Me ren Mattu 13:1-58
-
KAPAS ÁWEWE USSUN EWE MWÚ (1-52)
-
Ewe chón amwora (1-9)
-
Popun Jises a áeá kapas áwewe (10-17)
-
Áweween ewe kapas áwewe ussun chón amwora (18-23)
-
Ekkewe wiich me ekkewe petewel (24-30)
-
Eféú féúkúkkúnún pwikil me ewe iis (31-33)
-
Áeáán kapas áwewe a apwénúetá oesini (34, 35)
-
Áweween ewe kapas áwewe ussun ekkewe wiich me ekkewe petewel (36-43)
-
Pisek aúchea mi kopoló me ewe faw aúchea mi múrinné (44-46)
-
Ewe chew (47-50)
-
Pisek aúchea minefé me minen lóóm (51, 52)
-
-
Jises ese ketiw me lón pwisin leenian (53-58)
13 Lón ena rán Jises a ló seni ewe imw me a mómmóót órun ewe sáát.
2 Pokiten chómmóngun ekkewe aramas mi mwicheto ren, iwe a tétá wóón efóch waa me mómmóót wóón, nge ekkewe aramas meinisin ra chék útá leppi.
3 Iwe, a ereniir chómmóng mettóch lón kapas áwewe, a apasa: “Nengeni! Emén chón amwora a feiló pwe epwe amwora.
4 Atun an amwora ekkewe féún pwikil, ekkóch ra mworetiw ppen ewe al, me ekkewe machchang ra changeto me ániir.
5 Ekkóch ra mworetiw lón leeni mi kitiféúféú ese kon watte pwúlún, me ra mwittir pwúkútá pokiten ese kon maanún ewe pwúl.
6 Nge atun ewe akkar a tétá, a kon pwichikkar ngeni ekkena irá, me pokiten ese wor wareer ra eioloon.
7 Ekkóch ra mworetiw lein ekkewe irá félúfél me ekkewe irá félúfél ra mááritá me pwélúroló.
8 Nge pwal ekkóch ra mworetiw lón pwúl mi múrinné me ra poputá le uwa. A wor ekkóch ra uwa tori 100 seni eféú pwikil, ekkóch ra uwaani 60, me ekkóch 30.
9 Emén mi wor selingan, epwe aúseling.”
10 Iwe, ekkewe chón káé ra feito me eisini: “Pwata ka áeá kapas áwewe lón óm fós ngeniir?”
11 Lón an pélúweniir, a apasa: “A mumutá ngenikemi pwe oupwe weweiti ewe monomonun Kot, ewe Mwúún láng, nge ese mumutá ngeniir.
12 Pún ié a wor an, Kot epwe pwal ngeni chómmóng, me epwe somwoló an. Nge ié ese wor an, Kot epwe angei seni pwal mwo met mi nóm ren.
13 Ina minne, úa áeá kapas áwewe lón ái fós ngeniir, pún ra nengeni, nge ese wor lamoten ar nengeni, ra rongorong, nge ese wor lamoten ar rong, rese pwal weweiti weween.
14 Me ewe oesini án Aisea a pwéppwénútá rer. A apasa: ‘Oupwe wesewesen rong nge ousap fókkun weweiti weween, me oupwe wesewesen nengeni nge ousap fókkun kúna.
15 Ekiekin ekkeei aramas ese suuk. Ra rong nge rese apwénúetá. Ra amméúrú meser me appúngaló selinger pwe resap kúna are rong och mettóch. Mwirilóón rese weweiti met a lamot ar repwe féri, me rese liwinitiei me úse echikareretá.’
16 “Iwe nge, oua pwapwa pún mesemi ra kúna me selingemi ra rong.
17 Enlet úa erenikemi, chómmóng soufós me aramas mi pwúng ra tipeni le kúna ekkewe mettóch oua nennengeni nge rese kúner, me rong ekkewe mettóch oua rongorong nge rese rong.
18 “Iei oupwe aúseling ngeni ewe kapas áwewe ussun ewe mwán mi amwora.
