Ngeni Ekkewe Chón Rom 1:1-32
1 Paul, emén slave ngeni Kraist Jises me a ké ngeni an epwe emén aposel, epwe káimuuló fán iten án Kot kapas allim,
2 ewe a fen pwonei me lóóm me ren néún kewe soufós lón ekkewe Taropwe mi Pin,
3 ewe kapas allim ussun Néún we, ewe a uputiw wóón fénúfan ussun emén mwirimwirin Tafit.
4 Ren manamanen ewe ngún mi fel, ewe Naw a manawsefál seni máló, me ena a pwáraatá pwe i ewe Néún Kot. Ei emén, i ach we Samol Jises Kraist.
5 Ren i, áúa angei kirekiréch mi somwoló me ewe angangen aposel pwe aramasen meinisin ekkewe mwú repwe eáni lúkú me álleasochisi i pwe repwe elingaaló itan we,
6 me lein ekkena mwú ámi oua pwal ké pwe oupwe néún Jises Kraist—
7 ngeni meinisin néún Kot kewe mi áchengicheng mi nóm lón Rom, mi ké pwe repwe aramas mi pin:
Amwo epwe nóm remi ewe kirekiréch mi somwoló me ewe kinamwe seni Kot Semach we me ewe Samol Jises Kraist.
8 Akkomwan, lón iten Jises Kraist úa kilisou ngeni ái we Kot fán iten ámi lúkú, pokiten aramas ekis meinisin ra kakkapas ussun ámi lúkú.
9 Úa angang ngeni Kot seni unusen letipei, úa aronga ewe kapas allim ussun Néún we. I a tongeni pwáraatá ussun ái úse úkútiw le féúnikemi iteitan lón ái kewe iótek,
10 úa tingormaw pwe iká epwe tufich, epwe sópwéch ái feiló remi are iei letipen Kot.
11 Pún úa fókkun mochen kúnakemi, pwe úpwe ngenikemi eú liffang seni Kot* pwe oupwe péchékkúleló.
12 Me úa pwal mochen kúnakemi pwe sipwe apéchékkúlafengenikich. Iwe, sipwe apéchékkúla emén me emén leich ren ewe lúkú mi nóm rei me ewe mi nóm remi.
13 Nge ámi pwii kana, úa mochen pwe oupwe silei pwe fán chómmóng úa ekiekin feiló remi, pwe ái angangen afalafal ikena epwe uwaéch ussun chék pwal lón ekkewe ekkóch mwú. Nge iteitan a wor met a pinei ái úpwe feiló.
14 A wor wisei* ngeni ekkewe chón Krik me ekkewe chón ekis,* ngeni ekkewe mi tipáchem me ekkewe mi tiparoch.
15 Ina minne, úa pwal fókkun mochen afalafala ewe kapas allim ngenikemi ikena lón Rom.
16 Pún úse sáwásini ewe kapas allim. Pún ren enletin, iei ewe manamanen Kot fán iten amanawen meinisin mi wor ar lúkú, ngeni ekkewe chón Jus akkomw me pwal ngeni ekkewe chón Krik.
17 Ren ewe kapas allim, án Kot pwúng a pwááló ngeni chókkewe mi lúkú lón i, me ei a apéchékkúlaló ar lúkú, ussun chék met a makketiw: “Nge ekkewe chón pwúng repwe manaw ren lúkú.”
18 Ewe Kot lón láng a pwáári an lingeringer ngeni ekkewe aramas rese álleasochisi i me ekkewe aramas rese pwúng. Iir ra féri ekkewe mettóch ese pwúng pwe repwe eppeti aramas seni ar silei minne mi enlet.
19 Itá repwele fen silei Kot, pún i a fen pwáári ngeniir chómmóng mettóch.
20 Pún inaamwo iká aramas rese tongeni kúna Kot, nge seni ewe fansoun a fférútá fénúfan mi tufich ar repwe silei pwe a wor an manaman esemuch me i wesewesen Kot. Pokiten ra tongeni weweiti seni ekkeei mettóch a féraatá, iwe, ese wor ar kúnetipingen.
21 Pún inaamwo iká ra silei Kot, nge rese elingaaló i ussun emén Kot are kilisou ngeni. Ar ekiek a lamotongawoló me letiper mi wewemmang a rocholó.
22 Inaamwo iká ra erá pwe iir mi tipáchem, nge ra tiparocholó
23 me ra okullu lingen ewe Kot mi manaw tori feilfeiló* ngeni ekkewe uluulun mi ussun aramas mi tongeni máló, ekkóch uluulun mi ussun machchang, ménúmanaw mi wor fófóch pecher me ekkewe man mi té wóón fénúfan.
24 Ina minne, pokiten ra mochen féri pwisin mocheniir, Kot a mut ngeniir ar repwe féri ekkewe mettóch mi limengaw mi ésúfélúngawa inisiir.
25 Ra ekkesiwili ewe enlet ussun Kot ngeni minne mi chofona, ra fel ngeni me angang ngeni met mi fférútá nge esap fen ewe Chón Féraatá, ewe mi wor an ling tori feilfeiló chék. Amen.
26 Ina popun, Kot a mut ngeniir ar repwe nóm fán nemenien mochenian futuk mi ánnioput. Ekkewe fefin ra eáni féffér ese pwúng inaamwo iká Kot ese fériiretá pwe repwe eáni ena sókkun napanap.
27 Pwal ina ussun chék ren ekkewe mwán, ra likitaaló ar repwe chék méúr ren fefin, ra fókkun mocheniafengen lefiler, me ra féri lefiler ekkewe mettóch mi annou, iir pwisin repwe kúna riáfféú ren met mi fich ngeniir me ren ar kewe féfférmwáál.
28 Pokiten rese meefi lamoten ar repwe silei Kot,* Kot a ásechiireló ngeni ar kewe ekiek mi ngaw, pwe repwe féri ekkewe mettóch ese fich.
29 Ra ur ren meinisin sókkun minne ese pwúng, féfféringaw, tipemmóng,* me minne mi ngaw. Ra ur ren lólówó, nimanaw, ánini, otuputup, me chúngaw. Ra ngúnúngún,*
30 iir chón eitengawa aramas, chón oputa Kot, turunufas, lamalamtekia, sikesik, chón ekiekietá mettóch mi ngaw, álleasolap ngeni sam me in,
31 ese wor ar wewe, rese wenechar lón ar etipeeú, ese wor ar tong, ese wor ar úméúméch.
32 Inaamwo iká iir ra unusen silei án Kot allúk mi pwúng—pwe chókkewe mi éérenaaló le féri ekkena sókkun mettóch ra fich ngeni máló—nge ra chék féffériir me pwal tipeeú ngeni chókkewe mi éérenaaló le fériir.
Footnote
^ Are “áeá tufichi me ren Kot.”
^ Krik, “ái liwinimmang.”
^ Are “ekkewe esap chón Krik.”
^ Are “esap máló.”
^ Are “rese tipeeú ngeni ar repwe silei enletin pwóróus ussun Kot.”
^ Are “mochenia.”
^ Are “uwofós.”
