Me ren Mattu 22:1-46
22 Jises a pwal fós ngeniir lón kapas áwewe, a apasa:
2 “Ewe Mwúún láng a ussun chék emén king mi féri eú kametipen apwúpwúlú fán iten néún we át.
3 Me a tiinaaló néún kewe chón angang ar repwe kérato chókkewe mi ketiw ngeni ewe kametipen apwúpwúlú, nge rese mochen feito.
4 A pwal tiinaaló ekkóch chón angang, me a apasa, ‘Oupwe ereni chókkewe mi ketiw: “Nengeni! Úa ammólnatá ái mwéngéén leolowas, nei kewe kou me nei kewe man mi éúmanaw ra kawet, me mettóch meinisin ra fen mmólnetá. Oupwe feito ngeni ewe kametipen apwúpwúlú.” ’
5 Iwe nge, iir rese áfánni, me ra feiló, emén a ló ngeni an tánipi, pwal emén ngeni an business,
6 nge ekkewe lusun, ra turufi néún kewe chón angang, ra turunufaseer me nireló.
7 “Ewe king a fókkun song me a tiinaaló néún kewe soufiu me ra nieló ekkena chón nimanaw me kenaaló ar we telinimw.
8 Mwirin, a ereni néún kewe chón angang, ‘Ewe kametipen apwúpwúlú a mmólnetá, nge chókkewe mi ketiw rese fich ngeni.
9 Ina minne, oupwe feiló wóón ekkewe al mi aleló seni ewe telinimw, me etiwa ié chék oua kúna ngeni ewe kametipen apwúpwúlú.’
10 Iei minne, ekkena chón angang ra feiló wóón ekkewe al me ionifengeni meinisin ekkewe ra kúner, ekkewe mi ngaw me múrinné. Me ewe leeni ikewe a fis ewe kametip ie a ur ren chókkana mi mwéngé.*
11 “Lupwen ewe king a feito pwe epwe nengeni ekkewe waséla, a kúna emén mwán mi úféúf úf ese fichiiti ewe ránin apwúpwúlú.
12 Iwe a ereni, ‘Pwii, ifa ussun ka tolong ikeei ie nge kese úféúf úféúfen apwúpwúlú?’ I a chék fanafaneló.
13 Iwe, ewe king a ereni néún kewe chón angang, ‘Oupwe fééti péún me pechen me oturawu lón ewe rochopwak lúkún. Me ikena ie epwe kechiw me akkarúngi ie.’
14 “Pún a wor chómmóng mi ketiw, nge chókúkkún ra kefilitá.”
15 Iwe, ekkewe Farisi ra feiló me pwúngúpwúngfengen ren ar repwe ssárei i lón an kapas.
16 Iwe, ra tiinaaló ren i néúr kewe chón káé fitifengen me ekkóch chienen Erot, me apasa: “Sense, áúa silei pwe en mi wenechar me ka asukula ewe enlet ussun Kot, me kese ekieki minne ekkewe ekkóch ra eáni ekiek, pún kese nengeni napanapen aramas me lúkún.
17 Iwe erenikem, met óm ekiek? Mi mumutá me ren allúk* le méénatiw takisesin pépéén mékúr ngeni Sisar are ese?”
18 Nge Jises a silei ar ekiek mi fókkun ngaw, a apasa: “Ámi mi likótuputup, pwata oua sótuniei?
19 Oupwe pwáári ngeniei ewe féún moni fán iten takises.” Iwe, ra wato ren eféú denarius.*
20 A ereniir: “Liosun ié me iten ié ei?”
21 Ra apasa: “Liosun Sisar me itan.” Iwe a ereniir: “Oupwe ngeni Sisar minne án Sisar, nge oupwe ngeni Kot minne án Kot.”
22 Lupwen ra rong ena, ra mwaar, iwe ra likitaaló i me feiló.
23 Lón ena ránin, ekkewe Satusi, iir kewe mi apasa pwe ese wor manawsefál, ra feito me eisini:
24 “Sense, Moses a apasa: ‘Iká emén mwán a máló nge ese wor néún, pwiin we epwe pwúlúweni pwúlúwan we me epwe oupwatiw seni neminna mwirimwirin pwiin we.’
25 A wor fúmén pwipwi. Ewe áeménún a pwúpwúlú me a máló nge ese wor mwirimwirin, iwe a likiti pwúlúwan we ngeni pwiin we.
26 Pwal ina chék met a fis ngeni ewe arúúeménún me ewe aúlúménún, tori ewe afúménún.
27 Iwe mwiriir meinisin, ewe fefin a máló.
28 Iwe, lón ewe manawsefál, ié me lein ekkewe fúmén epwe pwúlúwen neminnewe nge meinisin iir piin pwúlúwan?”
29 Lón án Jises pélúweni a ereniir: “Ámi oua mwáálliló, pún ouse silei ekkewe Taropwe mi Pin me ewe manamanen Kot,
30 pún lón ewe manawsefál ekkewe mwán resap pwúpwúlú, me ekkewe fefin resap apwúpwúlú, nge iir repwe chék ussun ekkewe chónláng lón láng.
31 Nge ussun manawsefálin ekkewe mi máló, ouse mwo álleani met Kot a apasa ngenikemi, ewe a erá:
32 ‘Ngang ewe Koten Eperiam me ewe Koten Aisek me ewe Koten Jekop’? I ewe Kot, án ekkewe mi manaw, nge esap án ekkewe mi máló.”
33 Lupwen ekkewe aramas ra rong ena, ra mwaar ren an asukul.
34 Mwirin án ekkewe Farisi rong pwe a afanafanelóói ekkewe Satusi, ra feitoppék lón eú chék mwiich.
35 Iwe emén me leir, i emén senseen Allúk, a sótuni i ren an eisini:
36 “Sense, menni allúk a fókkun lapalap me lón ewe Allúk?”
37 A ereni: “ ‘Kopwe tongei Jiowa* óm Kot ren unusen letipom me ren unusen manawom me ren unusen ekiekum.’
38 Iei ewe mi fókkun lapalap me áeúin allúk.
39 Ewe oruuan mi ussun chék, iei: ‘Kopwe tongei chón órum ussun óm tongei pwisin en.’
40 Unusen ewe Allúk me alon ekkewe Soufós ra lóngólóng wóón ekkeei ruu allúk.”
41 Atun ekkewe Farisi ra chufengen, Jises a eisiniir:
42 “Met oua ekieki ussun ewe Kraist? I néún ié?” Ra ereni: “Néún Tafit.”
43 A eisiniir: “Iwe, pwata chék fán emmwenien ewe ngún mi fel Tafit a kér ngeni i Samol, a erá:
44 ‘Jiowa* a ereni ái Samol: “Kopwe móttiw peliefichi tori ái úpwe isettiw chón oputom fán pecheom” ’?
45 Iwe, iká Tafit a kér ngeni Samol, ifa ussun pwe epwe i néún we?”
46 Iwe, ese wor emén a tongeni apasa och kapas an epwe pélúweni i, me seni ena rán, ese chúen wor emén a pwora le kapas eis ngeni.
