Me ren Mattu 10:1-42
10 Iwe, a kérato néún kewe 12 chón káé me ngeniir manaman ren ar repwe asúoló ekkewe ngún mi ngaw* me echikaraatá meinisin sókkun semmwen me meinisin sókkun apwangapwang.
2 Ikkeei iten ekkewe 12 aposel: Akkomw, Simon ewe a iteni Piter, me Andru pwiin we, Jemes néún Sepeti me Jon pwiin we,
3 Filip me Partolomiu, Tomas me Mattu ewe chón angei takises, Jemes néún Alifios, me Tatius,
4 Simon, ewe emén mi tinikken, me Jutas Iskariot ewe a afangemá i mwirin.
5 Ikkeei iir ekkewe 12 Jises a tiiniireló, a allúk ngeniir: “Ousap feiló ngeni aramasen ekkewe mwú, me ousap tolong lón ekkewe telinimwen chón Sameria,
6 nge oupwe fen sópweeló le feiló ngeni ekkewe siip mi mwálecheló lón mwúún Israel.
7 Atun oua feiló afalafal oupwe apasa: ‘Ewe Mwúún láng a arapoto.’
8 Echikara mi semmwen, amanawa mi máló, eliméchú ekkewe mi keinepan, asúoló ekkewe timon. Oua angeiffatei, oupwe fangaffateló.
9 Ousap angei kolt are silifer are kapa fán iten ámi penit,*
10 are pwotoun mwéngé fán iten ewe sái, are rúúaché úf,* are ipwemi, are efóch wok, pún a fichiiti ewe chón angang an epwe angei anan mwéngé.
11 “Ese lifilifil menni telinimw are sóópw oua tolong lón, kútta ié me ikena mi fichiiti le rongorong, me oupwe nónnóm ikena tori oupwe towu seni.
12 Lupwen oua tolong lón ewe imw, oupwe kapwong ngeni chón ewe imw me áneánei pwe repwe kinamwe.
13 Iká ra etiwakemiilong, amwo ena kinamwe epwe nóm rer, nge iká rese etiwakemiilong, ewe kinamwe epwe liwinitikemi.
14 Iká emén ese etiwakemi are aúselinga ámi kapas, wichikaaló pwúlún pechemi atun oua towu seni ena imw are telinimw.
15 Enlet, úa erenikemi pwe kapwúngún fénúen Sotom me Komora epwe ppán lón ewe Ránin Kapwúng lap seni ena telinimw.
16 “Nengeni! Úa tiinikemiiwu ussun chék siip lein ekkewe wolif, ina pwata oupwe pwáári pwe oua tipáchem ussun serepenit me mosonoson ussun lisom.
17 Oupwe túmúnúkemi seni ekkewe aramas, pún repwe uweikemiilong lón kapwúng me repwe awatakemi lón ar kewe sinakok.
18 Me repwe uweikemiiló mwen ekkewe governor me ekkewe king fán ásengesi, pwe eú minen pwáraatá ngeniir me ngeni ekkewe mwú.
19 Iwe nge, lupwen repwe uweikemiiló, ousap aúreki ifa ussun are met oupwe apasa, pún lón ena kulók oupwe silei minne oupwe apasa,
20 pún esap chék pwisin ámi ewe oua fóffós, nge oua fós ren álillisin ewe manaman seni ewe Sam lón láng.
21 Pwal och, pwipwi repwe uwealó pwiir ngeni máló, nge emén sam néún we, me ekkewe naw repwe ú ngeni sam me in me repwe uweiirelong pwe repwe ninniiló.
22 Me aramas meinisin repwe oputakemi fán ásengesin itei, nge ewe emén mi likiitú tori sópwólóón epwe kúna manaw.
23 Lupwen ra eriáfféwúmwáálikemi me lón eú telinimw, súló ngeni pwal eú, pún enlet úa erenikemi, ouse fókkun tongeni áwesi unusen ekkewe telinimwen Israel tori án ewe Néún aramas a war.
24 “Emén chón sukul esap tekia seni néún sense, pwal ina ussun emén slave esap tekia seni néún masta.
25 Ewe chón sukul epwe menemenéch an epwe ussun néún we sense, me ewe slave ussun néún we masta. Iká aramas ra kér ngeni mastaan ewe imw Peelsepul,* ese wor tipemwárámwár pwe pwal ina met repwe kér ngeni chón lón imwan we!
26 Ina minne, ousap niwokkusitiir, pún ese wor och mettóch mi pwélúló esap sárifiló, me ese wor mettóch mi monomon esap pwápwááló.
27 Met úa erenikemi lón kiroch, oupwe apasa lón saram, me met oua rong lón mwéngúnúngún oupwe afalafala seni wóón ungen ekkewe imw.
28 Iwe, ousap niwokkusiti chókkewe mi nieló ewe inis nge rese tongeni ataieló ewe manaw,* nge oupwe fen niwokkusiti ewe mi tongeni ataieló iir me ruu, ewe manaw me ewe inis lón Keena.*
29 Esap pwe ra améméló rúúemén machchang ren eféú senis mi kúkkún manamanan?* Iwe nge, ese wor emén me leir epwe turutiw wóón pwúl nge Sememi we esap silei.
30 Nge pwal mwo meten mékúremi meinisin ra állea.
31 Iei minne, ousap niwokkus, oua kon aúchea seni meinisin ekkena machchang.
32 “Ina minne, meinisin mi pwárieiló mwen mesen aramas, úpwe pwal pwáraaló mwen mesen Semei we mi nóm láng.
33 Nge ié a amamesiniei mwen mesen aramas, úpwe pwal amamesini i mwen mesen Semei we mi nóm láng.
34 Ousap ekieki pwe úa feito pwe úpwe wato kinamwe wóón fénúfan. Úa feito pwe úpwe wato efóch ketilas, nge esap kinamwe.
35 Pún úa feito pwe úpwe etipefeseni emén mwán me seman, me emén nengngin me inan, me emén in me pwúlúwen néún át.
36 Pwúngún, chón koputen emén mwán epwe pwisin chón leimwan.
37 Ié a fókkun tongei seman are inan lap seniei, ese fich ngeniei, me ié a fókkun tongei néún át are nengngin lap seniei, ese fich ngeniei.
38 Me ié ese mochen mwárei an iráán ninni* me tapwoto mwiri, ese fich ngeniei.
39 Ié a sótun seláni manawan epwe péút seni, nge ié a péút seni manawan fán ásengesi epwe kúna manaw.
40 “Ié a etiwakemi a pwal etiwaei, nge ié a etiwaei a pwal etiwa ewe Emén mi tiinieito.
41 Ié a etiwa emén soufós pokiten i emén soufós, epwe angei liiwinin ussun emén soufós, me ié a etiwa emén aramas mi pwúng pokiten i emén aramas mi pwúng, epwe angei liiwinin ussun emén aramas mi pwúng.
42 Me ié a ngeni emén me lein ekkeei kúkkún eú chék mwo kapen konik mi pat an epwe únúmi pokiten i emén chón káé, enlet úa erenikemi pwe epwe wesewesen angei liiwinin.”
Footnote
^ Krik, “limengaw.”
^ Ina, efóch penit mi wor leenien iseis moni lón.
^ Are “pwal eché úf.”
^ Eú itelap mi weneiti Setan, ewe samol, are sounemenemen ekkewe timon.
^ Are “rese tongeni angealó ewe ápilúkúlúkún manawsefál.”
