Lón fansoun ekkewe aposel, eú kúkkún mwich, “ekewe soukünö” me ekkewe mwán mi ásimaw lón Jerusalem, ra angang usun eú mwichen soupwúngúpwúng me wisen apwúngú ekkewe mettóch mi lamot fán ásengesin ewe mwichefelin Chón Kraist mi kepit. (Föför 15:2) Lupwen ra kan apwúngaló och mettóch, ra akkomw etittinafichi me pwóróusfengen wóón met ewe Paipel a apasa me anomuur fán emmwenien án Kot we manaman mi fel. (Föför 15:25) Ina met ewe Mwichen Soupwúngúpwúng a pwal féfféri ikenái.

Kot a néúnéú ewe Mwichen Soupwúngúpwúng le apwénúetá letipan. Ekkewe mi kepit chón lón ewe Mwichen Soupwúngúpwúng, ra fókkun aúcheani masouen án Kot we kapas me ra sipeéch le ataweei sókkópaten angang me ekkewe mettóch lón pekin lúkú. Ra mwichfengen iteiten wiik ar repwe nengeni met osupwangen ewe mwicheich. A awora ekkewe minen emmwen seni Paipel lón ekkewe taropwe ra tiinaaló, are seni ekkewe chónemmwen mi wisen sáifetál me pwal ekkóch, usun chék met a fis lón fansoun ekkewe aposel. Ei mettóch a álisi néún Kot aramas ar repwe tipeeú lón ar ekiek me féffér. (Föför 16:4, 5) Ewe Mwichen Soupwúngúpwúng a emmweni mmolnetáán ewe mwéngé lón pekin lúkú, apéchékkúla ewe angangen afalafal usun ewe Mwú, me túmúnú kefilin ekkewe repwe wiseni ekkewe sókkópaten wis lón ewe mwicheich.

A mwittir akkapwénúetá emmwenien án Kot we manaman mi fel. Ewe Mwichen Soupwúngúpwúng a kútta emmwen seni Jiowa, ewe Sounemenemen unuselapen láng me fénúfan, pwal seni Jesus, ewe Mékúren mwichefel. (1 Korint 11:3; Efisos 5:23) Chón ewe Mwichen Soupwúngúpwúng rese ekieki pwe iir sounemenem wóón néún Kot kewe aramas. Iir me pwiir kewe meinisin Chón Kraist mi kepit, ra “tapwela mürin ewe Lam [Jesus] ekis meinisin ia a feila ie.” (Pwärätä 14:4) Ewe Mwichen Soupwúngúpwúng a aúcheani ach iótek fán ásengesin.

• Ié kewe chón ewe mwichen soupwúngúpwúng lón fansoun ekkewe aposel?

• Ifa usun ewe Mwichen Soupwúngúpwúng lón ei fansoun a kútta án Kot emmwen?