Ngeni Taitos 3:1-15
3 Kopwe sópweeló le áchchema ngeniir ar repwe onómuur fán ekkewe mwú me nemenem me álleasochisiir. Repwe mmólnetá ngeni angang múrinné meinisin,
2 resap eáni kapas mi ngaw ussun emén, resap ánini, nge repwe tipemirit, me tipepwetete ngeni aramas meinisin.
3 Pún me lóóm, kich sia pwal tiparoch, álleasolapa Kot, aramas ra otupukich, sia slave ngeni sókkopaten mochenia me kútta pwisin pwapwaach, eáni manaw mi ngaw, lólówó, aramasangaw, me koputfengen.
4 Nge Kot, ewe mi selánikich a pwáári an kirekiréch me tong ngeni aramas.
5 I a selánikich pokiten an úméúméch, nge esap pokiten och féfférún pwúng sia féri. I a selánikich ren an limetikich, ina minne sia eáni eú manaw mi fé, me i a aséfésefálikich ren an áeá an we ngún mi fel.
6 I a néúnéú Jises Kraist, ach we Chón Amanaw, le ourakicheló ren ena ngún mi fel.
7 I a féri ei pwe sipwe wiliiti emén mi eáni ewe ápilúkúlúkún manaw esemuch a pwonei. Sia tongeni kúna ena pokiten an watteen kirekiréch ngenikich, ewe a efisi ach sipwe chón pwúng me ren.
8 Ekkena kapas ra alúkúlúk, me úa mochen óm kopwe kan menlapei ekkena mettóch pwe chókkewe mi lúkú Kot repwe kan afóta ekiekiir wóón ar féfféri angang mi múrinné. Ekkeei mettóch ra múrinné me álilliséch ngeni aramas.
9 Nge kopwe túmúnuk seni ánini mi umwes me tettelin uruwoon aramas, seni ánini me fiu wóón ewe Allúk, pún ekkena mettóch ra lamotongaw me aúcheangaw.
10 Kopwe atowauakoló seni emén mwán mi álisaatá eú asukul mi chofona mwirin óm áeúin me oruuen fénéú,
11 pún ka silei pwe ena sókkun aramas a riki seni ewe al mi pwúng me a féfféri tipis me a kúna kapwúng ren pwisin féfférún.
12 Atun úpwe tiinaaló reom Artemas are Tikikos, kopwe fókkun achocho le feito rei lón Nikapolis pwe úa filaatá ái úpwe nónnóm ikena lón fansoun patapat.
13 Kopwe fókkun achocho le álisi Senas, ewe mi silefichi ewe Allúk, me pwal Apolos pwe esap wor met repwe osupwangan lón ar sái.
14 Nge kopwe mut ngeni chiechiach kewe ar repwe pwal káé le féri angang múrinné pwe repwe tongeni álillis lón fansoun osupwang, pwe repwe kan féri féffér múrinné.
15 Meinisin chókkeei mi nóm rei ra tiinaaló ar kapwong ngonuk. Kopwe pwal atoura ái kapwong ngeni chókkewe mi tongekem, iir chienach chón lúkú.
Amwo ewe kirekiréch mi somwoló epwe nónnóm remi meinisin.
