Me ren Mattu 12:1-50
-
Jises, “Samolun ewe Sapat” (1-8)
-
Emén mwán mi pe efóch péún a chikar (9-14)
-
Néún Kot chón angang mi áchengicheng (15-21)
-
Ngún mi fel a asúoló timon (22-30)
-
Tipis ese tongeni musoló (31, 32)
-
Irá mi sill ren uwaan (33-37)
-
Esissillen Sona (38-42)
-
Lupwen ngún mi limengaw a liwin (43-45)
-
Inen Jises we me pwiin kewe (46-50)
12 Lón ewe ránin Sapat Jises a feiló lón ewe ataken wiich. Néún kewe chón káé ra echik, iwe ra poputá le fichi ekkewe umwun wiich me mwéngé.
2 Lupwen ekkewe Farisi ra kúna ei, ra ereni: “Nengeni! Noum kewe chón káé ra féri met ese mumutá me ren ewe allúk ar repwe féri lón Sapat.”
3 A ereniir: “Ouse álleani met Tafit a féri atun i me ekkewe mwán mi eti ra echik?
4 Ussun an tolong lón ewe imwen Kot me mwéngé ewe pilawa fán iten asor, och mettóch ese mumutá me ren allúk ngeni i me chókkewe mi eti le mwéngé me lúkún chék ekkewe souasor?
5 Are ouse álleani lón ewe Allúk pwe lón ekkewe Sapat ekkewe souasor ra angang lón ewe imwenfel nge rese tipis ren ar atai ewe allúkún Sapat?
6 Nge úa erenikemi pwe a fen nóm och mi lap seni ewe imwenfel.
7 Iwe nge, iká oua weweiti weween ei, ‘Úa mochen úméúméch nge esap asor,’ iwe ousap apwúngú ekkewe ese wor tipisiir.
8 Pún ewe Néún aramas i Samolun ewe Sapat.”
9 Mwirin an a feiló seni ena leeni, a tolong lón ar we sinakok,
10 me nengeni! a wor emén mwán mi pe efóch péún! Ren ar repwe tongeni etipisi, ra eisini, “Mi mumutá me lón ewe allúk án emén epwe echikaraatá mi semmwen lón Sapat?”
11 A ereniir: “Iká mi wor emén noum siip nge ena siip a turulong lón eú pwaang atun Sapat, mi wor emén mwán leimi esap angelongei me átekinawu?
12 A ifa me watteen aúchean aramas lap seni siip! Ina minne, a mumutá me lón allúk án emén epwe féri minne mi múrinné atun Sapat.”
13 Iwe, a ereni ewe mwán: “Kopwe eitiewu poum.” Me a eitiewu, iwe a échsefál ussun chék péún we efóch.
14 Nge ekkewe Farisi ra towu me pwúngúpwúngfengen ussun ar repwe nieló i.
15 Lupwen Jises a silei ussun ena, a feiló seni ikena. A pwal chómmóng mi tapweló mwirin, me i a echikareretá meinisin.
16 Nge i a fókkun allúkú ngeniir ar resap pwáári i,
17 ren an epwe pwénúetá met Kot a apasa me ren ewe soufós Aisea, a erá:
18 “Nengeni! Nei we chón angang úa filaatá, nei áchengicheng, ewe úa tipeeú ngeni! Úpwe watiw ngúni* wóón i, me i epwe esile ngeni ekkewe mwú ifa ussun epwe pwúng napanapen ar féri mettóch.
19 I esap ánini are léúwommóng le fós, are esap wor emén epwe rong léúwan me wóón ekkewe alelap.
20 Esap kupieló efóch ását mi kup, me esap kunuoló efóch wiik mi kúmwochooch tori an epwe anúkúcharatiw pwúng.
21 Pwúngún, lón itan, ekkewe mwú repwe ápilúkúlúk.”
22 Iwe, ra emmwenaaló ren emén mwán mi chuun me awemwéch timon mi wááni, me i a echikaraatá, iwe ena mwán mi awemwéch a tongeni kapas me kúna mwan.
23 Me meinisin ekkewe aramas ra máirú me poputá le apasa: “Esap fen iei i Néún Tafit we?”
24 Atun ekkewe Farisi ra rong ei, ra apasa: “Ren Peelsepul,* ewe sounemenemen ekkewe timon, ei mwán a tongeni asúoló timon.”
25 A silei ar ekiek, iwe a ereniir: “Iteiten mwú mi tipefesen, epwe taló, me iteiten telinimw are imw mi tipefesen, esap tongeni útá.
26 Pwal ina chék ussun, iká Setan a asúoló Setan, i a ú ngeni pwisin i, iwe epwe ifa ussun an epwe útá mwúún?
27 Pwal och, iká úa asúoló ekkewe timon fán iten Peelsepul, nge néúmi kewe ra asúroló fán iten ié? Ina popun, iir repwe néúmi soukapwúng.
