Ngeni Ekkewe Chón Rom 12:1-21
12 Iei minne, ámi pwii kana, úa tingor ngenikemi ren ewe úméúméchún Kot, pwe oupwe fangoló inisimi ussun eú asor mi manaw, mi fel, me mi ketiw me ren Kot, pwe oupwe tongeni angang ngeni Kot ren unusen ekiekimi.
2 Me ousap chúen mut ngeni ei fénúfan an epwe anapanapaakemi,* nge oupwe wililó ren ámi ekkesiwili ekiekimi, pwe oupwe pwáraatá ngeni pwisin ámi ewe letipen Kot, ewe mi múrinné me fich me unuséch.
3 Pún ren ewe kirekiréch mi somwoló a kawor ngeniei, úa erenikemi meinisin mi nóm ikena pwe ousap ekieki pwe oua aúchea lap seni minne a fich. Nge oupwe fen pwáári pwe oua eáni ekiekéch me ren ewe úkúúkún lúkú Kot a fen fang* ngeni emén me emén ámi.
4 Pún ussun chék eú inis mi wor chómmóng kifetin, nge kifetin kana meinisin rese léllé anganger,
5 iwe kich, inaamwo iká sia chómmóng, sia eú inis pokiten sia tipeeú ngeni Kraist, me pwal kich ekkewe kifet mi ririfengen lefilach.
6 Iwe, pokiten a wor liffangach kewe mi sókkofesen mi alóngólóng wóón ewe kirekiréch mi somwoló mi kawor ngenikich, iká ewe liffangen oesini, sipwe osuni me ren aúkúkún ach lúkú,
7 are iká angang fán iten Kot, sipwe akkangang fán iten Kot. Are ewe emén mi asukul, i epwe akkasukul,
8 are ewe emén mi awora kapasen apéchékkúl,* epwe akkawora kapasen apéchékkúl, ewe emén mi fang,* epwe fangafangéch, ewe emén mi emmwen, epwe féri fán tinikken,* ewe emén mi pwáári úméúméch, epwe féri fán pwapwa.
9 Ámi tong esap likótuputup. Oupwe oputa minne mi ngaw, kémwéchúnúk wóón minne mi múrinné.
10 Oupwe tongfengen lefilemi ussun chék chón lón eú famili. Oupwe akkomw le pwáraatá súfél lefilemi.
11 Oupwe chófó,* ousap chipwang.* Oupwe mut ngeni ewe ngún mi fel an epwe efisi ámi tinikken. Oupwe slave fán iten Jiowa.*
12 Oupwe pwapwa lón ewe ápilúkúlúk. Likiitú fán ámi riáfféú. Oupwe sópweeló le ikkiótek.
13 Oupwe álisi ekkewe aramas mi pin me ren aúkúkún ar osupwang. Oupwe éérenaaló le awasélaéchú aramas.
14 Oupwe efeiéchú ekkewe chón eriáfféwúkemi, oupwe efeiéchúúr nge ousap anúmamawer.
15 Oupwe eti ekkewe mi pwapwa le pwapwa, eti ekkewe mi kechiw le kechiw.
16 Oupwe ekieki ekkewe ekkóch ussun chék ámi ekiekikemi. Ousap eáni ekiek mi lamalamtekia, nge oupwe eáni ekiek mi tekisosson, pwe ousap ekieki pwe oua kon tipáchem.
17 Ousap liiwini án emén ngaw ngeni ngaw. Oupwe ekieki met mi múrinné mwen mesen aramas meinisin.
18 Iká mi tufich, oupwe kinamwefengen me aramas meinisin úkúúkún ámi tongeni.
19 Ámi mi áchengicheng, ousap pwisin liiwini ngeni emén an féffér mi ngaw, nge oupwe likit ngeni Kot an epwe pwáraaló an we song. Pún a makketiw: “ ‘Wisei ái úpwe ngeni emén chappen an tipis. Ngang úpwe ngeniir chappen ar féffér mi ngaw,’ iei alon Jiowa.”*
20 Nge “iká chón oput en a echik, kopwe amwéngééni, iká a kaka, kopwe ngeni met epwe únúmi. Pún ren óm féri ena, kopwe ioni moochen ekkei wóón mékúran.”*
21 Kosap mut ngonuk óm kopwe kkuf ren ngaw, nge iteitan kopwe okkufu ngaw ren minne mi múrinné.
Footnote
^ Are “oupwe úkútiw le áppirú ei fénúfan.”
^ Are “kini; einet.”
^ Are “éúréúr.”
^ Are “einet.”
^ Are “achocho.”
^ Are “tinikken; achocho.”
^ Are “Ousap tinikkop lón ámi angang.”
^ Ina, an epwe ápwetetelóói letipen emén me ekinamweeló an song.
