Ngeni Ekkewe Chón Rom 2:1-29
2 Ina minne pwii, ese lifilifil iká en ié, nge iká ka apwúngú emén, ese wor met kopwe eáni kúnetipingen, pún lupwen ka apwúngú emén, ka pwisin apwúnguk, pokiten en ewe mi apwúngú ekkewe ekkóch ka pwal éérenaaló le féfféri ekkeei mettóch.
2 Sia silei pwe Kot a apwúngú chókkewe mi éérenaaló le féfféri ekkena sókkun mettóch mi fich ngeniir ar repwe kúna kapwúng ren, me án Kot kapwúng a tipeeú ngeni ewe enlet.
3 Nge en pwii, ka ekieki pwe kopwe sú seni án Kot kapwúng atun ka apwúngú chókkewe mi éérenaaló le féfféri ekkena esin mettóch nge en mi pwal féffériir?
4 Are, ka oput án Kot wéún kirekiréch me engiló me mosonottam, pokiten kese silei pwe lón an kirekiréch a sótun emmwenuk ngeni óm kopwe áier?
5 Nge pokiten ka tipeférea me kese mochen áier, ka efisi án Kot song. I epwe pwáraaló ei lón ewe rán epwe apwúngú aramas lón, me i epwe kapwúng fán pwúng.
6 Me i epwe liiwini ngeni emén me emén liwinin an kewe féffér:
7 manaw esemuch ngeni chókkewe mi kúkkútta ling me ésúúfél me manaw esap tongeni móróló* ren ar likiitú lón féffér mi múrinné.
8 Iwe nge, ren chókkewe mi soun ánini me álleasolap ngeni ewe enlet me álleasochis ngeni minne ese pwúng, án Kot lingeringer me song epwe feitiw wóór.
9 Epwe wor riáfféú me weires ngeni iteiten aramas mi féri minne mi efeiengaw, ngeni ekkewe chón Jus akkomw me pwal ngeni ekkewe chón Krik,
10 nge ling me ésúúfél me kinamwe ngeni meinisin chókkewe mi féri minne mi múrinné, ngeni ekkewe chón Jus akkomw me pwal ngeni ekkewe chón Krik.
11 Pún Kot ese lifilifil aramas.
12 Pún meinisin chókkewe ra tipis nge rese silei án Kot allúk, repwe máló inaamwo iká resap silei ewe allúk. Nge meinisin chókkewe mi tipis fán ewe allúk repwe kapwúng me ren ewe allúk.
13 Pún ekkewe chón rong allúk esap iir ekkewe mi pwúng mwen Kot, nge ekkewe chón apwénúetá allúk, Kot epwe apasa pwe iir mi pwúng.
14 Inaamwo iká aramasen ekkewe ekkóch mwú rese silei án Kot kewe allúk, nge ra féri met ekkena allúk ra apasa. Inaamwo iká rese silei ekkewe allúk, nge ekkena allúk ra nóm lón letiper.
15 Ra pwáraatá lón ar féffér pwe ewe allúk a nóm lón letiper. Pwal och, iir fengen me mwelien letiper ra pwáári iká ar kewe féffér ra múrinné are ngaw, iwe ren ena, ar ekiek a efisi ar repwe mirititi iká ra mengiringir ren och mettóch are rese.
16 Epwe fis ei lón ewe rán Kot epwe eáni kapwúng me ren Kraist Jises wóón ekkewe mettóch aramas ra ekieki me féri lemonomon. Ei pwóróus pwal kinikinin ewe kapas allim úa esilefeili.
17 Iwe, iká ka apasa pwe en emén chón Jus me lúkúlúk wóón allúk me pwapwa ren óm emén néún Kot aramas,
18 me ka silei letipan me ka tipeeú ngeni ekkewe mettóch mi fókkun múrinné pokiten ka angei káit* seni lón ewe Allúk,
19 me ka lúkú pwe en emén chón emmweni ekkewe mi chuun, eú saram ngeni chókkewe mi nóm lón rochopwak,
20 emén chón ákkáiti ekkewe rese mirit, emén chón asukula ekkewe semirit, me ka weweiti ekkewe popun káit ussun Kot me ewe enlet ussun i mi nóm lón ewe Allúk—
21 iwe nge, en ka asukula ekkewe ekkóch, iwe pwata kese pwisin asukulóók? En ka afalafala, “Kosap solá,” iwe pwata ka solá?
22 En ka afalafala, “Kosap lisowumwáál,” iwe pwata ka lisowumwáál? En ka oput ekkewe uluulun, iwe pwata ka solá lón ekkewe imwenfel?
23 En ka sikásini ewe allúk, iwe pwata ka ésúfélúngawa Kot ren óm puratiw ewe Allúk?
24 Pún ussun minne a fen makketiw, “ewe iten Kot a kúna turunufas me lein aramasen ekkewe ekkóch mwú pokitemi.”
25 Ren enletin, a chék wor lamoten ewe angangen sirikomsais iká ka álleasochisi ewe allúk. Nge iká en emén chón puratiw ewe allúk, esap wor lamotan ngonuk óm sirikomsais.
26 Iwe nge, iká emén ese sirikomsais a álleasochisi minne ewe Allúk a apasa, ifa ussun, esap pwe me ren Kot i a sirikomsais?
27 Iwe, ewe aramas ese sirikomsais lón futuk epwe apwúnguk ren an álleasochis ngeni ewe Allúk, pún inaamwo iká ka sirikomsais me a nóm reom ewe allúk, nge ka puratiw ena allúk.
28 Pún ren wesewesen chón Jus ese wewe ngeni met mi pwá me lúkún, me an sirikomsais esap wóón inisin.
29 Nge emén chón Jus, i ewe emén chón Jus me lón letipan, me a sirikomsais me lón letipan. Ewe ngún mi fel a féri ei nge esap ewe allúk. Ena emén epwe angei kapasen apúng* seni Kot nge esap seni aramas.