28 Nge iká úa asúoló ekkewe timon ren án Kot ngún mi fel, weween pwe ewe Mwúún Kot a fen nóm ikeei nge ouse tepereni.
29 Are epwe ifa ussun emén a tongeni témwáálilong lón imwen emén mwán mi péchékkúl me angei pisekin kewe nge ese akkomw fééti ena mwán mi péchékkúl? Ina chék atun a tongeni solá lón imwan na.
30 Ié esap peniei a ú ngeniei, nge ié esap fitiei le ioni aramas a atoropasa aramas.
31 “Ren ei popun úa erenikemi pwe meinisin sókkun tipisin aramas repwe musoló, inaamwo iká ra kapasen ú ngeni minne mi pin epwe pwal omusereló, nge ié a kapasen ú ngeni ewe ngún mi fel, esap musoló.
32 Áwewe chék, ié a apasa och kapasen ú ngeni ewe Néún aramas, epwe musoló. Nge ié a eáni kapasen ú ngeni ewe ngún mi fel, esap musoló tipisin, esap lón ei ótóten fénúfan* are pwal lón ekkan epwe feito.
33 “Iká ámi irá mi múrinné, iwe uwaami epwe múrinné. Iká ámi irá mi ngaw, iwe uwaami epwe ngaw.
34 Ámi néún serepenit, ifa ussun oua tongeni apasa mettóch mi múrinné nge ámi mi fókkun ngaw? Pún met a nóm lón ewe letip a towu seni ewe aw.
35 Ewe mwán mi múrinné a atowu mettóch mi múrinné seni wéún mi múrinné. Nge ewe mwán mi ngaw a atowu mettóch mi ngaw seni wéún mi ngaw.
36 Úa erenikemi pwe aramas repwe etittin lón ewe Ránin Kapwúng ren iteiten kapas ese wor lamotan ra apasa,
37 pún ren óm kapas epwe pwáári pwe ka pwúng, me ren óm kapas kopwe kúna kapwúng.”
38 Mwirin ekkóch ekkewe soumak me Farisi ra pélúweni i ren ar apasa: “Sense áúa mochen kúna eú esissil me reom.”
39 Lón an pélúweniir, a apasa: “Eú táppin aramas mi fókkun ngaw me ese túppwél a chék kúkkútta eú esissil, nge ese wor esissil epwe kawor ngeniir lúkún chék esissillen ewe soufós Sona.
40 Pún ussun án Sona nóm lón luken ewe watteen iik ren úlúngát rán me úlúngát pwiin, iwe ewe Néún aramas epwe nóm lón leutun ewe fénúfan ren úlúngát rán me úlúngát pwiin.
41 Ekkewe aramasen Ninifa repwe pwáátá lón ewe kapwúng fiti ei táppin aramas me repwe apwúngú ei táppin aramas pún aramasen Ninifa ra áier ren án Sona afalafal. Nge nengeni! emén mi lap seni Sona a nóm.
42 Ewe kiwinen éér epwe pwáátá lón ewe kapwúng fiti ei táppin aramas me epwe apwúngú, pún neminnei a feito seni lesopwun fénúfan pwe epwe rongorong tipáchemen Salomon. Nge nengeni! emén mi lap seni Salomon a nóm.
43 “Lupwen emén ngún mi limengaw a towu seni emén aramas, a fetáleló lón ekkewe leeni ese wor konik ie pwe a kútta eú leenien asésé nge ese kúna.
44 Iwe a apasa, ‘Úpwe liwiniti imwei we, ewe úa mwékút seni,’ me atun a tikeri ewe imw a kúna pwe ese wor mi nóm lón, nge a liméch me lingéch.
45 Iwe, a ló me a uwei pwal fúmén ngún mi fókkun ngaw seni i, me mwirin ar tolong lón, ra nónnóm ikena, me lesópwólóón nónnómun ei mwán a kon ngaw seni akkomwan. Ina met epwe pwal fis ngeni ei táppin aramas mi fókkun ngaw.”
46 Lupwen a chúen fóffós ngeni ewe pwiin aramas, inan we me pwiin kewe ra útá lúkún pwe ra mochen fós ngeni.
47 Iwe emén a ereni: “Nengeni! Inom we me pwiium kewe ra úkkúútá lúkún me ra mochen fós ngonuk.”
48 A pélúweni ewe emén mi fós ngeni, a apasa: “Ié na inei, me ié kana pwii?”
49 Me a eitieló péún ngeni néún kewe chón káé, a apasa: “Nengeni! Inei me pwii kewe!
50 Pún ié a féri letipen Semei we lón láng, ena emén i pwii me fefinei me inei.”
