Me ren Mattu 1:1-25
1 Ei puk, puken uruwoon* Jises Kraist,* i mwirimwirin Tafit, mwirimwirin Eperiam we:
2 Eperiam i semen Aisek,Aisek i semen Jekop,Jekop i semen Juta me pwiin kewe.
3 Juta semen Peres me Sera, nge iner Tamar.Peres i semen Esron,Esron i semen Ram,
4 Ram i semen Aminatap,Aminatap i semen Nason,Nason i semen Salmon,
5 Salmon i semen Poas, nge inan Reap.Poas i semen Opet, nge inan Rut.Opet i semen Jesi,
6 Jesi i semen Tafit ewe king.
Tafit i semen Salomon, nge inen Salomon pwúlúwen Uraia we.
7 Salomon i semen Reopoam,Reopoam i semen Apia,Apia i semen Asa,
8 Asa i semen Jeosafat,Jeosafat i semen Jeoram,Jeoram i semen Usaia,
9 Usaia i semen Jotam,Jotam i semen Eas,Eas i semen Esekaia,
10 Esekaia i semen Manasa,Manasa i semen Amon,Amon i semen Josaia,
11 Josaia i semen Jekonaia me pwiin kewe, iir ra uputiw ina epwe me mwen ar ooló lón Papilon.
12 Mwirin ar ra ló Papilon, néún Jekonaia we Sealtiel a uputiw.Sealtiel i semen Serupapel,
13 Serupapel i semen Apiut,Apiut i semen Eliakim,Eliakim i semen Asor,
14 Asor i semen Satok,Satok i semen Akim,Akim i semen Eliut,
15 Eliut i semen Eleasar,Eleasar i semen Matan,Matan i semen Jekop,
16 Jekop i semen Josef pwúlúwen Meri we, nge Meri inen Jises, ewe a iteni Kraist.
17 Iwe, seni Eperiam tori Tafit, meinisin 14 tettel, seni Tafit tori án ekkewe chón Jus ra ooló lón Papilon, meinisin 14 tettel, seni ar ooló lón Papilon tori ewe Kraist, meinisin 14 tettel.
18 Nge iei ussun an a fis án Jises Kraist uputiw. Atun inan we Meri a kófót ngeni Josef, nge me mwen ar pwúpwúlú, neminna a silei pwe a pwopwo ren ewe ngún mi fel.*
19 Iwe nge, pokiten pwúlúwan we Josef i emén mi pwúng me ese mochen ásáwa lein aramas, iwe a ekiekin péútaaló nge lemonomon chék.
20 Nge mwirin án Josef ekieki ekkeei mettóch, nengeni! néún Jiowa* we chónláng a pwá ngeni lón an ttan, me ereni: “Josef, néún Tafit, kosap niwokkus le pwúlúweni Meri* pún a kólu ren ewe ngún mi fel.
21 Epwe néúnatiw emén át, me kopwe eita ngeni Jises,* pún i epwe angasa* néún aramas seni ar kewe tipis.”
22 Ekkeei mettóch meinisin ra wesewesen fis pwe epwe pwénúetá met Jiowa* a apasa me ren néún we soufós, a erá:
23 “Nengeni! Ewe fépwúl esaamwo tori mwán epwe pwopwo nge epwe néúnatiw emén át, me repwe eita ngeni Emmanuel,” a wewe ngeni, “Kot A Nónnóm Rech.”
24 Mwirin, Josef a neló seni an méúr me féri met néún Jiowa* we chónláng a ereni, me a pwúlúweni Meri.*
25 Nge i ese méúr ren* neminna tori an a néúnatiw emén át, me Josef a eita ngeni Jises.
Footnote
^ Are “tettelin.”
^ Are “ewe Messaia; ewe Emén mi Kepit.”
^ Are “manaman mi fel.”
^ Iei áeúin me lein ekkewe 241 ia iten Kot we Jiowa a pwá ie lón ewe Tesin Krik lón ei Paipel. A kapachelong ekkewe 4 atun a pwá itan na ikewe ewe popun kapas a néúnéú itemwochan we. Ppii App. A5.
^ Krik, “Kosap niwokkus le uwei pwúlúwom Meri ngeni imwom.”
^ A weneiti ewe it lón Ipru, Jesua, are Josua, a wewe ngeni “Jiowa ewe Chón Amanaw.”
^ Krik, “seláni.”
^ Krik, “a uwei pwúlúwan ngeni imwan.”
^ Are “lisowu ngeni.”
