Me ren Mattu 25:1-46
25 “Pwal eú, ewe Mwúún láng a ussun chék engol fépwúl* ra angei néúr kewe lamp me feiló pwe repwe chuuri ewe mwán apwúpwúlú.*
2 Nimmén me leir ra tiparoch, me nimmén ra tipáchem.
3 Pún ekkewe mi tiparoch ra uwei néúr kewe lamp nge rese uwou aléléén,
4 nge ekkewe mi tipáchem ra uwei néúr kewe lamp fitifengen me aléléén.
5 Atun ewe mwán apwúpwúlú a mmangoto, iir meinisin ra eiessum me méúrúló.
6 Lukenipwin a wor eú kékké: ‘Iei a war ewe mwán apwúpwúlú! Oune feiló oupwe chuuri.’
7 Iwe, meinisin ekkena fépwúl ra pwáátá me ammólnatá néúr kewe lamp.
8 Ekkewe mi tiparoch ra ereni ekkewe mi tipáchem, ‘Ou ngenikem och ámi kana alélé, pún epwele kun néúm keei lamp.’
9 Ekkewe mi tipáchem ra pélúweni, me apasa: ‘Neman esap naf ngenikem pwal ngenikemi. Oupwe ló ren chókkewe mi amémé, me kamé pwisin ámi.’
10 Atun ra feiló pwe repwe kamé, ewe mwán apwúpwúlú a war. Iwe, ekkewe fépwúl mi mmólnetá ra fitaalong lón ewe kametipen apwúpwúlú, me ewe asam a kappúngúló.
11 Iwe mwirin, ekkewe nimmén fépwúl ra pwal feito me apasa, ‘Mwán apwúpwúlú, mwán apwúpwúlú, kopwe suuk ngenikem!’
12 Lón an pélúweni, a apasa, ‘Úse fókkun silekemi.’
13 “Iei minne, oupwe mammasa, pún ouse silei ewe rán are ewe kulók.
14 “Pwal och, ewe Mwúún láng a ussun chék emén mwán epwele sái towaw, mi kérato néún kewe chón angang me alúkúlúkú ngeniir pisekin kewe.
15 A ngeni emén nimu talent,* pwal emén ruu, me pwal ewe emén eú, a ngeni emén me emén ussun pwisin tufichin, iwe a ló.
16 Mwittir chék, ewe emén mi angei nimu talent a ló me anganga, me a pwal angei nimu.
17 Pwal ina chék ussun, ewe emén mi angei ruu, a pwal angei ruu.
18 Nge ewe emén chón angang mi angei chék eú, a ló me ttu ewe pwúl me opaaló néún an we masta we moni.*
19 “Iwe, mwirin fansoun langattam, néún ekkena chón angang we masta a war me etittina met ra fér ngeni néún we moni.
20 Iwe, ewe emén mi angei nimu talent a feito me lukeato ekkewe pwal nimu talent, a apasa, ‘Masta, ka alúkúlúkú ngeniei nimu talent, nengeni, úa pwal alapaaló wóón nimu.’
21 Néún we masta a ereni: ‘Mi fókkun éch, chón angang mi múrinné me túppwél! Ka túppwél wóón mettóch mi chókúkkún. Ngang úpwe ewisa ngonuk chómmóng mettóch. Kopwe fiti noum masta le pwapwa.’
22 Mwirin, ewe emén mi angei ruu talent a feito me apasa, ‘Masta, ka alúkúlúkú ngeniei ruu talent, nengeni, úa pwal alapaaló wóón ruu.’
23 Néún we masta a ereni: ‘Mi fókkun éch, chón angang mi múrinné me túppwél! Ka túppwél wóón mettóch mi chókúkkún. Ngang úpwe ewisa ngonuk chómmóng mettóch. Kopwe fiti noum masta le pwapwa.’
24 “Sáingolóón, ewe chón angang mi angei eú talent a feito me apasa: ‘Masta, úa silei pwe en emén mwán mi tipepéchékkúl, ka kinikin ia kese amwora ie me ka ioi ikewe kese fóffót ie.
