Me ren Mattu 7:1-29
7 “Oupwe úkútiw le apwúngú ekkewe ekkóch, pwe oute kúna apwúng.
2 Pún ewe napanapen apwúng oua apwúngú ekkewe ekkóch wóón, pwal ina napanapen ewe apwúng oupwe kúna, me napanapemi* ngeni ekkewe ekkóch epwe pwal ina napanaper ngenikemi.
3 Iwe, pwata ka kúna ewe ekis pipiin fetil lón mesen pwiium we, nge kese kúna ewe kasso lón pwisin mesom?
4 Are ifa ussun ka tongeni ereni pwiium, ‘Kopwe mut ngeniei ái úpwe uwawu ewe ekis pipiin fetil me lón mesom,’ nge nengeni, ena kasso mi nóm lón pwisin mesom?
5 En mi likótuputup! Kopwe akkomw uwawu ewe kasso seni pwisin lón mesom, mwirin ka tongeni kúnaéchú ifa ussun kopwe uwawu ewe ekis pipiin fetil seni lón mesen pwiium we.
6 “Ousap ngeni ekkewe kolak minne mi pin are manei ngeni ekkewe pik néúmi kewe faw aúchea,* pwe rete puratiw me kullutikemi me efeiengawakemi.
7 “Oupwe tittingor me oupwe angei, oupwe kúkkútta me oupwe kúna, oupwe fiffichifich me epwe suuk ngenikemi,
8 pún meinisin mi tittingor mi angei, me meinisin mi kúkkútta mi kúna, me meinisin mi fiffichifich epwe suuk ngeniir.
9 Pwe itá ié me leimi epwe ngeni néún át eféú faw iká a tingor pilawa?
10 Are iká a tingor emén iik, esap ngeni emén serepenit, iká met?
11 Ina minne, ikáámwo ámi mi ngaw nge oua silei ifa ussun oupwe liffang ngeni néúmi kewe liffang mi múrinné, epwele fen ifa me án Sememi we mi nóm lón láng fangoló mettóch mi múrinné ngeni chókkewe mi tittingorei i!
12 “Ina minne, mettóch meinisin oua mochen aramas repwe féri ngenikemi, oupwe pwal féri ngeniir. Pún iei met ewe Allúk me ekkewe Soufós ra apasa.
13 “Oupwe tolong lón ewe asam mi pwangekúkkún, pún a pwangemmóng ewe asam me a wámmóng ewe al mi aleló ngeni kitetter, me a chómmóng ra fetál wóón.
14 Nge a pwangekúkkún ewe asam me a wákúkkún ewe al mi aleló ngeni manaw, me chókúkkún ra kúna.
15 “Oupwe mammasa ren ekkewe soufós chofona mi feito remi lón fouten siip, nge me lón, iir wolif mi mwacho.
16 Ren uwaar kewe oupwe silleniir. Ese fókkun tufich án aramas repwe kini féún kreip are fiik seni irá félúfél, iká met?
17 Pwal ina chék ussun, iteiten irá mi múrinné epwe uwaani uwa mi múrinné, nge iteiten irá mi ngaw epwe uwaani uwa mi ngaw.
18 Efóch irá mi múrinné ese tongeni uwaani uwa mi ngaw, nge efóch irá mi ngaw ese tongeni uwaani uwa mi múrinné.
19 Iteiten irá ese uwaani uwa mi múrinné epwe pékúpékúló me kóturulong lón ekkei.
20 Enlet, oupwe silleni chókkana ren uwaar kewe.
21 “Esap meinisin mi apasa ngeniei, ‘Samol, Samol,’ epwe tolong lón ewe Mwúún láng, pwe ewe chék emén mi féri letipen Semei we mi nóm láng.
22 Chómmóng repwe apasa ngeniei lón ena rán: ‘Samol, Samol, esap pwe áúa osuni lón itom, me asúoló ekkewe timon lón itom, me féri chómmóng manaman lón itom?’
23 Mwirin úpwe ereniir: ‘Úse fókkun silekemi! Oupwe sú seniei, ámi chón féfféringaw!’
24 “Ina minne, iteiten emén me emén mi rong aloi keei me apwénúretá, epwe ussun emén mwán mi tipáchem mi aúetá imwan wóón achaw.
25 Mwirin, a púng útemmóng me a pwu me ewe enienin ásepwál a eniiti ena imw, nge ese ta pwe a lóngólóng wóón achaw.
26 Pwal och, iteiten emén me emén mi rong aloi keei nge ese apwénúretá, epwe ussun emén mwán mi tiparoch mi aúetá imwan wóón ppi.
27 Mwirin, a púng útemmóng me a pwu me ewe enienin ásepwál a eniiti ena imw, iwe a turuló me unusen taló.”
28 Lupwen Jises a áwesaaló ekkeei kapas, ewe mwichen aramas a fókkun mwaar ren napanapen an asukul,
29 pún i a asukuler ussun emén mi wor an nemenem me ren Kot, nge esap ussun néúr kewe soumak.
