Ika ka kákkáé ren ekkewe Chón Pwáraatá Jiowa, eli ka kan sótun ammolnatá ewe pwóróus me mwen eú me eú káé. Ren óm kopwe kúna feiéch, mi éch kopwe pwal ina usun me mwen kopwe fiti mwich. Sipwe sópwéch ika sia eéreni le ammólnatá.

Kopwe filatá ia me ineet kopwe káé. Ineet a kon éch kopwe afota ekiekum wóón óm káé? Lesossorusich mwen kopwe poputááni óm angang are lepwin atun noum kewe ra méúr? Inaamwo ika ese ttam óm káé nge kopwe filatá ifa úkúkún ewe fansoun kopwe káé lón, me kosap mut ngeni och mettóch epwe atai óm káé. Káé lón eú leeni mi kinamwe, me offei ekkewe minen orukoruk usun choweán reitio, TV, me cell phone. Óm Iótek me mwen óm káé, epwe álisuk le ekisaaló óm kewe aúrek lón ena rán pwe kopwe afota óm ekiek wóón án Kot we Kapas.​—Filipi 4:6, 7.

Erii pélúwan, me ammólnatá le uwawu meefiom. Poputá ren óm weweiti aúchean unusen ewe pwóróus. Ekieki usun ewe itelapen sópwun lón ena lesen, ppii ifa usun eú me eú ekkena itelap kisikis ra riri ngeni ewe itelap, me etittina ekkewe sasing me enniwili ekkewe kapas eis mi menlapei ekkewe pwóróus mi aúchea. Iwe, álleani ekkewe parakraf, me kútta pélúwen ekkewe kapas eis. Álleani ekkewe wokisin ese makketiw masouan, me ekieki ifa usun a riri ngeni ewe lesen. (Föför 17:11) Atun ka tongeni pélúweni ekkena kapas eis, esissilla fitu kapas aúchea are fitu pwóróus lón ewe parakraf epwe áchema ngonuk pélúwan. Iwe atun ewe mwich, ka tongeni eitietá poum ika ka mochen me uwawu ekis meefiom lón pwisin itiitin óm kapas.

Kopwe apachaalong lón óm we “leenien iseis” mineféén sile usun Paipel, ren óm etittina ekkewe sókkópaten itelap sipwe káé lón eú me eú ekkewe mwich.​—Mateus 13:51, 52.

• Met sókkun kókkót kopwe féri le ammólnatá fán iten ekkewe mwich?

• Ifa usun kopwe pwisin ammólnatá meefiom lón ekkewe mwich?