Ngeni Taitos 2:1-15
2 Nge en, kopwe sópweeló le fós ussun met mi tipeeú ngeni ekkewe asukul mi álilliséch.
2 Ekkewe mwán repwe nemeni unusen kinikinin manawer, repwe ngeni leten ar féri wiser, repwe mirit, repwe núkúchar lón ar lúkú, tongei aramas, me likiitú.
3 Pwal ina ussun ren ekkewe fefin, a lamot repwe pwáári ar súféliti Kot lón féfférúr, resap eáni kapasen pweni, resap únnúmmóng wain, repwe chón asukula minne mi múrinné,
4 pwe repwe tongeni fénéú* ngeni ekkewe fépwúl ar repwe tongei pwúlúwer, tongei néúr,
5 mirit, limeliméch, féri angangen lón imwer, eáni féffér múrinné, onómuur fán nemenien pwúlúwer pwe aramas rete turunufasei án Kot kapas.
6 Pwal ina ussun ren ekkewe alúwél, kopwe sópweeló le peseer ar repwe eáni mirit,
7 kopwe eú leenien áppirú lón óm féffér múrinné meinisin. Kopwe féri leten wisom lón óm asukula minne mi pwúng
8 ren óm eáni ekkewe kapas mi múrinné pwe aramas resap tongeni esiitok. Ina minne, chókkewe mi ú ngenikich repwe sáw pún esap wor met mi ngaw repwe tongeni apasa ussuch.
9 Ekkewe slave repwe onómuur fán nemenien néúr kewe masta lón mettóch meinisin, repwe achocho le apwapwaar, me resap éppélúwer,
10 resap solá seniir och mettóch, nge repwe pwáári pwe iir mi unusen alúkúlúk, pwe lón mettóch meinisin repwe tongeni elingaaló ewe káit án Kot, ach we Chón Amanaw.
11 Pún án Kot we kirekiréch mi somwoló a fen pwápwááló, a atoto amanaw ngeni sókkun aramas meinisin.
12 A áiti ngenikich ach sipwe ttii senikich féffér ese fich me ren Kot me mochenian fénúfan, nge sipwe eáni manaw mi mirit me pwúng me fich ngeni Kot lón ei ótóten fénúfan,*
13 atun sia witiwiti ewe ápilúkúlúk mi apwapwa me pwálóón lingen ewe Kot mi lapalap me ach we Chón Amanaw, Jises Kraist.
14 I a fangoló manawan fán itach pwe sipwe ngaseló seni meinisin sókkun féffér mi ngaw, me limetikich pwe sipwe néún aramas mi kkóló aúchean, pwe sipwe tinikken le féri angang múrinné.
15 Kopwe sópweeló le asukula ekkeei mettóch, kopwe apéchékkúla me apwúngú ekkewe ekkóch pún a wor óm pwúúng le féri ena. Kosap mut ngeni emén an epwe esiitok.
