Ngeni Ekkewe Chón Rom 8:1-39
8 Ina minne, chókkewe mi eti Kraist Jises ese wor kapwúngúúr.
2 Pún ewe allúkún ngún mi fel a fang ngonuk manaw me ren Kraist Jises. Ena allúk a pwal angasokoló seni ewe allúkún tipis me allúkún máló.
3 Met ewe Allúk ese tufichin féri pokiten apwangapwangen ewe futuk, Kot a féri ren an tiinaato pwisin Néún we lón napanap mi ussun aramas tipis pwe epwe amóeló tipis, a apwúngú ewe tipis lón ewe futuk,
4 pwe pwúngún ewe Allúk mi pwúng epwe pwénúetá lón kich kewe sise fiti emmwenien futuk, nge emmwenien ngún mi fel.
5 Pún chókkewe mi manaw fán emmwenien futuk ra afóta ar ekiek wóón ekkewe mettóchun futuk, nge chókkewe mi manaw fán emmwenien ngún mi fel, wóón ekkewe mettóchun ewe ngún mi fel.
6 Pún nefótófót wóón futuk a wewe ngeni máló, nge nefótófót wóón ewe ngún mi fel a wewe ngeni manaw me kinamwe.
7 Pún nefótófót wóón futuk a wewe ngeni oputa Kot, pún ese álleasochisi án Kot allúk, ren enletin, ese tongeni.
8 Ina minne, chókkewe mi féri mochenin futuk rese tongeni apwapwaai Kot.
9 Iwe nge, iká án Kot we ngún mi fel a enletin nónnóm lón ámi, ouse tipeeú ngeni ewe mochenin futuk nge fen ewe ngún mi fel. Nge iká emén ese eáni án Kraist ekiek,* ei emén esap néún.
10 Nge iká Kraist a etikemi, ewe inis a máló pokiten tipis, nge ewe ngún mi fel a awora manaw pokiten pwúng.
11 Iwe, iká án ewe mi amanawaatá Jises seni máló we ngún mi fel a nónnóm remi, ewe emén mi amanawaatá Kraist Jises seni máló epwe pwal awora manaw ngeni inisimi we mi tongeni máló ren an we ngún mi fel mi nónnóm lón ámi.
12 Ina minne, ámi pwii kana, sisap mut ngeni inisich ar repwe nemenikich me féri ekkewe mettóch ra mochen.
13 Pún iká oua manaw fán emmwenien futuk, oupwe fókkun máló, nge iká oupwe ámálóói ekkewe féfférún tipis ren ewe ngún mi fel, oupwe manaw.
14 Pún meinisin ekkewe mi nóm fán emmwenien án Kot we ngún mi fel, iir wesewesen néún Kot.
15 Pún án Kot we ngún mi fel ese efisi ach sipwe wiliiti slave me niwokkus sefál, nge me ren ena ngún mi fel sia mumu ussun semirit me ena ngún mi fel a amwékútúkich ach sipwe kékké fán léúwommóng: “Appa,* Semem!”
16 Án Kot we ngún mi fel a affata ngeni letipach* pwe kich néún Kot kewe.
17 Iwe, iká kich néún kewe, sia pwal chón álemwir, néún Kot chón álemwir, me fiti Kraist le chón álemwir. Iká sia eti lón an riáfféú, sipwe pwal eti lón an kúna ling.
18 Pún úa ekieki pwe ekkewe riáfféú lón ei fansoun rese akkarap ngeni ewe ling epwe pwá lón kich.
19 Pún meinisin férien Kot kewe ra mwétéres le witiwiti ewe fansoun lupwen Kot epwe pwáraaló pwe néún kewe ra angei liwiniir mi amwarar.
20 A fis pwe meinisin férian kewe ra eáni eú manaw mi lamotongaw, esap seni pwisin tiper nge seni tipen Kot. Nge a pwal kawor ewe ápilúkúlúk,
21 pwe férien Kot kewe repwe ngaseló seni ar manaw ussun slave ngeni eú inis mi móróló, me néún Kot kewe repwe eáni eú manaw mi ngas.