19 Emén mi rong pwóróusen ewe Mwú nge ese weweiti, ewe mi fókkun ngaw a feito me angei seni met mi fen mworetiw lón letipan, iei i ewe a mworetiw ppen ewe al.
20 Nge ewe mi mworetiw lón pwúl mi kitiféúféú, iei i ewe emén mi rongorong ewe kapas me mwittir le etiwa fán pwapwa.
21 Iwe nge i ese wor waaran, nge a chék sópweeló ren ekis fansoun, nge mwirin an a ppiitá riáfféú are riáfféúmwáál fán ásengesin ewe kapas, i a mwittir úkútiw le lúkú ewe kapas.
22 Nge ren ewe mi mworetiw lein irá félúfél, iei i ewe emén mi rong ewe kapas, nge aúrekin ótóten ei fénúfan* me otuputupun manamanen wéú a pwélúoló ewe kapas, me ese uwa.
23 Nge ren ekkewe mi mworetiw lón pwúl mi múrinné, ikkeei iir ekkewe mi rong ewe kapas me weweiti weween, iir ewe ra wesewesen uwa. A wor ekkóch ra uwa tori 100 seni eféú pwikil, ekkóch ra uwaani 60, me ekkóch 30.”
24 A pwal ngeniir eú kapas áwewe, a apasa: “Ewe Mwúún láng a ussun emén mwán mi amwora féún pwikil mi múrinné lón an we tánipi.
25 Atun aramas ra méúr, ewe chón oput i a war me a pwal amwora féún pwikilin petewel* lein ekkewe wiich me feiló.
26 Lupwen a fasaretá me uwa, iwe ekkewe petewel ra pwal pwá.
27 Iwe, ekkewe slave néún mastaan ewe imw ra etto me ereni, ‘Masta, esap pwe ka amwora pwikil mi múrinné lón óm we tánipi? Nge pwata a wor petewel?’
28 A ereniir, ‘Emén chón oput a féri ei.’ Ekkewe slave ra ereni, ‘Iwe, ka mochen ám áúpwe towu me úttiiretá?’
29 A ereniir, ‘Aapw, pún úa niwokkus iká atun oua úttatá ekkewe petewel oua pwal wiietá ekkewe wiich.
30 Oupwe likitiir repwe máárfengen tori ewe fansoun ráás, me lón fansoun ráás úpwe ereni ekkewe chón kinikin: Oupwe akkomw ioni ekkewe petewel me pinúkúúr pwe repwe kek, mwirin ioni ekkewe wiich me waalong lón ái leenien iseis.’ ”
31 A pwal ngeniir eú kapas áwewe, a apasa: “Ewe Mwúún láng a ussun chék eféú féúkúkkúnún pwikil* emén mwán a angei me fótuki lón an we tánipi.
32 Ren enletin, iei ewe mi féúkúkkún seni meinisin pwikil, nge atun a mááritá, iei ewe mi watte seni meinisin iásái me a wiliiti efóch irá, iwe ekkewe machchang fán láng ra etto me féri fáser lein palan kewe.”
33 A pwal ereniir eú kapas áwewe: “Ewe Mwúún láng a ussun chék iis emén fefin a angei me nofiti ngeni 22 paun pilawa mi ámás tori án unusen ewe pilawa a pwootá.”
34 Meinisin ekkeei mettóch Jises a apasa ngeni ekkewe aramas lón kapas áwewe. Ren enletin, ese fós ngeniir me lúkún an áeá kapas áwewe,
35 ren an epwe pwénúetá met Kot a apasa me ren ewe soufós, ewe a apasa: “Úpwe áeá kapas áwewe le asukul. Úpwe esilefeili ekkewe mettóch mi opoló seni me lepoputáán.”*
36 Mwirin an áfeilóói ekkewe aramas, a tolong lón ewe imw. Néún kewe chón káé ra feito ren me apasa: “Áwewe ngenikem ewe kapas áwewe ussun ekkewe petewel lón ewe tánipi.”
