Ngeni Ekkewe Chón Rom 10:1-21
10 Pwii kaan, úa mochen seni lón letipei me iótek ngeni Kot pwe repwe kúna manaw.
2 Pún úa pwáraatá ussur pwe a wor ar tinikken fán iten Kot, nge esap ren sile mi pwúng.
3 Iir rese onómu pwisin iir fán án Kot pwúng pokiten rese silei án Kot pwúng, nge ra fen achocho le ánnetatá pwe pwisin iir ra pwúng.
4 Pún Kraist i sópwólóón ewe Allúk, pwe meinisin mi anganga ar lúkú repwe tongeni kúna pwúng.
5 Pún Moses a mak ussun met mi pwúng me ren ewe Allúk: “Ewe aramas mi féri ekkeei mettóch epwe manaw rer.”
6 Nge ewe pwúng pokiten lúkú a apasa: “Kosap apasa lón letipom, ‘Ié epwe feitá lón láng?’ weween, pwe epwe uweatiw Kraist,
7 are, ‘Ié epwe feitiw lón ewe pwaang mi alóllóól?’ weween, pwe epwe uweatá Kraist seni máló.”
8 Nge met a apasa? “Ewe kapas a arap ngonuk, lón pwisin awom me lón pwisin letipom,” weween, “ewe kapasen” lúkú, ewe sia afalafala.
9 Pún iká ka pwáraatá ren awom mwen mesen aramas pwe Jises i óm Samol, me anganga óm lúkú lón letipom pwe Kot a amanawaatá i seni máló, kopwe kúna manaw.
10 Pún ren ewe letip emén a anganga an lúkú fán iten minne mi pwúng, nge ren ewe aw emén a pwáraatá lein aramas fán iten amanaw.
11 Pún ewe taropwe mi pin a apasa: “Ese wor emén mi onómu an lúkú wóón i epwe lichippúng.”
12 Pún ese wor sókkofesen lefilen ekkewe chón Jus me Krik. A wor emén chék Samol fán iten meinisin, ewe a fangafangéch ngeni meinisin chókkewe mi kékkéri i.
13 Pún “meinisin mi kéri iten Jiowa* repwe kúna manaw.”
14 Iwe nge, ifa ussun repwe kéri iká rese eáni lúkú lón i? Nge ifa ussun repwe eáni lúkú lón i iká rese rong ussun? Nge ifa ussun repwe rong iká pwe ese wor emén a afalafal?
15 Nge ifa ussun repwe afalafal iká rese tiitiiló? Ussun chék met ei a makketiw: “A ifa me lingéchún pechen chókkewe mi afalafala kapas allimen ekkewe mettóch mi múrinné!”
16 Nge esap iir meinisin ra álleasochisi ewe kapas allim. Pún Aisea a apasa: “Jiowa,* ié epwe eáni lúkú lón ewe mettóch repwe rong senikem?”*
17 Ina minne, emén aramas a chék eáni lúkú mwirin an rong ewe kapas. Nge a rong ewe kapas lupwen emén a afalafala ussun Kraist.
18 Nge úa eis, met, rese mwo rong? Pwata, nge ren enletin, “méngúngúúr a towu lón unusen fénúfan, me ar pwóróus a towu ngeni lesopwun fénúfan.”
19 Nge úa eis, met, Israel ese mwo silei? Akkomw Moses a apasa: “Ren ekkewe aramas iir seni ekkewe ekkóch mwú, ngang úpwe amwékútúkemi pwe oupwe lólówó. Nge ren chón eú mwú mi umwes, ngang úpwe amwékútúkemi pwe oupwe fókkun song.”
20 Nge Aisea a fókkun pwora me a apasa: “Chókkewe rese kúttaei ra kúnaei. Chókkewe rese eis ngang úa pwá ngeniir.”
21 Nge iei met a apasa ussun Israel: “Unusen rán úa eitiewu pei ngeni ekkewe aramas mi álleasolap me tipeférea.”