22 Pún sia silei pwe meinisin férian kewe ra ngúngúresfengen me nónnóm lón ar cheuch tori lón ei fansoun.
23 Nge esap chék iir, pwe pwal kich ekkewe mi nóm rech ewe mwenuwa, ewe ngún mi fel. Ewer, kich pwisin sia ngúngú lón kich atun sia wikkitiwiti án Kot epwe muutikich ach sipwe néún pwe inisich epwe ngaseló ren ewe méén kepich.
24 Pún lupwen sia ngaseló seni tipis, sia eáni ei ápilúkúlúk. Lupwen emén aramas a kúna pwe minne a ápilúkúlúkú a wesewesen fis, iwe esap chúen ápilúkúlúkú.
25 Nge iká sia ápilúkúlúkú met sise kúna, sia likiitú le wikkitiwiti.
26 Pwal ina chék ussun ren ewe ngún mi fel, a pwal álisikich atun sia apwangapwang. Lupwen sise silei met sipwe iótek ussun, ewe ngún mi fel a tingor fán ásengesich lupwen sia ngúngú nge sise tongeni apasaatá och.
27 Nge ewe emén mi etittina ekkewe letip a silei met ewe ngún mi fel a tingor, pokiten an tingor fán iten ekkewe mi pin a tipeeú ngeni letipen Kot.
28 Sia silei pwe Kot a féri meinisin an kewe angang ar repwe sópwósópwoló lón kókkótéch fán iten feiéchún chókkewe mi tongei Kot, chókkewe mi kékké ngeni minne a tipeni.
29 Pún seni lepoputáán i a silei ussun chókkewe i epwe filaatá me a apwúngaló pwe repwe ussun Néún we, ewe epwe mwánichi seni me lein pwiin kewe.
30 Pwal och, chókkewe i a fen filiireló iir ekkewe a pwal kériir, me chókkana i a kériir iir ekkewe a pwal apasa pwe iir aramas pwúng. Iwe, chókkana i a apasa pwe iir aramas pwúng iir ekkewe a pwal elingereló.
31 Iwe, met sipwe apasa ussun ekkeei mettóch? Iká Kot a penikich, ié epwe ú ngenikich?
32 Pokiten ese pwal mwo nge amwéchú pwisin Néún we nge a fangoló i fán ásengesich meinisin, iwe, esap pwe i epwe pwal ngenikich meinisin ekkewe pwal ekkóch mettóch kapachelong i?
33 Ié epwe etipisi néún Kot kewe mi filitá? Kot i ewe Emén a apasa pwe iir aramas pwúng.
34 Ié epwe apwúngúúr? Kraist Jises i ewe a máló, ewer, nge lap seni ena, i ewe emén a manawetá, ewe a nóm lepeliefichin Kot me ewe a pwal tingor fán itach.
35 Ié epwe áimukicheló seni án ewe Kraist tong? Riáfféú are weires are riáfféúmwáál are echik are seleló are feiengaw are ketilas?
36 Iei met ewe taropwe mi pin a apasa: “Iteitan ra mochen nikemiló fán ásengesimi, ra pwal ekieki pwe ám siip repwe nieló.”
37 Nge ren álillisin ewe emén mi tongekich, sia win lón meinisin ekkeei mettóch.
38 Pún úa lúkúlúk pwe esap máló are manaw are chónláng are mwú are ekkewe mettóch mi nónnóm iei are ekkewe mettóch repwe feito are péchékkúl,
39 are tekia are alóllóól are férien Kot kewe pwal ekkóch repwe tongeni áimukicheló seni án Kot we tong mi nónnóm lón Kraist Jises ach Samol.
Footnote
^ Krik, pneu′ma.
^ Eú kapasen Ipru are Aramaik mi wewe ngeni “O Semem!”
^ Ei a wewe ngeni napanapach me lón. Krik, “ach pneu′ma.”
