Me ren Mattu 4:1-25
4 Iwe, ewe ngún mi fel a emmwenaaló Jises ngeni ewe fénúpéén, mwirin ewe Tefil a sótuni i.
2 Mwirin an echikefel ren 40 rán me 40 pwiin, a meefi an echik.
3 Iwe, ewe Chón Otuputup a etto ren me ereni: “Iká en néún Kot, kopwe ereni ekkeei faw ar repwe wiliiti féún pilawa.”
4 Nge a pélúweni: “A makketiw, ‘Aramas resap manaw ren chék pilawa, nge ren iteiten kapas mi feito seni awen Jiowa.’ ”*
5 Mwirin, ewe Tefil a uwealó ngeni ewe telinimw mi pin, me a onómu i wóón ungen ewe imwenfel.
6 A ereni: “Iká en néún Kot, kopwe oturuketiw, pún a makketiw, ‘I epwe allúkú ngeni néún kewe chónláng ar repwe túmúnuk,’ me ‘Repwe pwikuk pwe pecheom esap kkúú eféú faw.’ ”
7 Jises a ereni: “A pwal makketiw, ‘Kosap sótuni Jiowa* óm Kot.’ ”
8 Ewe Tefil a pwal uwealó i ngeni eú chuuk mi fókkun tekia me a ékúna ngeni meinisin mwúún fénúfan me linger.
9 A ereni: “Úpwe fang ngonuk ekkeei mettóch meinisin iká kopwe chapetiw me eáni eú féfférún fel ngeniei.”
10 Iwe, Jises a ereni: “Súló Setan! Pún a makketiw, ‘Kopwe fel ngeni Jiowa* óm Kot, me kopwe angang ngeni i chék.’ ”
11 Iwe, ewe Tefil a ló seni, me nengeni! ekkewe chónláng ra war me poputá le álisi i.
12 Iwe, lupwen a rong pwe Jon a ares, a feiló ngeni Kalili.
13 Mwirin an ló seni Nasaret, a feiló nónnóm lón Kaperniom, ewe mi nóm únúkkún ewe sáát lón ekkewe fénú Sepulon me Naftali,
14 pwe epwe pwénúetá alon Kot me ren ewe soufós Aisea, ewe a apasa:
15 “Aramasen lón fénúen Sepulon me fénúen Naftali, mi nónnóm wóón ewe al ale ngeni ewe sáát, epek ewe Jortan, Kalili ikewe aramasen ekkewe ekkóch mwú ra nónnóm ie!
16 Ekkewe aramas mi mómmóót lón kiroch ra kúna eú watteen saram, me chókkewe mi mómmóót lón fénúen núrún máló, saram a ttinetiw wóór.”
17 Seni ena fansoun, Jises a poputá le afalafal me apasa: “Oupwe áier pwe ewe Mwúún láng a arapoto.”
18 Lupwen a fetál órun ewe Setin Kalili* a kúna rúúemén pwipwi, Simon, pwal itan Piter, me pwiin we Andru, ra oturu néúr we epino lón ewe nóóm pún iir chón attaw.
19 A ereniir: “Oupwe tapwoto mwiri pwe úpwe áiti ngenikemi ifa ussun oupwe chón attawa aramas.”
20 Ra mwittir likitaaló néúr kewe epino me tapweló mwirin.
21 Lupwen a feiló seni ikena, a kúna pwal rúúemén pwipwi, Jemes me pwiin we Jon, iir néún Sepeti. Ra nóm ren Sepeti wóón ewe waa, me ra onefi néúr kewe epino, me i a kériir.
22 Ra mwittir likitaaló ewe waa me semer we me tapweló mwirin.
23 Iwe, a fetálfeil lón unusen Kalili, asukul lón ar kewe sinakok me afalafala kapas allimen ewe Mwú me echikaraatá meinisin sókkun semmwen me meinisin sókkun apwangapwang lein ekkewe aramas.
24 Pwóróusan a chéúfetál lón unusen Siria. Iwe, ra uweato ren meinisin chókkewe mi riáfféú ren sókkopaten semmwen me metek, chókkewe ekkewe timon ra wáániir me ekkewe mi máán kawakaw me peeló inisiir, iwe i a echikareretá.
25 Iwe, eú mwichemmóngun aramas seni Kalili, Tekapolis,* Jerusalem, Jutia, me seni epek ewe Jortan ra tapweló mwirin.
Footnote
^ Eú watteen konik. A pwal iteni Nómun Kenesaret, me ewe Setin Taipirios.
^ Are “ekkewe engol telinimw.”
