Ngeni Ekkewe Chón Rom 4:1-25
4 Iká ina, met sipwe apasa ussun Eperiam, semelapach we lón pekin futuk?
2 Pún iká Eperiam a kúna pwúng pokiten an kewe angang, iwe a wor popun an epwe sikesik, nge esap mwen Kot.
3 Pún met ewe taropwe mi pin a apasa? “Eperiam a wor an lúkú, ina minne me ren Jiowa,* i emén aramas pwúng.”
4 Nge iká emén chón angang a angei peioffun, esap pokiten néún we meilap a kirekiréch, nge pokiten mi fichiiti an epwe angei.
5 Nge me ren Kot, ewe emén ese lúkúlúk wóón met i a féri, nge a lúkú lón Kot, i emén mi pwúng, inaamwo iká a tipis.
6 Ussun chék Tafit a pwal kapas ussun pwapwaan ewe emén me ren Kot i emén mi pwúng inaamwo iká esap pokiten an kewe angang.
7 “Ra pwapwa chókkewe ar kewe féffér mi fókkun ngaw a musoló, me chókkewe ar kewe tipis a télúló,*
8 a pwapwa ewe aramas, ewe Jiowa* esap álleani an kewe tipis.”
9 Iwe nge, ei pwapwa a chék tori ekkewe aramas mi sirikomsais are pwal ekkewe aramas rese sirikomsais? Pún sia apasa: “Me ren Kot, Eperiam i emén aramas pwúng pokiten an lúkú.”
10 Iwe, ineet atun a emén aramas pwúng me ren Kot? Atun a sirikomsais are ese sirikomsais? Atun an ese sirikomsais.
11 Kot a ereni an epwe sirikomsais. Iei eú esissil mi pwáraatá pwe i aramas pwúng pokiten ewe lúkú a eáni atun an ese mwo sirikomsais. Iei minne, a wiliiti semen meinisin chókkewe mi wor ar lúkú atun ar rese sirikomsais, iwe me ren Kot chókkeei iir aramas pwúng.
12 Pwal och, Eperiam i semen ekkewe mi sirikomsais. Esap chék i ewe sam ngeni chókkewe mi sirikomsais, nge pwal ngeni chókkewe mi wor ar lúkú ussun chék an we. Semelapach we Eperiam a eáni lúkú atun an ese mwo sirikomsais.
13 Eperiam ese angei are pwal mwirimwirin kewe rese angei ewe pwon an epwe chón álemwiri eú fénúfan ren an álleasochisi ewe allúk, nge ren ewe pwúng mi lóngólóng wóón lúkú.
14 Pún iká chókkewe mi álleasochis ngeni allúk iir chón álemwir, lúkú a lamotongawoló me ewe pwon a kamóló.
15 Ren enletin, ewe Allúk a efisatá song, nge ikewe ese wor allúk ie, ese pwal wor atai allúk.
16 Eperiam a angei ewe pwon ren an lúkú, ina minne ei a lóngólóng wóón án Kot kirekiréch mi somwoló, pwe ewe pwon epwe enletin pwénúetá ngeni meinisin mwirimwirin kewe, esap chék ngeni chókkewe mi álleasochisi ewe allúk nge pwal ngeni chókkewe mi eáni ewe lúkú Eperiam a eáni, ewe sam ngenikich meinisin.
17 (Iei ussun chék met a makketiw: “Ngang úa seikuketá pwe emén sam ngeni aramasen chómmóng mwú.”) Ei a fis mwen mesen Kot, ewe i a lúkú, ewe a amanawa ekkewe mi máló me fósun ekkewe mettóch resaamwo pwénútá ussun itá nge ra fen pwénúetá.
18 Ikáámwo ese wor popun an epwe ápilúkúlúk, nge pokiten an ápilúkúlúk a wor an lúkú pwe epwe wiliiti semen aramasen chómmóng mwú ussun chék minne a fen rong: “Mwirimwirum kewe repwe chómmóngoló.”
19 Iwe, ikáámwo i ese apwangapwangoló lón an lúkú nge a ekieki pwisin inisin, pwe iei, ussun nge a máló (pún ina epwele fen 100 ierin), pwal Sara ese chúen tongeni néúnéú.
20 Nge pokiten án Kot we pwon, a wor an lúkú, ina minne ese tipemwárámwár. A péchékkúleló ren an lúkú, a mwareiti Kot,
21 me a unusen lúkúlúk pwe Kot epwe pwal apwénúetá met i a pwonei.
22 Ina minne, “me ren Kot i emén aramas pwúng.”
23 Iwe nge, ei itiitin kapas “i a állealong,” ese makketiw fán itan chék,
24 nge pwal fán itach, oukich ekkewe sipwe állealong pokiten sia lúkú lón I, ewe a amanawaatá Jises ach Samol seni máló.
25 Kot a mut ngeni aramas ar repwe nieló Jises fán iten ach kewe tipis. Kot a amanawaatá fán ásengesin an epwe pwáári pwe kich sipwe aramas pwúng.
