Me ren Mattu 14:1-36
14 Lón ena fansoun, Erot ewe sounemenemen Kalili,* a rong ewe pwóróus ussun Jises
2 me a ereni néún kewe chón angang: “Iei i Jon Papatais. A manawetá seni máló, me iei popun a tongeni féri ekkeei manaman.”
3 Erot* a fen aresini Jon me fééti i me kalapusei pokiten Erotias, pwúlúwen pwiin we, Filip.
4 Pún Jon a fen ereni fán chómmóng: “Ese mumutá me ren ewe allúk óm kopwe pwúlúweni neminnewe.”
5 Iwe nge, ikáámwo a mochen nieló i, nge a niwokkusiti ekkewe aramas pún ra ekieki pwe i emén soufós.
6 Nge atun a fis apwapwaan uputiwen Erot we, néún Erotias we fépwúl a pwérúk lón ena atun me a fókkun apwapwaai Erot,
7 ina minne, a pwon ngeni fán ékképél pwe ese lifilifil met a tingor epwe ngeni.
8 Iwe, fán peseien inan we, a apasa: “Kopwe ngeniei lón eú sepi mékúren Jon Papatais.”
9 Inaamwo iká ewe king a letipeta, nge pokiten an we ékképél me chókkewe mi eti le mwéngé,* a allúkú pwe repwe ngeni.
10 Iwe, a tiinaaló emén soufiu me a úkúfi mékúren Jon me lón kalapus.
11 Iwe, mékúran we a kekiiló lón eú sepi me ngeni ewe fépwúl, me a uwealó ren inan we.
12 Mwirin néún kewe chón káé ra etto me uwealó somáán we me peiásini. Iwe, ra ló ren Jises me ereni ewe pwóróus.
13 Atun Jises a rong ei, a ló seni ikena wóón efóch waa tori eú leeni ese wor aramas ie pwe epwe ákkáláeménúló. Nge lupwen ekkewe aramas ra rong, ra tapweló mwirin nge ra chék fetál seni ekkewe telinimw.
14 Lupwen a inelong winifénú a kúna eú mwichemmóngun aramas, me a meefi an tongeer, iwe a echikara ekkewe mi samaw me leir.
15 Nge lupwen a lekunioletiw, néún kewe chón káé ra etto ren me ereni: “Ei leeni mi towaw me ei kulók a fen luló, kene tiinaaló ekkeei aramas pwe repwe tongeni ló ngeni ekkewe sóópw me kamé ener mwéngé.”
16 Iwe nge, Jises a ereniir: “Ese pwal lamot ar repwe feiló. Oupwe ngeniir met repwe áni.”
17 Ra ereni: “Ese wor met mi nóm rech ikeei lúkún chék nifféú pilawa me rúúemén iik.”
18 A erá: “Oupwe uweiireto rei ikeei.”
19 Me a ereni ekkewe aramas ar repwe móttiw lón ewe sipa. Iwe, a angei ekkewe nifféú pilawa me rúúemén iik me a sachchetá láng me a eáni eú iótek, me mwirin an kinikisi ekkewe pilawa, a ngeni néún kewe chón káé me ekkewe chón káé ra ngeni ekkewe aramas.
20 Iwe, iir meinisin ra mwéngé me métúló, me ra ionifengeni ekkewe lusun me a uroló 12 chúúk.
21 Chókkana mi mwéngé, ina epwe iir 5,000 mwán me lúkún fefin me semirit.
22 Iwe, mwittir chék a ereni néún kewe chón káé ar repwe tétá wóón ewe waa me akkomwoló mwan ngeni ewe epek, nge i epwe áfeilóói ekkewe aramas.
23 Mwirin an áfeilóói ekkewe aramas, a feitá wóón ewe chuuk pwe epwe iótek nge i chék. Lupwen a pwiniló, a chék áláeménúló ikena ie.
24 Nge iei, ewe waa a fókkun towaw seni fénú,* me a weires ren ewe lóóló pokiten enienin ewe ásepwál a péchékkúl ngeniir.
25 Nge wilingángách, atun mi chúen kiroch,* a feito rer nge a fetál wóón ewe sáát.
26 Lupwen ekkewe chón káé ra kúna an fetál wóón ewe sáát, iir ra osukosuk, ra apasa: “Met ei a pweppwereto!” Me ra púchér ren ar niwokkus.
27 Nge mwittir chék Jises a fós ngeniir, a erá: “Oupwe pwora! Ngang ei, ousap niwokkus.”
28 Piter a pélúweni: “Samol, iká en ena, kopwe ereniei ái úpwe feiló reom wóón ei sáát.”
29 A apasa: “Feito!” Iwe, Piter a tétiw me wóón ewe waa, a fetál wóón ewe sáát me feiliiti Jises.
30 Nge atun a nengeni ewe mélúmél, a niwokkus. Me lupwen a poputá le kokotiw, a púchérútá: “Samol, selániei!”
31 Jises a mwittir eitiewu péún me kamwéchúló me ereni: “En mi lúkú kisikis, pwata ka kkuf ren tipemwárámwár?”
32 Mwirin ar tétá wóón ewe waa, ewe mélúmél a maséséló.
33 Iwe, chókkewe mi nóm wóón ewe waa ra asamolu* i, me apasa: “En wesewesen Néún Kot.”
34 Me ra sáiló ewe epek me ra tori fénú lón ewe leeni itan Kenesaret.
35 Lupwen aramasen lón ena leeni ra esilla i, ra esile ngeni meinisin ekkewe leeni únúkkún, me aramas ra uweato ren meinisin chókkewe mi samaw.
36 Me ra tingormaw ngeni ar repwe chék mwaren attapa lepwúlún úfan we úféúfen lúkún. Iwe, meinisin chókkewe mi attapa ra unusen chikaretá.
Footnote
^ Krik, “ewe titrark.”
^ Are “móót tiwiniin órun ewe cheepel.”
^ Krik, “chómmóng stadia.” Eú stadium a léllé ngeni 606.95 ft (185 m).
^ Krik, “ewe arúáánúún kinikinin fansoun lepwin.” Ina epwe 3:00 a.m. tori tétáán akkar ina epwe 6:00 a.m.
^ Are “chapetiw ngeni.”
