Ngeni Ekkewe Chón Rom 6:1-23
6 Iwe, met sipwe apasa? Sipwe itá sópweeló le tipis pwe epwe lapóló ewe kirekiréch mi somwoló?
2 Esap fókkun ina! Pokiten sise chúen nóm fán nemenien tipis, iwe ese chúen éch ach sipwe sópweeló le tipis.
3 Are, ouse silei pwe meinisin kich ekkewe mi papatais lón Kraist Jises, sia papatais lón an we máló?
4 Iei minne, ren ach papatais sia eti Kraist le peiás lón an we máló. Ren an epwe ussun chék an we manawetá seni máló ren lingen ewe Sam, sipwe pwal fetál lón eú manaw mi fé.
5 Pokiten sia eti i ren ach máló ussun chék i, iwe pwal ina ussun, sia eti i pokiten sia manawsefál ussun chék i.
6 Pún sia silei pwe napanapach kewe minen lóóm ra eti i le chúfélútá wóón ewe iráán ninni, ina minne, mochenin inisich kewe mi ngaw resap chúen nemenikich, me sisap chúen manaw ussun slave ngeni tipis.
7 Pún ewe emén a máló, a ngaseló seni an tipis.
8 Pwal och, iká sia eti Kraist le máló, sia lúkú pwe sipwe pwal eti i le manaw.
9 Pún sia silei pwe Kraist, iei a manawetá seni máló me esap chúen máló, ese chúen wor án máló nemenem wóón i.
10 Pún ewe máló i a mááli, a máló pwe epwe amóeló tipis, a fis ei fán eú chék fán iten fansoun meinisin. Nge ewe manaw i a manaweni, a manaw fán iten Kot.
11 Pwal ina ussun remi, oupwe ekieki pwe oua máló lón manaw mi tipis, nge oua manaw pwe oupwe tongeni féri letipen Kot ren Kraist Jises.
12 Ina minne, ousap mut ngeni tipis an epwe sópweeló le nemenem ussun king wóón inisimi mi tongeni máló pwe oupwe álleasochisi mocheniir kewe.
13 Are, ousap pwal fangoló inisimi* ngeni tipis ussun pisekin angangen minne ese pwúng. Nge oupwe fangoló pwisin ámi ngeni Kot ussun chókkewe mi manaw seni máló, pwal inisimi* ngeni Kot ussun pisekin angangen minne mi pwúng.
14 Ousap mut ngeni tipis an epwe nemenem wóómi, pún ouse chúen nóm fán allúk nge oua nóm fán kirekiréch mi somwoló.
15 Iwe, met sipwe apasa? Sipwe féri tipis pokiten sise nóm fán allúk nge sia nóm fán kirekiréch mi somwoló? Esap fókkun ina!
16 Oua silei pwe iká oua kan álleasochisi emén, ámi oua néún slave. Iwe iká oua slave ngeni tipis, oupwe máló. Nge iká ámi néún Kot slave me oua álleasochisi, oupwe aramas pwúng.
17 Iwe, sipwe kilisou ngeni Kot, pún a wor ewe fansoun oua slave ngeni tipis, nge iei seni lón unusen letipemi oua álleasochis ngeni ewe sókkun asukul Kot a ngenikemi.
18 Ewer, pokiten oua ngaseló seni tipis, oua wiliiti slave ngeni pwúng.
19 Pokiten apwangapwangen futukemi, úa néúnéú ekkewe kapas aramas repwe weweiti. Pún ussun chék ámi fangoló inisimi pwe epwe slave ngeni minne mi limengaw me féfféringaw mi emmwen ngeni féfféringaw, iei oupwele fangoló inisimi pwe epwe slave ngeni minne mi pwúng mi emmwen ngeni minne mi pin.
20 Pún lupwen oua slave ngeni tipis, ouse nóm fán nemenien minne mi pwúng.
21 Iwe, met ewe uwa oua piin uwaani lón ena fansoun? Ekkewe mettóch iei oua sáw ren. Pún sópwólóón ekkena mettóch, ina máló.
22 Iwe nge, pokiten iei oua ngaseló seni tipis me oua slave ngeni Kot, oua uwaani uwaami kewe lón alen minne mi pin, me sópwólóón, ina manaw esemuch.
23 Pún liwinin tipis máló, nge ewe liffang Kot a awora ren Kraist Jises ach Samol, ina manaw esemuch.
