Me ren Mattu 23:1-39
23 Mwirin, Jises a fós ngeni ekkewe aramas me néún kewe chón káé, a apasa:
2 “Ekkewe soumak me ekkewe Farisi ra ekieki pwe ra asukula minne Moses a eáni káit.
3 Ina minne, mettóch meinisin ra erenikemi, oupwe féri me apwénúetá, nge ousap féri minne ra féri, pún ra apasa nge rese féri minne ra apasa.
4 Ra pinúkúfengeni os mi chou me watá wóón afaren aramas, nge pwisin iir rese mochen attapa ren aútún péúr.
5 Meinisin ekkewe angang ra féri, ra féri pwe aramas repwe kúna, pún ra awatteeló ekkewe kúkkún pwóór* ra mwárini wóón chamwer me rietá wóón pelieméngún péúr me ra attamaaló fouten lepwúlún úfer kewe.
6 Ra sani le móót lón ekkewe leeni fán iten ekkewe waséla mi iteféúló atun mwéngéén lekuniol me ekkewe leenien móót mi nóm mwan* me lón ekkewe sinakok
7 me ekkewe kapwong me lón ekkewe leenien amémé me án aramas repwe kér ngeniir Rappai.*
8 Nge ámi, ousap mut ngeni ekkewe ekkóch ar repwe kér ngenikemi Rappai pún a chék wor emén néúmi Sense, me ámi meinisin pwipwi.
9 Pwal och, ousap kér ngeni emén wóón fénúfan sememi, pún mi wor emén chék Sememi, ewe Emén lón láng.
10 Ousap pwal eita ngenikemi souemmwen, pún mi wor emén néúmi Souemmwen, ewe Kraist.
11 Nge ewe emén mi lap me leimi epwe néúmi chón angang.
12 Ié a átekiatáái pwisin i epwe tekisonetiw, me ié a átekisonatiw pwisin i epwe tekiatá.
13 “Feiengaw ngenikemi soumak me Farisi, likótuputup ámi! pokiten oua appúngaló ewe Mwúún láng seni aramas. Pún pwisin ámi ouse tolong lón, me ouse pwal mut ngeni chókkewe mi feilong ar repwe tolong lón.
14 * ——
15 “Feiengaw ngenikemi soumak me Farisi, likótuputup ámi! pokiten oua sáifeil wóón mataw me fénú pwe oupwe etipetipa emén an epwe fiti ewe lamalamen chón Jus. Iwe lupwen a fiti, a fen kon ngaw senikemi, me iká a fich ngenikemi oupwe feiló lón Keena,* a pwal fich ngeni i an epwe feiló lón Keena.*
16 “Feiengaw ngenikemi chón emmwen mi chuun, ekkewe mi erá, ‘Iká emén a ékképélú ewe imwenfel ese wor ngawan iká ese apwénúetá. Nge iká emén a ékképélú ewe kolt lón ewe leenien iseis án ewe imwenfel, i epwe féri pwúngún.’
17 Ámi mi umwes me chuun! Ren enletin menni a kon lamot, ewe kolt are ewe imwenfel, ewe a epini ewe kolt?
18 Pwal och, ‘Iká emén a ékképélú ewe róóng, ese wor ngawan iká ese apwénúetá. Nge iká emén a ékképélú ewe asor wóón, i epwe féri pwúngún.’
19 Ámi mi chuun! Ren enletin menni a kon lamot, ewe asor are ewe róóng, ewe a epini ewe asor?
20 Ina minne, ié a ékképélú ewe róóng, a ékképélú ewe róóng me mettóch meinisin mi nóm wóón,
21 me ié a ékképélú ewe imwenfel, a ékképélú ewe imwenfel me ewe Emén mi nónnóm lón,
22 me ié a ékképélú láng, a ékképélú án Kot we leenien móótun king me ewe Emén mi mómmóót wóón.
23 “Feiengaw ngenikemi soumak me Farisi, likótuputup ámi! pokiten oua fang leengolun mint, me dill, me cumin,* nge oua tunaaló ekkewe mettóch mi lamot lón ewe Allúk, choweán pwúng me úméúméch me túppwél. Mi lamot oupwe féri ekkena mettóch, nge ousap tunaaló ekkewe pwal ekkóch mettóch.
24 Ámi chón emmwen mi chuun, oua moreewu ewe tengngú, nge oua oromaaló ewe kamel!
25 “Feiengaw ngenikemi soumak me Farisi, likótuputup ámi! pokiten oua limeti lúkún ewe kap me ewe sepi, nge me lón ra ur ren tipemmóng me ewe mochen apwapwaai pwisin iir.
26 En Farisi mi chuun, akkomw limeti lón ewe kap me ewe sepi, pwe me lúkún repwe pwal liméch.
27 “Feiengaw ngenikemi soumak me Farisi, likótuputup ámi! pokiten oua ussun chék ekkewe peiás mi peinit, ekkewe me lúkúúr ra nikinikin lingéch nge me lón ra ur ren chúún somá me sókkopaten limengaw.
28 Pwal ina ussun, me lúkún oua nikinikin pwúng me ren aramas. Nge me lón, oua ur ren likótuputup me féfféringaw.
29 “Feiengaw ngenikemi soumak me Farisi, likótuputup ámi! pokiten oua férsefáli peiásen ekkewe soufós me elinga peiásen ekkewe chón pwúng,
30 me oua erá, ‘Iká sia manaw le atun semelapach kewe, sisap etiir lón ar nieló ekkewe soufós.’
31 Ina minne, ámi oua pwisin tipi ngenikemi pwe ámi néún chókkewe mi nieló ekkewe soufós.
32 Iwe, oupwe áwesaaló ekkewe angang semelapemi kewe ra poputááni.
33 “Ámi mwirimwirin serepenit mi poison, ifa ussun oupwe sú seni ewe kapwúngún Keena?*
34 Ren ei popun, úpwe tiinaaló remi ekkewe soufós me mwán mi tipáchem me sense. Ekkóch me leir oupwe nireló me eitiweretá wóón irá, me ekkóch leir oupwe awater lón ámi kewe sinakok me eriáfféwúr seni telinimw ngeni telinimw,
35 iei minne, oupwe angei chappen chchaan ekkewe mi pwúng meinisin mi ninniiló lón fénúfan, seni chchaan ewe mi pwúng Epel ngeni chchaan Sekaraia néún Perekia, ewe oua nieló lefilen ewe imwenfel me ewe róngen asor.
36 Enlet úa erenikemi, ei táppin aramas epwe angei chappen ekkeei mettóch meinisin.
37 “Jerusalem, Jerusalem, ewe chón nieló ekkewe soufós me chón manei faw ngeni chókkewe mi tiitiiló reom. A fán fite úa mochen ochufengenni noum kewe ussun án emén inelapen chukó ionifengeni etelin fán péúkásin kewe! Nge ámi ouse mochen.
38 Nengeni! Kot epwe likitaaló* ámi imwenfel.*
39 Pún úa erenikemi, ousap fókkun chúen kúnaei seni iei tori ámi oupwe apasa, ‘Mi feiéch ewe emén mi feito lón iten Jiowa!’ ”*
Footnote
^ Eú kúkkún pwóór mi masou ren ekkewe taropwe mi pin. Ekkewe re Jus ra mwárámwár ussun pwélúpwél pwe minen túmún.
^ Are “fókkun múrinné.”
^ Are “Sense.”
^ Mint, dill me cumin, iir kúkkúnún irá mi máár lón atake aramas ra áeá fán iten ánennen mwéngé.
^ Are ese mwáál, “likit ngenikemi nge a péén.”
^ Krik, “imwemi.”
