Ngeni Taitos 1:1-16
1 Seni Paul, emén néún Kot chón angang me emén néún Jises Kraist aposel, ewe an lúkú mi tipeeú ngeni án chókkewe mi kefilitá me ren Kot lúkú me ewe sile mi pwúng ussun ewe enlet, ewe mi tipeeú ngeni ewe manaw mi fich ngeni Kot,
2 me a lóngólóng wóón ewe ápilúkúlúkún manaw esemuch, ewe Kot, ewe ese tongeni kapas chofona, a pwonei seni me lóóm lóóm.
3 Nge lón ewe fansoun a fen filaatá, i a esilefeili an we kapas ren ewe angangen afalafal a fen ewisa ngeniei me ren ewe allúk án Kot, ach Chón Amanaw.
4 Ngeni Taitos, en ka ussun wesewesen emén nei me chiechiei chón lúkú:
Amwo epwe nónnóm reom ewe kirekiréch mi somwoló me kinamwe seni Semach Kot me Kraist Jises ach Chón Amanaw.
5 Úa likitukoló lón Krit me úa fen allúkú ngonuk pwe kopwe áwena ekkewe mettóch mi kotongaw me seikaatá mwán mi ásimaw lón eú me eú telinimw,
6 epwe emén mwán ese wor met emén epwe tipi ngeni wóón, epwe emén chék pwúlúwan, néún kewe mi fiti ewe lúkú resap eáni manaw mi ngaw are lúkúmach.
7 Pún emén chónemmwen i néún Kot chón angang, iwe mi lamot esap wor met emén epwe tipi ngeni wóón, esap lamalamtekia, esap songokkái, esap únnúpuch, esap mwáneson,* esap tipemmóng ren an epwe angei winnan,
8 nge epwe awasélaéchú aramas, efich minne mi múrinné, mirit, pwúng, túppwél, nemeni mochenin,
9 fitipachei ewe pwóróus mi alúkúlúk atun an asukul* pwe epwe tongeni apéchékkúla ekkewe ekkóch ren an asukul mi múrinné, pwal apwúngú chókkewe mi ú ngeni.
10 Pún mi wor chómmóng mwán mi lúkúmach, mi eáni kapas mi lamotongaw, me chón otuputup, ákkáeúin chókkewe mi kémwéchúnúk wóón ewe angangen sirikomsais.
11 Kosap mut ngeni ekkena aramas ar repwe kapas pún ra kan atai án ekkewe famili lúkú ren ar asukula ekkewe mettóch itá resap asukula, nge ra chék féri pokiten ar mochenian moni.
12 Emén me leir, i néúr soufós a erá: “Ekkewe chón Krit ra kapas chofona fansoun meinisin, iir ra ussun manmwacho mi efeiengaw, iir aramas mi chipwang mi luluuló mwéngémmóngur.”
13 Ei kapasen pwáraatá, mi enlet. Ina popun kopwe kan apwúngúchowur pwe repwe péchékkúl lón ar lúkú,
14 resap aúseling ngeni án ekkewe chón Jus túttúlap me fiti ekkewe allúk, án ekkewe aramas mi riki seni ewe enlet.
15 Mettóch meinisin ra liméch me ren aramas mi liméch. Nge ren chókkewe mi limengaw me ese wor ar lúkú, ese wor met mi liméch me rer, pún ekiekiir me mwelien letiper mi limengaw.
16 Ra apasa mwen mesen aramas pwe ra silei Kot nge ra amam i ren ar féffér, pún iir mi ánnioput, álleasolap, me ese fich ngeniir sókkun angang múrinné meinisin.
Footnote
^ Ewe kapasen Krik ikeei, a tongeni wewe ngeni kawet wóón paw are lón kapas.
^ Are “lón napanapen an asukul.”