25 Iwe, pokiten úa niwokkus, úa ló ireeló noum we talent lón ewe pwúl. Iei, úa eliwini ngonuk.’
26 Néún we masta a pélúweni, a ereni: ‘Chón angang mi fókkun ngaw me chipwang. Iká ka silei pwe úa kinikin ia úse amwora ie me úa ioi ikewe úse fóffót ie,
27 iwe, pwata chék kese waalong nei moni* lón bank pwe liwinitooi úpwe angei fitifengen me manawan?
28 “ ‘Iei minne, oupwe angei ewe talent seni átena me ngeni ewe emén mi nóm ren ekkewe engol talent.
29 Pún ié mi wor an, Kot epwe pwal ngeni chómmóng, me epwe somwoló an. Nge ewe emén ese wor an, Kot epwe angei seni pwal mwo met mi nóm ren.
30 Me oupwe oturawu ewe chón angang mi lamotongaw lón ewe rochopwak lúkún. Me ikena ie epwe kechiw me akkarúngi ie.’
31 “Lupwen ewe Néún aramas epwe war lón lingan fitifengen me meinisin ekkewe chónláng, iwe i epwe móttiw wóón an we leenien móótun king mi ling.
32 Aramasen meinisin ekkewe mwú repwe ioifengen mwen i, me i epwe áimufeseni aramas lón ruu mwiich, ussun chék án emén chón mmasen siip áimuni ekkewe siip seni ekkewe siike.
33 Me epwe onómu ekkewe siip peliefichin, nge ekkewe siike pelieméngún.
34 “Mwirin, ewe King epwe ereni chókkewe mi nóm peliefichin: ‘Oupwe feito, ámi mi feiéch me ren Semei, oupwe álemwiri ewe Mwú mi mmólnetá fán itemi seni ewe atun aramas ra uputiw wóón fénúfan.
35 Pún úa echik, oua ngeniei met úpwe áni. Úa kaka, oua ngeniei met úpwe únúmi. Úa emén chón ekis, oua awasélaéchúei.
36 Atun ese wor met úpwe úféúf, oua ngeniei úf. Úa semmwen, oua túmúnúei. Úa nóm lón kalapus, oua áámwaei.’
37 Iwe, ekkewe mi pwúng repwe pélúweni i ren ekkeei kapas: ‘Samol, ineet áúa kúna óm echik me áúa amwéngéénuk, are kaka me ngonuk met kopwe únúmi?
38 Ineet áúa kúna pwe en emén chón ekis me áúa awasélaéchuk, are ese wor met kopwe úféúf me áúa ngonuk úf?
39 Ineet áúa kúna pwe ka semmwen are nóm lón kalapus me áúa áámwok?’
40 Lón án ewe King pélúweni epwe ereniir, ‘Enlet úa erenikemi, iká oua féri ena ngeni emén me lein ekkewe mi kisifóchófóch me lein pwii keei, oua féri ngeniei.’
41 “Mwirin, epwe ereni chókkewe mi nóm pelieméngún: ‘Oupwe sú seniei, Kot a fen apwúngúkemi ngeni ewe ekkei esemuch* mi mmólnetá fán iten ewe Tefil me néún kewe chónláng.
42 Pún úa echik, nge ouse ngeniei met úpwe áni. Me úa kaka, nge ouse ngeniei met úpwe únúmi.
43 Atun ngang emén chón ekis, ouse awasélaéchúei. Atun ese wor met úa úféúf, ouse ngeniei úf. Atun úa semmwen me nóm lón kalapus, ouse túmúnúei.’
44 Mwirin, repwe pwal pélúweni ren ekkeei kapas: ‘Samol, ineet áúa kúnók pwe ka echik are kaka are chón ekis are ese wor met kopwe úféúf are semmwen are nóm lón kalapus me áúse álisuk?’
45 Mwirin epwe pélúweniir, me apasa: ‘Enlet úa erenikemi, pokiten ouse féri ena ngeni emén me lein ekkeei mi kisifóchófóch, ouse féri ngeniei.’
46 Ekkeei repwe kúna máló fóchófóch, nge ekkewe mi pwúng repwe kúna manaw esemuch.”
Footnote
^ A wewe ngeni fépwúl esaamwo tori mwán.
^ A wewe ngeni ewe mwán epwele apwúpwúlú.
^ Krik, “silifer.”
^ Krik, “silifer.”
