Ngeni Ekkewe Chón Rom 9:1-33
9 Úa kapas enlet pún ngang emén chón tapweló mwirin Kraist, úse chofona, me ren ewe ngún mi fel mwelien letipei a pwáraatá
2 pwe a wor watteen letipetaan me metekin letipei ese úkútiw.
3 Pún úa áneán pwe itá pwisin ngang úpwe imuuló seni ewe Kraist ussun emén mi anúmamaw fán ásengesin pwii kewe, aramasei kewe lón pekin futuk,
4 iir ekkewe chón Israel. Ekkewe Kot a muutiir pwe repwe néún, ekkewe ra angei ling, ekkewe a fférútá rer eú pwonen etipeeú, ekkewe ra angei ewe Allúk, ekkewe ra angei ewe wis ar repwe féri ewe angang mi pin me ekkewe ra angei ekkewe pwon.
5 Iir pwal mwirimwirin ekkewe semelap, ekkewe Kraist a feito seniir. Mwareiti Kot ewe mi nemeni mettóch meinisin. Amen.
6 Iwe met, sipwe itá apasa pwe ewe kapasen Kot ese mwo pwénúetá? Aapw. Ren enletin, chókkewe iir néún Israel esap iir meinisin chón Israel.
7 Esap iir meinisin néún Eperiam pokiten iir mwirimwirin. Nge “Mwirimwirum kewe repwe feito seni Aisek.”
8 Ei a wewe ngeni pwe esap meinisin néún Eperiam kewe iir wesewesen néún Kot kewe, nge chókkewe mi uputiw pokiten ewe pwon, iir enletin néún Eperiam kewe.
9 Pún iei kapasen ewe pwon: “Lón ei fansoun ngang úpwe feito nge Sara epwe néúni emén át.”
10 Esap chék iei, Kot a pwal pwon lupwen Repeka a pwopwo, atun epwe néúni rúúemén nippwe me wóón semelapach we Aisek.
11 Lupwen ekkena semirit resaamwo uputiw are féri met mi múrinné are ngaw, Kot a fen apasa me mwan ié me leir epwe filaatá. Pún Kot a filaatá ié i a tipeni, me ese alónga wóón féfférún ewe aramas.
12 Ina popun, Kot a ereni neminnewe: “Ewe watte epwe slave ngeni ewe kúkkún.”
13 Ussun chék met a makketiw: “Úa tongei Jekop, nge úa oput Iso.”
14 Iwe, met sipwe apasa? Kot mi pwúngúngaw? Fókkun aapw!
15 Pún i a ereni Moses: “Úpwe pwáári úméúméch ngeni ié chék úpwe pwáári úméúméch ngeni, me úpwe pwáári tong ngeni ié chék úpwe pwáári tong ngeni.”
16 Ina minne, án Kot filaatá ese lóngólóng wóón án emén mochen are achocho,* nge wóón Kot, ewe mi eáni úméúméch.
17 Pún iei met ewe taropwe mi pin a apasa ngeni Farao: “Pún iei wesewesen ewe popun úa mut ngonuk óm kopwe chúen manaw: pwe úpwe pwáári ái manaman reom me pwáraaló itei lón unusen fénúfan.”
18 Iwe, a wor an úméúméch ngeni ié chék a mochen úméúméch ngeni, nge a mut ngeni ié chék a mochen tipeférea.
19 Iwe nge, kopwe apasa ngeniei: “Pwata a chúen tipimwáál ngeni aramas? Ié a tongeni ú ngeni letipan?”
20 Nge en ié pwe kopwe appélúwa Kot? Itá ewe mettóch emén a anapanapa a tongeni apasa ngeni ewe chón anapanapa: “Pwata ka fériei lón ei esin napanap?”
21 Pwata? Esap pwe a wor án ewe chón ffér sepi pwúl nemenem wóón ewe pwúl, an epwe féri seni eú chék pwúl, eú sepi fán iten áeáán rán mi aúchea, pwal eú sepi fán iten áeáán rán ese lifilifil?
22 Pwal ina ussun ren Kot. I a mochen pwáraaló an song me esilei an we manaman. Ikáámwo ina, nge a mosonottam ngeni ekkewe sepien song mi mmólnetá fán iten kitetter.
23 Me iká a fis ei pwe epwe esilei wéún an we ling wóón ekkewe sepien úméúméch, ekkewe a fen ammólnatá me mwan fán iten ling,
24 weween kich, ekkewe i a kérikich esap chék seni me lein ekkewe chón Jus nge pwal seni me lein aramasen ekkewe ekkóch mwú, iwe met?
25 Ussun met a pwal apasa lón Osea: “Chókkewe esap iir nei aramas, ngang úpwe kér ngeniir ‘nei aramas,’ me neminnewe ese wor a tongei, úpwe kér ngeni ‘áchengicheng.’
26 Me lón ewe leeni ikewe úa apasa ngeniir, ‘Ámi esap nei aramas,’ me ikena ie repwe iteni ‘néún ewe Kot mi manaw.’ ”
27 Pwal och, Aisea a kékkéwu fán léúwommóng fán iten Israel: “Inaamwo iká iteiten néún Israel kewe repwe ussun ppien leset, nge chókúkkún* chék repwe kúna manaw.
28 Pún Jiowa* epwe féri kapwúng wóón fénúfan, epwe áwesaaló kapwúng me ammwochaaló kapwúng.”*
29 Aisea a pwal osuni, a apasa: “Iká Jiowa,* ewe sounemenemen ekkewe láng, ese mut ngeni ekkóch me lein mwirimwirich kewe ar repwe nóm, iwe epwe fis ngenikich met a fis ngeni Sotom me Komora.”
30 Iwe, met sipwe apasa? Ikáámwo aramasen ekkewe ekkóch mwú rese sótuni le wiliiti aramas pwúng, nge ra wiliiti aramas pwúng mwen mesen Kot pokiten lúkú.
31 Nge ekkewe chón Israel, ikáámwo ra sótuni ar repwe aramas pwúng ussun met a nóm lón ewe allúk, nge rese apwénúetá ewe allúk.
32 Pwata? Pokiten ra ekieki pwe ra tongeni wiliiti aramas pwúng ren ar kewe féffér, nge esap ren lúkú. Ra chepetek wóón ewe “féún chepetek.”
33 Ussun a makketiw: “Nengeni! Úa isettiw lón Sion eféú féún chepetek me eú achaw mi asonga aramas,* nge ewe emén mi onómu an lúkú wóón esap lichippúng.”
Footnote
^ Krik, “esap wóón ewe emén a mochen are wóón emén mi ssá.”
^ Krik, “lusun.”
^ Are “mwittir féri kapwúng.”
^ Are “efisi án aramas repwe turuló.”
