CHÓN ETIWETIW Ekkewe chón etiwetiw ra kefilitá pwe repwe álisuk. Iwe, kese mochen unusen tipemecheres ngeniir ren óm álleasochisi ar kókkót ussun parking, ikewe chómmóng aramas ra fetál ie, káimulóón leenien móót me pwal ekkóch mettóch.

PAPATAIS Leenien móót fán iten ekkewe repwe papatais, iká ese affat, iwe epwe nóm mwen ewe stage. Ekkewe repwe papatais, repwe móót ikewe mi fen káimuuló pwe leenier me mwen an epwe poputá ewe afalafal fán iten papatais lesossorun Ammól. Emén me emén epwe pwisin uwei an towel me úfan mi fich ngeni papatais.

ASOR A fiti moni kaworen ewe leeni, sound system me pwal ekkewe ekkóch mettóch epwe efisi pwapwaan ewe mwichelap me álisikich le arap ngeni Jiowa. Óm awora asor epwe álisi ewe moni towu me pwal álisaatá ewe angang wóón unusen fénúfan. Ren an epwe mecheres ngonuk, a fen wor esissillen ekkewe pwórun asor mi nóm lón unusen ewe leenien mwichelap. Ka pwal tongeni awora óm asor wóón Internet ren óm ló ngeni donate.pr418.com. Mi fókkun aúchea met ka eáni asor. Ewe Mwichen Soupwúngúpwúng a mochen kilisou ngonuk ren óm kisáseú le álisaatá angangen ewe Mwú.

FIRST AID Kese mochen kopwe chechchemeni pwe ena First Aid FÁN ITEN CHÉK ÁKSETEN ME WEIWEITÁÁN SEMMWEN.

LEENIEN METTÓCH MI PÉÚTÚLÓ Meinisin ekkewe mettóch mi péútúló ka kúner, kopwe waló lón ei Leenien Mettóch mi Péútúló. Iká a péútúló pisekum, kopwe ló lón ena leeni me erá esissillan. Kopwe panaló ngeni ena leeni ekkewe semirit mi rukoló seni semer me iner. Iwe nge, ren an esap pwal fis osukosuk ngeni ekkewe ekkóch, kese mochen túmúnúéchú noum kewe me onómuur reom.

LEENIEN MÓÓT Kese mochen ekieki ekkewe ekkóch. Chechchemeni pwe kopwe chék tongeni káimuuló leenien móót fán iten chón óm famili me chókkewe mi fituk wóón waaom, chókkewe oua nómfengen lón eú chék imw are ekkewe ka káé ngeniir. Iwe kesap uwoutá mettóch wóón ekkewe leenien móót kesap áeá.

ÁLILLIS LE ANGANG Iká ka mochen álillis lón angangen kókkótun ewe mwichelap, kese mochen kopwe esile ngeni Information and Volunteer Service Department.