Me ren Mattu 18:1-35
18 Lón ena atun, ekkewe chón káé ra feiló ren Jises me apasa: “Iwe, ién epwe lapalap lón ewe Mwúún láng?”
2 Iwe, a kérato ren emén semirit, a aútáái lukanaper,
3 me apasa: “Enlet úa erenikemi, iká oupwe kulsefál* me wiliiti ussun emén semirit, oupwe fókkun tolong lón ewe Mwúún láng.
4 Ina minne, ié epwe átekisonatiw pwisin i ussun ei semirit, ina i ewe emén epwe lapalap lón ewe Mwúún láng,
5 me ié a etiwa emén semirit ussun ei emén fán ásengesin itei, a pwal etiwaei.
6 Nge ié a áchepeteki emén me lein ekkeei kúkkún mi wor ar lúkú lón ngang, epwe fen éch ngeni an epwe féféétá wóón úwan eféú féúmmóngun faw* me kokotiw lón ewe mataw mi alóllóól.
7 “Riáfféú ngeni fénúfan pokiten a efisi án aramas repwe tipis! Ewer, ekkewe mettóch repwe efisi tipis* repwe fókkun fis, nge riáfféú ngeni ewe emén mi efisi án ekkewe ekkóch repwe tipis!
8 Iwe, iká poum are pecheom ra efisi óm kopwe tipis,* kopwe pékúoló me otur sonuk. A múrinné ngonuk óm kopwe tolong lón manaw fán óm ter are pechemá lap seni óm kóturulong lón ewe ekkei esap kun feilfeiló fán óm péúruuofóch are pecheruuofóch.
9 Pwal och, iká mesom a efisi óm kopwe tipis,* kopwe olusaawu me otur sonuk. A múrinné ngonuk óm kopwe tolong lón manaw fán óm meseeféú lap seni óm meserúúeféú le kóturulong lón ekkein Keena.*
10 Ppii pwe ousap oputa emén me lein ekkeei kúkkún, pún úa erenikemi pwe néúr kewe chónláng lón láng ra kan nónnóm mwen mesen* Semei we mi nóm lón láng.
11 * ——
12 “Met ámi ekiek? Iká emén mwán a wor néún 100 siip nge emén me leir a mwálecheló, esap likiti ekkewe 99 wóón ewe chuuk me feiló kútta ewe emén mi mwálecheló?
13 Nge iká a kúna, úa wesewesen erenikemi, i epwe kon pwapwaiti lap seni ekkewe 99 rese mwálecheló.
14 Pwal ina ussun ren Semei* we mi nóm lón láng, esap pwapwa án pwal mwo nge emén lein ekkeei kúkkún epwe máló.
15 “Pwal och, iká pwiium a féri tipis, feiló ren me pwáári mwáállin we,* nge lefilemi chék. Iká a aúseling ngonuk, ka fen álisi pwiium na le féri minne mi pwúng.
16 Nge iká ese aúseling, kopwe pwal eweina emén are rúúemén, pwe meinisin kapas epwe núkúcharoló ren pwárien* rúúemén are úlúmén chón pwáraatá.
17 Iká ese aúseling ngeniir, kopwe esile ngeni ewe mwichefel. Iká ese pwal mwo nge aúseling ngeni ewe mwichefel, féfférum ngeni epwe ussun chék nge i emén chón ekkewe mwú me emén chón angei takises.
18 “Enlet úa erenikemi pwe ekkewe mettóch oua fééti wóón fénúfan ra fen pwal féfé me lón láng, me ekkewe mettóch oua epichi wóón fénúfan ra fen pwal pichiló me lón láng.
19 Enlet úa pwal erenikemi, iká rúúemén leimi wóón fénúfan ra tipeeúfengen le iótek ussun och mettóch mi lamot, epwe pwénúetá ngeniir me ren Semei we mi nóm lón láng.
20 Pún ia rúúemén are úlúmén ra chufengen ie fán ásengesin itei, ngang úa nónnóm leir.”
21 Mwirin, Piter a feito me ereni: “Samol, fán fitu pwii epwe tipis ngeniei me úpwe omusaaló tipisin? Epwe tori fán fisu?”
22 Jises a ereni: “Úa apasa ngonuk, esap tori fán fisu, nge epwe tori fán 77.
23 “Ina minne, ewe Mwúún láng a léllé ngeni emén king mi mochen án néún kewe chón angang repwe omusa ar liwinimmang ngeni.
24 Lupwen a poputá le etittiner, néún kewe chón angang ra uweato emén mwán mi liwinimmang ngeni 10,000 talent.*
25 Nge pokiten ese tufichin omusa, néún we masta a allúkú pwe i me pwúlúwan we me néún kewe me meinisin minne mi nóm ren epwe améméló pwe epwe komus ngeni an liwinimmang.
26 Iwe, ewe chón angang a chapetiw me asamolu i, a apasa, ‘Kopwe mosonottam ngeniei, me úpwe omusa ngonuk meinisin.’
27 Iwe, pokiten a chúng letipen ewe masta, a angasaaló ena chón angang me ereni pwe esap chúen omusa an we liwinimmang.
28 Nge ena chón angang a feiló me kúna emén me lein chienan kewe chón angang mi liwinimmang seni i 100 denarii,* me a kamwéchúló chioran ussun itá epwele nieló, a apasa, ‘Kopwe omusa ngeniei óm liwinimmang.’
29 Iwe, chienan we chón angang a chapetiw me poputá le tingormaw ngeni, a apasa, ‘Kopwe mosonottam ngeniei, me úpwe omusa ngonuk meinisin.’
30 Iwe nge ese mochen, nge a feiló me ereni emén an epwe oturaalong átena lón imwen kalapus tori an epwe tongeni omusa an liwinimmang.
31 Lupwen chienan kewe chón angang ra kúna minne a fis, ra fókkun letipengaw, iwe ra feiló me ereni néúr we masta meinisin met a fis.
32 Iwe, néún we masta a kérato me ereni: ‘En emén chón angang mi fókkun ngaw, atun ka tingormaw ngeniei, úa erenuk pwe kosap chúen omusa óm liwinimmang.
33 Iwe, itá kosap pwal pwáári úméúméch ngeni chienom we chón angang ussun chék ái pwáári úméúméch ngonuk?’
34 Ren ena, néún we masta mi fókkun song, a tiinaaló ewe chón angang lón imwen kalapus* tori an epwe omusatiw unusen an liwinimmang.
35 Epwe pwal ina ussun féfférún Semei we mi nóm láng ngenikemi iká emén me emén leimi ousap omusaaló pwiimi seni lón letipemi.”
Footnote
^ Are “siwil.”
^ Are “féúmmóngun faw emén aas mi okullu.” Ena sókkun faw ra áeá le kata féún wiich.
^ Krik, “minen chepetek.”
^ Krik, “efisi óm kopwe chepetek.”
^ Krik, “efisi óm kopwe chepetek.”
^ Krik, “kan nennengeni wóón mesen.”
^ Are ese mwáál, “Semom.”
^ Krik, “me apwúngú i.”
^ Krik, “awen.”
^ Krik, “a ngeni ekkewe chón angangen imwen kalapus.”
