Me ren Mattu 9:1-38
9 Iwe, a tétá wóón ewe waa, a sáiló ewe epek me ló ngeni telinimwan we.
2 Me nengeni! ra uweato ren emén mwán mi peeló inisin mi kokkoon wóón eú leenien keki. Atun Jises a kúna ar lúkú, a ereni ena mi peeló inisin: “Nei, kosap lólilen! Óm kewe tipis ra musoló.”
3 Iwe, ekkóch soumak ra ekieki: “Ei mwán a eáni kapasen ú ngeni Kot.”
4 Nge Jises a silei ekiekiir, a erá: “Pwata oua ekieki mettóch mi ngaw lón letipemi?
5 Áwewe chék, menni leir a mecheres le apasa, ‘Óm tipis a musoló,’ are, ‘Pwáátá me fetál’?
6 Iwe nge, ren ámi oupwe silei pwe a wor án ewe Néún aramas pwúúng wóón fénúfan le omusaaló tipis—” a ereni ewe mi peeló inisin: “Pwáátá, angei óm leenien keki me feiló ngeni imwom.”
7 Iwe a pwáátá me ló ngeni imwan.
8 Lupwen ekkewe aramas ra kúna ei, ra niwokkus me ra elingaaló Kot, ewe mi fang ena sókkun pwúúng ngeni aramas.
9 Mwirin, atun Jises a ló seni ikena, i a kúna emén mwán itan Mattu mi mómmóót lón ewe ofesin angei takises, me a ereni: “Kopwe tapwoto mwiri.” Iwe, a útá me tapweló mwirin.
10 Mwirin, atun Jises a mwéngé* lón ewe imw, nengeni! chómmóng chón angei takises me chón tipis ra feito me poputá le fiti i me néún kewe chón káé le mwéngé.*
11 Nge atun ekkewe Farisi ra kúna, ra ereni néún kewe chón káé: “Pwata néúmi na sense a mwéngé ren ekkewe chón angei takises me chón tipis?”
12 Lupwen a rong alor, a apasa: “Aramas mi péchékkúl ese lamot ngeniir tokter, nge fen ekkewe mi semmwen.
13 Iwe, feiló me káé met weween ei: ‘Úa mochen úméúméch, nge esap asor.’ Pún úa feito pwe úpwe kéri ekkewe chón tipis, nge esap aramas mi pwúng.”
14 Mwirin, néún Jon kewe chón káé ra feito ren me eisini: “Pwata ám me ekkewe Farisi áúa kan echikefel nge noum kewe chón káé rese echikefel?”
15 Iwe, Jises a ereniir: “Ese wor popun án chiechien ewe mwán apwúpwúlú repwe letipeta atun ewe mwán apwúpwúlú a nóm rer, iká met? Nge epwe war ewe fansoun atun ewe mwán apwúpwúlú esap chúen nóm rer, iwe repwe echikefel.
16 Ese wor emén a eppinesa eché úféúfen lúkún mi mes ngeni mangaak mi fé. Pún ewe mineféén mangaak epwe núrúfengen me ewe kamw epwe watteeló.
17 Ese pwal wor aramas epwe ninaalong mineféén wain lón eú leenien wain seni silin man mi mes. Pún iká ra ina ussun, ewe leenien wain seni silin man epwe kamw me ewe wain epwe niló me ena leenien wain epwe ta. Nge aramas ra ninaalong mineféén wain lón mineféén leenien wain seni silin man, iwe, iir me ruu ra túmún.”
18 Atun an ereniir ekkeei mettóch, nengeni! emén néúwisin sinakok a feito asamolu* i, a apasa: “Iei, ese mwáál nei we nengngin a máló, nge kopwe feito me isettá poum wóón me i epwe manaw.”
19 Iwe, Jises a útá me tapweló mwirin, me néún kewe chón káé ra fiti.
20 Me nengeni! emén fefin mi riáfféú úkúúkún 12 ier ren an pwu seni chcha a feito me lúkúsékúrún me attapa lepwúlún úfan we úféúfen lúkún,
21 pún a kan akkapasa ngeni pwisin i: “Iká úpwe chék attapa úfan nan úféúfen lúkún, úpwe chikar.”
22 Jises a kul me a kúna neminna me erá: “Nei, kosap niwokkus! Óm lúkú a echikaróketá.” Iwe seni ena kulók ewe fefin a chikar.
23 Iwe, lupwen a tori imwen ewe néúwisin sinakok me a kúna ekkewe chón ettik pisekin nikáttik me ewe mwichen aramas mi léúwommóng le kechiw,
24 Jises a apasa: “Oupwe ló seni ei leeni, pún ei nengngin ese máló, nge a méúr.” Iwe, ra fókkun takiri.
25 Atun chék ekkewe aramas ra towu lúkún, a tolong me amwéchú péún, me ewe nengngin a pwáátá.
26 Iwe, ena pwóróus a chéúfetál lón unusen ena leeni.
27 Lupwen Jises a ló seni ikena, rúúemén mwán mi chuun ra tapweló mwirin me léúwommóng le apasa: “Néún Tafit, kopwe úméúméch ngenikem.”
28 Mwirin an a tolong lón ewe imw, ekkewe mwán mi chuun ra etto ren Jises me i a eisiniir: “Ámi mi lúkú pwe úa tongeni féri ei?” Ra pélúweni: “Ewer, Samol.”
29 Iwe, a attapa meser me apasa: “Epwe fis ngenikemi minne oua eáni lúkú.”
30 Iwe, ra kúna mwer. Iwe, Jises a pwal fókkun éúréúrer, a erá: “Ppii pwe esap wor emén epwe silei.”
31 Nge mwirin ar ra towu lúkún, ra apwóróusafetálei ussun i lón unusen ena leeni.
32 Nge lupwen repwele feiló, nengeni! aramas ra wato ren emén mwán mi awemwéch, timon mi wááni.
33 Iwe, mwirin án Jises atowu ewe timon, ewe mwán mi awemwéch a fós. Iwe, ewe mwichen aramas a ingeló me apasa: “Sise fókkun kúna fán eú ei sókkun lón Israel.”
34 Nge ekkewe Farisi ra apasa: “A atowu ekkewe timon ren álillisin ewe sounemenemen ekkewe timon.”
35 Me Jises a fetálfeil lón unusen ekkewe telinimw me sóópw me asukul lón ar kewe sinakok me afalafala kapas allimen ewe Mwú me echikaraatá meinisin sókkun semmwen me meinisin sókkun apwangapwang.
36 Atun a kúna ekkewe aramas, a fókkun tongeer pokiten ra ussun siip ese wor chón mmaser mi sáreló únúchen inisiir me torongawfeil.
37 Mwirin, a ereni néún kewe chón káé: “Ewer, ewe ráás mi watte nge ekkewe chón angang iir mi chókúkkún.
38 Ina minne, oupwe tingormaw ngeni ewe Mastaan ráás an epwe tiinaato chón angangen an we ráás.”
Footnote
^ Are “móót tiwiniin órun ewe cheepel.”
^ Are “móót tiwiniin órun ewe cheepel.”
^ Are “chapetiw ngeni.”
