Ngeni Ekkewe Chón Rom 11:1-36
11 Mwirin úa eis, met, Kot a likitaaló néún kewe aramas? Esap fókkun ina! Pún ngang pwal emén chón Israel, seni mwirimwirin Eperiam, seni ewe einangen Peniamin.
2 Kot ese likitaaló néún kewe aramas, ekkewe i a akkomw filiretá. Ouse silei met ewe taropwe mi pin a apasa ussun Elias, ussun an ngúnúngúnúngawa ekkewe chón Israel ngeni Kot?
3 “Jiowa,* ra nieló noum kewe soufós, ra ttuetá óm kewe róóng, me ngang chék lusun, me iei ra sótun angealó manawei.”
4 Nge met Kot a pélúwen ngeni? “Úa isoni fán itei 7,000 mwán, ekkewe rese fotopwásuk ngeni Paal.”
5 Iwe, pwal ina chék ussun, lón pwal ei fansoun, a wor lusun ekkewe chón Israel iir kewe Kot a filiretá me ren an kirekiréch mi somwoló.
6 Iwe, iká ren kirekiréch mi somwoló, esap chúen ren féffér. Pún iká ren féffér, iwe ewe kirekiréch mi somwoló esap chúen kirekiréch mi somwoló.
7 Iwe met? Ewe mettóch Israel a fókkun mochen, esap iir meinisin ra angei, nge chókkewe chék ra filitá me ren Kot, iir ra angei. Ekkewe lusun, rese mochen aúseling,
8 ussun chék met a makketiw: “Kot a efisi án letiper epwe méúrúchou, meser esap kúna me selinger esap rong, tori ikenái.”
9 Tafit a pwal apasa: “Ar cheepel epwe wiliiti eú ssárer me eú nikatupur me eú minen áchepetekiir me eú kapwúngúúr.
10 Meser kewe repwe rocholó pwe resap tongeni kúner, me fansoun meinisin kopwe apworafengeni sékúrúr.”
11 Iwe úa eis, met, ra chepetek me unusen turutiw? Fókkun aapw! Nge pokiten ar mwáálliló lón ipwer, a wor amanaw ngeni aramasen ekkewe ekkóch mwú, iwe a amwékútúúr ar repwe lólówó.
12 Iwe, iká ar mwáálliló lón ipwer a wewe ngeni feiéch ngeni fénúfan me ar chókúkkúnúló a wewe ngeni feiéch ngeni aramasen ekkewe ekkóch mwú, epwele ifa me watteen ar feiéch atun a unusoló chóchóór!
13 Iei úpwe kapas ngenikemi ámi aramasen ekkewe ekkóch mwú. Pokiten ngang emén aposel ngeni chón ekkewe ekkóch mwú, ngang úa elingaaló ái angang ngeni Kot
14 pwe úpwe ppii iká lón menni napanap úa tongeni efisi án nei kewe aramas* repwe lólówó me seláni ekkóch seni me leir.
15 Pún iká kóturulóór a wewe ngeni chásefál fán iten fénúfan, iwe ar ketiw epwe wesewesen wewe ngeni manaw seni máló.
16 Pwal och, iká ewe kinikinin pilawa mi éúwéú ra eáni mwenuwa a pin, unusen ewe pilawa mi éúwéú a pwal pin. Me iká ewe waaren irá a pin, pwal ekkewe palan.
17 Iwe nge, Kot a kupietiw ekkóch me lein palen ewe irá olif, me ikáámwo ámi palen efóch irá olifen lein petewel, i a pachekemiitá ngeni ena irá me ámi oua pwal kúna feiéch seni waaran we.
18 Ousap lamalamtekia ngeni ekkena palen irá Kot a kupietiw, pún esap ámi oua amanawa ewe waaren irá, nge ewe waaran a amanawakemi.
19 Mwirin, oupwe apasa: “Ekkewe palan ra kuputiw pwe áúpwe pachetá.”
20 Mi pwúng! Pokiten ese wor ar lúkú, ra kupukuputiw, nge ámi oua útá ren lúkú. Ousap lamalamtekia, nge oupwe niwokkus.
21 lká Kot a kupietiw pwisin palen ewe irá olif, iwe pwal ámi oua tongeni pwal kupukuputiw.
22 Ina minne, oupwe ekieki ussun án Kot kirekiréch me an kapwúng. A wor kapwúng ngeni chókkewe ra turutiw, nge ngenikemi, a wor án Kot kirekiréch iká oupwe nónnóm lón an we kirekiréch, nge iká esap ina, pwal ámi oupwe pékúpékútiw.
23 Me pwal iir, iká ra pwáári lúkú, iir repwe pachapachetá pún Kot a tongeni pacheesefáliiretá.
24 Kot a fen pékúkemiitiw seni ewe irá olifen lein petewel me pachekemiitá wóón ewe irá olif mi mááritá lón eú tánipi, inaamwo iká esap itá iei pwúkúpwúkún fférún. Iwe, epwele fen ifa me án palen pwisin ei irá olif repwe pachapachsefálitá wóón pwisin iráár na!
25 Ámi pwii kana, úa mochen ámi oupwe silei met Kot a amonomonaló pwe oute ekieki pwe oua kon tipáchem. Ren enletin, iei met Kot a amonomonaló: Ekkóch aramasen Israel ra aféreaai letiper, epwe fis ei tori án unusen chóchóón ekkewe mi kefil seni aramasen ekkewe ekkóch mwú a unusoló,
26 iwe, iei ussun unusen Israel epwe kúna manaw. Ussun chék met a makketiw: “Ewe chón amanaw* epwe towu seni Sion me epwe okullaaló féfférún ésúfélúngawa Kot seni Jekop.
27 Me iei ái we pwonen etipeeú ngeniir, lupwen úa angei seniir ar kewe tipis.”
28 Enlet, ra chón oputa Kot pokiten ra tunaaló ewe kapas allim, me ámi oua kúna feiéch seni ena. Nge pokiten ewe pwon Kot a eáni ngeni semelaper kewe, a filaatá ekkóch me leir pwe repwe chiechian.
29 Pún án Kot kewe liffang me an we kékké, esap ikkena ekkewe mettóch epwe niamam ren.
30 Me mwan, ámi ouse álleasochisi Kot, nge iei a úméúméch ngenikemi pokiten án ekkewe chón Jus álleasolap.
31 Iwe, i a úméúméch ngenikemi pokiten án ekkewe chón Jus álleasolap, iwe pokiten ena, a pwal tongeni úméúméch ngeni ekkewe chón Jus.
32 Kot a mut ngeniir ar repwe ussun chón fétek pokiten ar álleasolap pwe epwe tongeni pwáár ngeniir meinisin úméúméch.
33 A ifa me amwararen alóllóólun wéún Kot me an tipáchem me sile! Ié a tongeni weweiti minne Kot a apwúngaló! Ié a tongeni silei an kewe angang!
34 Pún “ié a tongeni silei án Jiowa* ekiek, are ié a tongeni wiliiti néún chón éúréúr?”
35 Are, “ié a akkomw ngeni Kot och mettóch pwe epwe lamot an epwe méén ngeni i?”
36 Pún mettóch meinisin seni i me ren i me fán iten i. I epwe ling tori feilfeiló chék. Amen.
