekkewe engol telinimw.”
^ Are “a arapakkan muchúlóón.”
^ Are “Kaúló le niwokkus.”