37 Lón an pélúweniir a erá: “Ewe chón amwora ekkewe pwikil mi múrinné, i ewe Néún aramas,
38 ewe tánipi, ina ewe fénúfan. Nge ren ewe pwikil mi múrinné, iir néún ewe Mwú. Nge ekkewe petewel, iir néún ewe emén mi fókkun ngaw,
39 me ewe chón oput mi fótukiir, i ewe Tefil. Ewe fansoun ráás, ina sópwólóón eú ótóten fénúfan,* me ekkewe chón kinikin, iir ekkewe chónláng.
40 Iwe, ussun chék ioifengenin ekkewe petewel me kekilóór lón ekkei, epwe pwal ina ussun sópwólóón ótóten ei fénúfan.*
41 Ewe Néún aramas epwe tiinaaló néún kewe chónláng, me repwe ionawu seni an we Mwú chókkewe mi efisi án ekkewe ekkóch repwe tipis me aramas mi féfféri minne mi ngaw,
42 me repwe otururelong lón ewe umw mi sarara, ikewe repwe kechiw me akkarúngi ie.
43 Lón ena atun ekkewe mi pwúng repwe mwolupolup ussun saramen ewe akkar lón Mwúún Semer we. Emén mi wor selingan, epwe aúseling.
44 “Ewe Mwúún láng a ussun och pisek aúchea mi kopoló lón tánipi, nge emén mwán a kúna me a opaaló, me pokiten an pwapwa, a ló me améméló meinisin met mi nóm ren me a mééni ewe tánipi.
45 “Pwal och, ewe Mwúún láng a ussun emén chón amémé me kamé mi kúkkútta faw aúchea* mi múrinné.
46 Lupwen a kúna eféú faw aúchea* mi fókkun múrinné, a feiló me mwittir améméló meinisin minne mi nóm ren me a mééni.
47 “Pwal och, ewe Mwúún láng a ussun eú chew mi kóturutiw leset me liapeni meinisin sókkun iik.
48 Lupwen a ur, ra úralong leppi, ra móttiw, me ionaalong lón sepi ekkewe mi éch, nge ekkewe mi ngaw ra maneló.
49 Epwe ina ussun ren sópwólóón ótóten ei fénúfan.* Ekkewe chónláng repwe feito me áimuoló ekkewe mi fókkun ngaw seni me lein ekkewe mi pwúng
50 me repwe otururelong lón ewe umw mi sarara, ikewe repwe kechiw me akkarúngi ie.
51 “Oua weweiti weween meinisin ekkeei mettóch?” Ra ereni: “Ewer.”
52 Iwe a ereniir: “Iká ina, iteiten chón asukul mi angei káit ussun ewe Mwúún láng epwe ussun emén mwán, emén mastaan imw, ewe a uwawu seni lón an leenien iseis pisek aúchea ekkewe mettóch mi minefé me minen lóóm.”
53 Lupwen Jises a wes le eáni ekkeei kapas áwewe, a ló seni ikena ie.
54 Mwirin an a tori leenian we, a poputá le asukuler lón ar sinakok, ina minne ra mwaar me apasa: “Ia ei mwán a angei me ie ei tipáchem me ekkeei manaman?
55 Esap iei i néún ewe chón táikú we? Esap inan we itan Meri, me pwiin kewe, Jemes me Josef me Simon me Jutas?
56 Me esap pwe meinisin fefinan kewe ra nóm rech? Ia chék a angei me ie ekkeei mettóch meinisin?”
57 Iwe, ra poputá chepetek ren. Nge Jises a ereniir: “Emén soufós a kúna súfélún ekis meinisin, lúkún chék lón leenian we me lón pwisin imwan.”
58 Me ese féri chómmóng manaman me ikena ie pokiten ese wor ar lúkú.
Footnote
^ Iei eú sókkun petewel mi poison nikinikin chék wiich.
^ Are “eféú pwikil itan mustard,” eféú pwikil mi pwá me lón Israel mi tongeni mááritá ina epwe 15 ft ttaman me a chómmóng palan.
^ Are ese mwáál, “ewe lepoputáán fénúfan.”
^ Krik, “pearl.”
^ Krik, “pearl.”
