Áeá kapas áwewe mi mecheres. Kopwe áppirú Jesus le áeá ekkewe mettóch mi mecheres me mettóch aramas ra sissilei usun, le áweweei mettóch mi weires. Kosap apachaatá pwóróus ese lamot epwe orukaló ewe kapas áwewe. Túmúnú pwe masouen óm we kapas áwewe epwe weneiti ewe pwóróus ka asukula pwe ekkewe chón aúseling resap rukoló ren ar rese masefengen.

Ekieki met epwe álisi ekkewe chón aúseling. Filatá ekkewe kapas áwewe mi weneiti nónnómun manawen ekkewe chón aúseling me minne ra pwapwaiti. Túmúnú pwe óm kapas áwewe esap ásáwer are asongeer.

Asukula ewe menlapen pwóróus. Áeá kapas áwewe mi weneiti ekkewe menlapen pwóróus nge esap ekkewe rese kon lien lamot. Túmúnú pwe ekkewe chón aúseling resap chék chemeni ewe kapas áwewe, nge pwal ewe lesen.