Ngeni Ekkewe Chón Rom 3:1-31
3 Iwe, met feiéchún án emén epwe chón Jus, are án emén epwe sirikomsais?
2 A wor chómmóng feiéchún. Áeúin, Kot a ngeniir ewe Taropwe mi Pin.*
3 Nge ifa ussun iká ekkóch chón Jus rese pwáári ar lúkú? A itá wewe ngeni pwe aramas resap chúen tongeni lúkú Kot?
4 Fókkun aapw! Inaamwo iká aramas meinisin ra kapas chofona, repwe silei pwe Kot a kapas enlet fansoun meinisin. Ussun chék met a makketiw: “Pwe aramas repwe silei pwe ka kapas enlet* me en ka pwúng atun ra etipisuk.”
5 Iwe nge, iká ekkewe mettóch mi ngaw sia fériir ra ánnetatá pwe Kot mi pwúng, met sipwe apasa? Itá Kot ese pwúng atun a pwáraaló an song? (Ina ekiekin ekkóch aramas.)
6 Iká Kot ese pwúng, iwe ifa ussun epwe apwúngú fénúfan?
7 Iká úa chofona, me ewe chofona úa apasa a pwáári pwe minne Kot a apasa mi enlet me a efisi án aramas repwe mwareiti i, pwata Kot a kér ngeniei emén chón tipis?
8 Me pwata sisap apasa met ekkewe ekkóch ra chofonatá le erá pwe kich sia apasa, “Sipwe féri ekkewe mettóch mi ngaw pwe ekkewe mettóch mi múrinné repwe feito”? Ewe kapwúng ngeni ekkena aramas a tipeeú ngeni pwúng.
9 Iwe met? Sia múrinné seni ekkewe ekkóch? Aapw, esap fókkun ina! Pún ussun met úa fen apasa, iir meinisin ekkewe chón Jus me pwal ekkewe chón Krik, ra nónnóm fán tipis.
10 Ussun met a fen makketiw: “Ese wor emén aramas mi pwúng, esap mwo nge emén.
11 Ese wor emén a wor an mirit, ese wor emén a kúkkútta Kot.
12 Meinisin aramas ra tokkoló, meinisin iir ra lamotongawoló, ese wor emén a pwáári kirekiréch, esap mwo nge emén.”
13 “Chiorer a eú peiás mi suuk, ra otuputup ren chénawer.” “Poisonún serepenit a nóm fán túnawer.”
14 “Me lón awer a ur ren ottek me kipwin.”
15 “Pecher a feilikkái le osuku chcha.”
16 “Kitetter me letipengaw ra nóm lón aler kewe,
17 me rese silei ewe alen kinamwe.”
18 “Ese wor niwokkusun Kot mwen meser.”
19 Iwe, sia silei pwe meinisin ekkewe mettóch ewe Allúk a apasa, a kawor fán iten chókkewe mi nóm fán ewe Allúk, pwe iteiten aw repwe fanafaneló me unusen fénúfan epwe nóm fán án Kot kapwúng.
20 Ina minne, me ren Kot ese wor emén* epwe kúna pwúng mwen mesan ren an féri ekkewe angang ewe Allúk a apasa, pún ewe Allúk a chék esile ngenikich pwe kich chón tipis.
21 Nge iei, lúkún ewe allúk, án Kot pwúng a pwááló ussun met ewe Allúk me makkeien ekkewe Soufós ra pwáraatá,
22 me meinisin chókkewe mi wor ar lúkú ra tikeri án Kot pwúng ren ar lúkú lón Jises Kraist. Pún ese wor sókkofesen.
23 Pún meinisin ra tipis me rese tori ewe lingen Kot.
24 Me ren ekiekin Kot, iir aramas pwúng pokiten ewe liiwin Kraist Jises a méénatiw pwe epwe angasereló. Iei eú liffang Kot a awora pokiten an kirekiréch mi somwoló.
25 Kot a isettá i ussun eú asor pwe aramas repwe chásefál ngeni I* ren ar lúkú lón chchaan ewe Kraist. Ren ei, Kot a pwáraatá pwisin an pwúng, pún ren an engiló* a omusaaló ekkewe tipis ra fis me lóóm,
26 me epwe pwáári pwisin an pwúng lón ei atun, pwal lupwen epwe apasa pwe a pwúng ewe aramas mi wor an lúkú lón Jises.
27 Iwe, emén a tongeni sikesik? Ese wor met epwe sikesik wóón. Menni allúk a tongeni sikesik ren? Ren ewe allúk mi lamot ngeni angang? Aapw. Ren ewe allúk mi lamot ngeni lúkú.
28 Pún sia ekieki pwe me ren Kot emén aramas a pwúng ren lúkú mi imu seni angangen ewe allúk.
29 Are, i Koten chék ekkewe chón Jus? Esap pwal i án aramasen ekkewe ekkóch mwú Kot? Ewer, pwal án aramasen ekkewe ekkóch mwú.
30 Pún Kot i chék emén, epwe apasa pwe ekkewe mi sirikomsais iir aramas pwúng pokiten lúkú me ekkewe rese sirikomsais iir aramas pwúng ren ar lúkú.
31 Iwe met, sia amóeló ewe allúk ren ach lúkú? Esap fókkun ina! Nge sia fen álisaatá ewe allúk.
Footnote
^ Krik, “kapas.”
^ Are “pwe ka pwúng lón óm kapas.”
^ Krik, “futuk.”
^ Are “eú asoren omusomusen tipis.”
^ Are “likiitú.”
